Ok Pongoni-ngoni ni Nabi Yunus Soliyanin sog diyalom Tiyan nok Sodaꞌ
2
Na dangan dituꞌ na si Yunus sog diyalom tiyan nok sodaꞌ,
mingoni-ngoni yanin sok Tuhan.
2 Tinaluꞌ in,
“Sok kologon ku,
sinumabbutu dinika,
u Tuhan ku,
bu ininongogan nu akon.
Mingoni u nok tabang dinika nok posunguꞌ u na sog bongowan nok kopatoy,
a
bu tinabangan nu akon.
3 Tinikpuꞌ nu akon sok pusod nog dagat.
Kibuliyukan ku nok tubig.
Kidagpakan ku nong mokoluksang nong nabok nu.
4 Mingniyatu nog binolong nu na akon sok pongatoyan nu,
sugaid mingandolu nong motongowu pa puliꞌ og baloy sutsi nub.
5 Kilapowan ku nok tubig,
bangka u kouglok.
Kidungmaan ku nog dagat,
bu kilibodan og gulu u nok sigbot.
6 Milonodu toktob sok kobatuhan nog dagat,
mamaꞌ u na nok pinirisu dituꞌ soumul-tahun,
sugaid ika u Pogbayaꞌ-bayaꞌ,
ok Tuhan ku,
inawon nu akon tidu sok kopatoy.
7 Dangan posunguꞌ u na motoktus,
mipondomu ika,
u Tuhan,
bu dituꞌ sok sutsi nok pogonongan nu,
midongog nu og ikhlas nok pongoni-ngoni u.
8 Ong mga tow nong moktotombaꞌ song mga tuhan-tuhan nog daꞌdun og jatu nin,
tinumolikud ilon sok kolasa-kololat nu,
u Tuhan.
9 Sugaid akon,
mokkurban ku dinika dunut poksanglit,
bu bologbogan ku ong misomayaꞌ u.
Ika da ok Pogbayaꞌ-bayaꞌ,
ong Mogogawon song manusiyaꞌ.”
10 Na pogdoksuꞌ nituꞌ,
sinuguꞌ nok Tuhan ok sodaꞌ nog luwaonin si Yunus sog doksaan.