Ok Kobataꞌ ni Nabi Musaa
2
Na ongon ok solobuk ponupuꞌ ni Lebi nog laki.
Mikopoglibun yanin nok ponupuꞌ ni Lebi da sop.
2 Dadi migbodos og libun koyon bu migbataꞌ nog laki.
Mitongowin nong mopiyalaki og bataꞌ in,
bu binuni nin sog bon nok tolu bulan.
3 Dangan diꞌ in na mobuni og bataꞌ,
minalap yanin nog gambungb bangka nin lapatoy nok kitlan bagun diꞌ molonod.
Doksuꞌ inungodin og bataꞌ in sog gambung kituꞌ bangka nin botangoy sok sigbotan nok tinumubuꞌ song mobabow nok tubig molani sok kilid subaꞌ.
4 Na ongon ok kakaꞌ nog bataꞌ koyon nog libun.
Diyon yanin sok kolayuan migbantoy bug olo taꞌ ok koposunguan nog gilugin.
5 Ondaꞌ kobon,
minangoy diyon og bataꞌ nok Pirꞌawn nog libun bagun moliguꞌ sok subaꞌ bu mikpanow-panow ong mga sosuguonin nog libun sok kilid nok subaꞌ koyon.
Sunoy pa mitongow nok putliꞌ og gambung sok sigbotan nok subaꞌ,
dadi pialapin sok sosuguonin nog libun.
6 Pogbukaꞌ nok putliꞌ nog gambung kituꞌ,
mitongowin og bataꞌ laki nok soliyan mogaduy.
Na milolat yanin dun,
taluꞌ in,
“Anduꞌ,
og bataꞌ kini,
solobuk bataꞌ nog Ibrani.”
7 Doksuꞌ mikpolani og gilug nog bataꞌ koyon sok putliꞌ nok Pirꞌawn bangka poktaluꞌ,
“Melega taꞌ ponontongan ta ika nok tow Ibrani bagun mokpoduduꞌ sog bataꞌ koyon para dinika?”
8 Ok tabal nok putliꞌ nok Pirꞌawn,
“Oo buweꞌ,
ponontonga.”
Dadi mipanow og bataꞌ koyon bangka nin alapoy og ginaꞌ in.
9 Dangan minatong og ginaꞌ nog bataꞌ kituꞌ,
tinaluan yanin nok putliꞌ nok Pirꞌawn,
“Alap nu og bataꞌ kini,
bangka nu poduduꞌ para dinakon.
Tindanan ku da ika mogipat dun.”
Dadi inoyit na nog ginaꞌ in og bataꞌ koyon bangka nin ipatoy.
10 Dangan sinumolag-solag na og bataꞌ,
inoyit yanin nog ginaꞌ in dituꞌ sok putliꞌ nok Pirꞌawn.
Na ong niyat nok putliꞌ,
og bataꞌ in tokodoy og bataꞌ koyon.
Iningalananin nong Musa poꞌ taluꞌ in,
“Inawon ku yanin tidu sog dibabow tubig.”
Ok Kopolaguy ni Nabi Musa song Midiyan
11 Dangan subul na si Musa,
ongon og gondow minangoy yanin tumibow song mga pigiluganin nong mga tow Ibrani.
Na mitongowin tokodoy og lossahi nilon sog ginang nong mokobogat,
bu mitongowin ok solokotow sok pigiluganin Ibrani nog bininasac nok tow Misir.
12 Na limingoy yanin sog lintu bug bibangin.
Dangan daꞌdun da ong mitongowin nok tow diyon,
pinatoyin ok tow Misir kituꞌ,
bangka nin lobutoy sok pontad.
13 Doksuꞌ nituꞌ mikpuliꞌ yanin poglomaꞌ,
bu mitongowin og duwaꞌ kotow Ibrani miksuntuk.
Dadi sinakan ni Musa ok solokotow kituꞌ nok taga dusa,
“Manu bininasa nu ma ok pokasi nu Ibrani?”
14 Ok tabalin,
“Sima ong migimung dinika nok kounutan bu monghukum dinami?
Poksipihan nu da taꞌ sop akon patoyon mamaꞌ nok pogpatoy nu sok tow Misir kituꞌ?”
Na kiondokan si Musa,
bu migdiyalom-atoy yanin,
“Kiosunan na og ininangu.”
15 Dangan kiosunan nok Pirꞌawn ok pasal niyon,
ok koleganin popatoyin si Musa.
Sugaid milaguy si Musa posunguꞌ sog bonuwa Midiyand.
Pogdatongin dituꞌ,
miningkud yanin song molani nok timbaꞌ.
16 Na ongon og gimam song Midiyan iningalanan nog Yetroe nok taga bataꞌ pitu kotow budjang.
Minangoy ilon sok timbaꞌ koyon bangka sigob bu pinonuꞌ nilon ok poginuman para song mga bilibili bug kambing nog gommaꞌ nilon.
17 Sugaid sunoy pa ongon ong minatong nong mga mogogipat da sop nong mga potubuon.
Piawaꞌ nilon ong mga kobudjangan koyon bug mga potubuon nilon.
Tibuwa tinabangan ilon ni Musa,
bangka nin pinumoy ong mga potubuon nilon koyon.
18 Poguliꞌ nong mga kobudjangan,
sinakan ilon nog gommaꞌ nilon,
“Manu podaliꞌ amu da ma mikuliꞌ sog gondow kini?”
19 Ok tabal nilon,
“Ongon ok tow Misir sinumugut bu tinumabang dinami tidu sok kolaatan nong mga mogogipat nok potubuon.
Doksuꞌ sinagukanin ami nok tubig bu piinumin ong mga potubuon ta.”
20 Na miktaluꞌ og gommaꞌ nilon,
“Ayin na ma yanin dun?
Manu binagak niyu ma yanin?
Onggat niyu yanin mangoy dini bagun yanin mokokan.”
21 Dadi minangoy na diyon si Musa,
bu kisulutan yanin mogonong diyon ni Yetro.
Doksuꞌ pilibunanin si Musa diyon sog bataꞌ in nok si Sipura.
22 Na migbodos si Sipura bu migbataꞌ yanin nog laki.
Iningalanan ni Musa og bataꞌ in nog Gersom,f
poꞌ taluꞌ in,
“Midoksaꞌ u na sog len bonuwa.”
23 Dangan miniyan tinahunan,
minatoy na ok Pirꞌawn song Misir kituꞌ bu sinuklihan yanin nog bogu Pirꞌawn.
Sugaid ong mga tow Israel lolayun pa ilon sog diyalom kobinsanaan nok pongulipon dinilon.
Mikpokilolat ilon dunut gaduy,
bu mikosaut ok pongoni-ngoni nilon koyon sok Tuhan.
24 Ininongogan nok Tuhan ok pongoni-ngoni nilon.
Ondaꞌ in kolingowoy og janjiꞌ in diyon niloꞌ Ibrahim,g
Isahak bu Yaꞌkubh.
25 Mitongow nok Tuhan ok kobinsanaan nong mga tow Israel,
bu milolat yanin dinilon.