Yunus 1

Kitab Nabi

YUNUS

Dinugtul ni Nabi Yunus ok Suguan Diyanin nok Tuhan

Ongon og waktu, mikparman ok Tuhan diyon ni Yunus og bataꞌ ni Amitay. Ok taluꞌ in, 2 “Angoya song Ninibe, ong mosolag nok siyudad bangka nu posunoy ong mga tow dituꞌ nong mitongowu nong miglanduꞌ na ok kolaatan nilon.”

3 Sugaid si Yunus milaguy posunguꞌ sog bonuwa nok Tarsis, poꞌ mokpolayuꞌ yanin sog gadapan nok Tuhan. Dadi dimiksun yanin posunguꞌ sog bonuwa nog Yoppa, bangka nin kotongow ok kumpit posunguꞌ sok Tarsis. Na migbayad yanin, bangka sakoy kobalan nog legin mokpolayuꞌ sok Tuhan.

4 Sugaid dangan miglayag na ilon sog lawd, piongon nok Tuhan ong mopagas nog bagyu, bangka solag ong nabok sampoy nong mamaꞌ moladak ok kumpit. 5 Dadi miondok ong mga mogoginang sok kumpit, bu kokoniya mingoni-ngoni song mga tuhan-tuhan nilon. Pimilak nilon ong mga lulan nilon sog dagat bagun mokkobogan ok kumpit.

Sugaid si Yunus sog waktu koyon, mianok ok tulugin dituꞌ sok silung nok kumpit. 6 Dadi inangoy yanin tanudoy nok kounutan nok kumpit bangka poktaluꞌ, “Hoy! Manu motuluga na ma hadja? Pogbuwata, bangka a pongoni-ngoni sok tuhan nu, kalu-kalu kololatanin pa ita bagun diꞌ ita matoy.”

7 Pogdoksuꞌ nituꞌ migisun-isun ong mga mogoginang sok kumpit, “Mogbunut-bunut ita niyu bagun kosunan ta bug sima ok sabapan sok kologon kini.”

Na migbunut-bunut ilon, bu mitonduꞌ si Yunus. 8 Dadi miktaluꞌ ilon diyanin, “Taluan nu ami bug sima ok kotuntutan nami sok kobinsanaan kini. Olo og ininang nu? Bu ayin ka tidu? Ayin og bonuwa nu? Bu olo og bangsa nu?”

9 Na tinumabal si Yunus, “Solobuku nok tow migogondok sok Pogbayaꞌ-bayaꞌ, ok Tuhan sok , ong migimung nog dagat bug lupaꞌ.”

10 Sinuksugan ilon ni Yunus nok pilaguyanin ok Tuhan. Dadi migdungag og gondok nong mga mogoginang sok kumpit, bu tinaluan nilon yanin, “Manu sop ininang nu ma ong mamaꞌ niyon?”

11 Dangan miksisolag na tokodoy ong nabok, sinakan nilon yanin, “Olo buwan ok suboy inangon nami dinika, bagun tumoddoꞌ og dagat?”

12 Na tinumabal yanin dinilon, “Tikpuꞌ niyu akon sog dagat, bagun tumoddoꞌ, poꞌ akon da ok sabapan nong mopagas nog bagyu nong miniyan dinita.”

13 Sugaid daꞌ nilon tombaoy si Yunus, tinumogol ilon momolula posunguꞌ sok kotasan, sugaid daꞌ na ilon pokosaut, poꞌ mikkosolag na tokodoy ong nabok. 14 Dadi mingoni-ngoni ilon sok Pogbayaꞌ-bayaꞌ, ok Tuhan ni Yunus, “U Tuhan, kololatoy nu ami, diꞌ nu ami siksaon sabap sok kopatoy nok tow kini. Diꞌ nu ami tuntutan sog inangon nami diyanin bilaꞌ daꞌdun og dusa nin, poꞌ ok kibiyanan kini tidu dodaꞌ sok kolegan nu.”

15 Dadi sinikwat nilon si Yunus bangka nilon tikpuoy sog dagat, na bangka pa kotoddoꞌ. 16 Na miglanduꞌ og gondok nong mga tow koyon sok Tuhan. Dadi mikkurban ilon bu miksomayaꞌ diyanin.

17 Na sog waktu nok tinikpuꞌ nilon si Yunus sog dagat, mikpodinsamaꞌ ok Tuhan nong mosolag nok sodaꞌ nog uglonon si Yunus. Na dituꞌ yanin sog diyalom tiyan nok sodaꞌ sog bon nok tolu ondow bu tolu gobi.