Pisampoy ni Nabi Yunus ok Taluꞌ nok Tuhan song mga Tow Ninibe
3
Na mikparman na sop ok Tuhan diyon ni Yunus,
2 “Angoya song Ninibe,
ong mosolag nok siyudad.
Posampoy nu dinilon ok tinaluꞌ u dinika.”
3 Dadi tinumombaꞌ na si Yunus,
minangoy yanin song Ninibe mamaꞌ nok tinaluꞌ nok Tuhan.
Ong Ninibe kini,
moliwag tokodoy,
tolu ondow panowon ok siyudadin.
4 Pogdatongin song Ninibe,
mikpanow pa yanin sondow diyon sog diyalomin,
bangka nin posampoyoy song mga tow dituꞌ ok tinaluꞌ nok Tuhan,
taluꞌ in,
“Pogdopot nok pat puluꞌ ondow lubuhon na ok siyudad nong Ninibe kini.”
5 Dadi tinumombaꞌ ong mga tow song Ninibe sok Tuhan.
Miginonggatoy ilon mokpuwasa tidu song mokotas nog gollal sampoy mokobabaꞌ,
bu mimonapot ilon nok kadut gindanan nok poksusun nilon.
6 Na dangan midongog nok sultan nong Ninibe,
minawaꞌ yanin tidu sok trunu nin,
bangka nin luwasoy og gamisin bu mimonapot sop yanin nok kadut,
bangka ingkud sog gabu.
7 Pogdoksuꞌ nituꞌ mikpoponog yanin nog hukumanin song mga tow Ninibe,
“Kini ok suguan nok sultan bug mga ponindogin.
Daꞌdun bisan solokotow ok kuman,
minum,
bisan pa ong mga potubuon.
8 Suboy mogdogdoy nok kadut ong mga tow,
sampoy ong mga potubuon,
dungmaan da sop og lawas nilon.
Pongoni-ngoni amu mahatul sok Tuhan,
bu lotaan niyu na og ginang niyu nong molaat.
9 Diꞌ ta kosunan mopinda ok pikilan nok Tuhan,
bu mawaꞌ na ong mosolag nog lingitin dinita bagun diꞌ ita matoy.”
10 Dangan mitongow nok Tuhan og ininang nilon,
nog linotaan na nilon og ginang nong molaat,
na milolat yanin,
bu daꞌ in na ilon podatongoy nong mulukaꞌ mamaꞌ na nok tinaluꞌ in.