Ok Pokposun
pasal sok Kitab Nabi Yunus
Mga pigilugan,
Salam diniyu kotanan.
Song masa nok tagnaꞌ ongon ok solokotow Ibrani. Yanin koyon solobuk nabi, ong ngalanin si Yunus.
Sinuguꞌ yanin nok Tuhan mokposampoy nok taluꞌ in diyon sok siyudad nong Ninibe, ok kinosolagan nok siyudad sog bonuwa nog Asiriya nong molayuꞌ tidu sog bonuwa nin, sugaid ningkomun misakup sog bonuwa Irak. Sog waktu nong mga koapuꞌ-apuan ni Nabi Yunus, migbanta ong mga tow Asiriya bug mga tow Ibrani. Na gabaꞌ nong mangoy yanin song Ninibe, dinugtulin ok tinaluꞌ nok Tuhan diyanin bu mipanow yanin sog len bonuwa, sugaid bininsanaꞌ yanin nok Tuhan biyan sog inuglon yanin nok sodaꞌ. Dadi tinumombaꞌ na yanin dangan sinuguꞌ yanin puliꞌ nok Tuhan mokposampoy nok taluꞌ in diyon sok siyudad nong Ninibe.
Misuksug dini sok kissa pasalan ni Nabi Yunus nog ok Tuhan ong migbayaꞌ sok kotanan nog inimungin, bu pasal sok kolasa-kololatin sok kotanan nok tow dini sog dunya. Kosulutan tokodoy ok Tuhan bilaꞌ moksusun ong mga tow sog ginang nilon nong molaat bu tumombaꞌ diyanin. Golomin pa mongampun nong manusiyaꞌ basta mokiampun diyanin gabaꞌ sok podatonganin ilon nog balaꞌ pasal sog dusa nilon.
Bung mayan tonduan ita niyu nok Tuhan bu podolagonin ok pikilan ta niyu sok kopogbasta ta nini. Bung mayan modiyon diniyu ok kolasa-kololat bug kosannangan nok Tuhan.
Wassalam