Si Nabi Musa bu ok Kayu nong Miksuliyab
3
Na si Musa na ong migipat nong mga bilibili bug kambing nok ponuganganin nok si Yetro,
og gimam sog bonuwa Midiyan.
Dadi ongon solobuk gondow,
inoyit ni Musa ong mga potubuon koyon.
Miniyan yanin sog ginlupaan mimala,
bu midopotin og Bontud Sinaya,
yonin na ok tinawag nog bontud nok Tuhan.b
2 Pogdatongin sog Bontud Sinay,
mikpotongow diyanin ong malaikat nok Tuhan mikpobayuꞌ-bayuꞌ gapuy miksuliyab sok kayu dugihon.
Mitongow ni Musa nong miksuliyab ok kayu koyon,
sugaid ondiꞌ mopus.
3 Sog diyalom atoy ni Musa,
“Uy,
mokosobuꞌ-sobuꞌ ma!
Miksuliyab le koyon,
sokaliꞌ manu ondiꞌ ma motutung?
Mokpolani u dituꞌ bagun motongowu pahatul.”
4 Dangan mitongow nok Tuhan nong mikpolani si Musa,
tinawagin si Musa tidu sok kayu nong miksuliyab,
taluꞌ in,
“Musa!
Musa!”
Ok tabal ni Musa,
“Kini u da.”
5 Ok taluꞌ nok Tuhan,
“Diꞌ a mokpolani dini.
Luwas nu ok tolumpaꞌ nu poꞌ og lupaꞌ nok pigindogan nu koyon,
sutsi.”
6 Doksuꞌ taluꞌ pa nok Tuhan,
“Akon ok Tuhan nong mga pingapuꞌ nu,
ok Tuhan niloꞌ Ibrahim,
Isahak bug Yaꞌkub.”c
Na dinungmaan ni Musa ong muluꞌ in poꞌ mondok yanin tumontong sok Tuhan.
7 Miktaluꞌ ok Tuhan,
“Mitongowu tokodoy ok kobinsanaan nong mga piktowan ku dituꞌ song Misir,
bu midongogu og gaduy nilon pokpokitabang pasal sok kologon nilon sok komot nong mga mogbobantoy dinilon nog landuꞌ kobingis.
Kiosunan ku bug ponoy ok kolossahi nilon.
8 Saan na minangoyu dini mogawon dinilon tidu sok kongkoman nong mga tow Misir.
Oyiton ku ilon lumuwas tidu sog bonuwa Misir posunguꞌ song mosubuk bu moliwag nog lupaꞌ bug ayin sumongkuꞌ ong mga pomulan bu jumatu ong mga potubuon.
Og bonuwa koyon,
pigonongan ningkomun nong mga tow Kanaan,
Hit,
Amur,
Peris,
Hib bug Yebus.
9 Na midongogu tokodoy ok pokpokitabang nong mga tow Israel,
bu mitongowu bug ponoy ok pogbinsanaꞌ dinilon nong mga tow Misir.
10 Dadi suguon ku ika mangoy sok Pirꞌawn,
bu oyit nu mawaꞌ ong mga piktowan ku Israel tidu song Misir.”
11 Na miktaluꞌ si Musa sok Tuhan,
“U Tuhan,
sima u buwan kini nong mangoy madap sok Pirꞌawn bu mogoyit nog bangsa Israel mawaꞌ tidu song Misir?”
12 Ok tabal nok Tuhan diyon ni Musa,
“Diyon ku da dinika,
bu yonin kini og gindanan nok sinuguꞌ u ika,
sumumba amu dinakon sog bontud kini sog waktu nong moyit nu na mawaꞌ ong mga piktowan ku tidu song Misir.”
13 Miktaluꞌ si Musa sok Tuhan,
“Bilaꞌ mangoyu dituꞌ song mga tow Israel moksuksug nok sinuguꞌ u nok Tuhan nong mga pingapuꞌ nami,
bangka nilon akon sakoy bug sima ong ngalan nong miksuguꞌ dinakon,
olo ma ok tabalon ku dinilon?”
14 Ok tabal nok Tuhan diyon ni Musa,
“AKON OK SOLAMA-LAMA ONGON.
Taluan nu ong mga tow Israel nog AKON OK SOLAMA-LAMA ONGON ong miksuguꞌ dinika dinilon.
15 Taluꞌ nu dinilon,
‘Ok Pogbayaꞌ-bayaꞌ,
ok Tuhan nong mga pingapuꞌ ta niyu,
ok Tuhan niloꞌ Ibrahim,
Isahak bug Yaꞌkub ong mikpangoy nakon dini diniyu.’ ”
Tinaluan pa nok Tuhan si Musa,
“Ok Tuhan,
ok solama-lama ongon,
yonin na koyon ong ngalan ku solama-lamad bug pomondoman niyu dinakon pangkat-momangkat.
16 Na angoya na dituꞌ,
bu potawag nu ong mga migmokogulang sog bangsa Israel.
Taluꞌ nu dinilon,
‘Mikpotongow dinakon ok Pogbayaꞌ-bayaꞌ,
ok Tuhan nok pingapuꞌ ta niyu,
ok Tuhan niloꞌ Ibrahim,
Isahak bu Yaꞌkub,
bu yonin kini ok tinaluꞌ in,
“Piktulikan ku amu,
bu mitongowu ok pinginang nong mga tow Misir diniyu.
17 Jumanjiꞌ u diniyu nog oyiton ku amu mawaꞌ tidu sok kobinsanaan niyu song Misir posunguꞌ sog bonuwa bug ayin sumongkuꞌ ong mga pomulan bu jumatu ong mga potubuon,
ok pigbonuwahan nong mga tow Kanaan,
Hit,
Amur,
Peris,
Hib bu Yebus.” ’ ”
18 Doksuꞌ tinaluan pa nok Tuhan si Musa,
“Tumombaꞌ da ilon dinika.
Dadi angoya sok Pirꞌawn dunut nong mga migmokogulang sog bangsa Israel.
Tubus taluꞌ nu diyanin,
‘Mikpotongow dinami ok Pogbayaꞌ-bayaꞌ,
ok Tuhan nong mga tow Ibrani.
Saan na pongonihon nami dinika nok kumboy nu ami mopanow sog ginlupaan mimala sog diyalom nok tolu ondow bagun ami mokopokkurban sok Tuhan nami.’
19 Sugaid kiosunan ku nog diꞌ amu kumboyon nok Pirꞌawn lumuwas sog bonuwa Misir,
luwal dona bilaꞌ kotogolan yanin sabap sok kowasa u.
20 Dadi potongowon ku song mga tow Misir ok pagas nok kowasa u.
Podatongan ku ilon nong miglologinis nog balaꞌ.
Doksuꞌ nituꞌ kumboyonin na amu mawaꞌ diyon sog bonuwa nin.
21 Bu polunukon ku ok pongatoyan nong mga tow Misir song mga tow Israel bagun bilaꞌ mawaꞌ amu na,
bogoyan nilon amu nog gartaꞌ nog oyiton niyu.
22 Mongoni ok kotanan nong mga kolibunan nog bangsa Israel nog ginis-ginisan nok pomulawan bug mga ponapot song mga kolibunan nok tow Misir nong migonong atawa migdukon molani diyon dinilon.
Olo-olo ong mobogoy nilon diniyu,
posolug niyu song mga gumbataꞌ niyu.
Na mamaꞌ nituꞌ ok pobiyan nong malap niyu ong mga gartaꞌ nog bangsa Misir.”