Pitongow nok Tuhan ok Kolasa bug Kololatin
4
Sugaid si Yunus,
daꞌ tokodoy kosuatoy bu milingit yanin poꞌ ondaꞌ unutoy nok Tuhan ok tinaluꞌ in nog lubuhonin ong Ninibe.
2 Dadi mingoni-ngoni yanin sok Tuhan,
ok taluꞌ in,
“U Pogbayaꞌ-bayaꞌ,
sog dituꞌ u pa sog bonuwa u,
mitaluꞌ u nok kololatan nu da ilon bilaꞌ moksusun ilon bu mongoni-ngoni dinika,
saan na migdaliꞌ u molaguy posunguꞌ sok Tarsis.
Poꞌ kiosunan ku nog ika ok Tuhan nong molasa bu molilolatoy,
molunuk ok pongatoyan nu,
mosabara bu atasan nu bawion ok siksaꞌ nu.
3 Dadi alap nu na u Tuhan,
ong nyawa u,
poꞌ golomu pa matoy gabaꞌ song motubuꞌ.”
4 Miktaluꞌ ok Tuhan,
“Ongon taꞌ ok kopatut nu molingit?”
5 Pogdoksuꞌ nituꞌ linumuwas si Yunus sok siyudad bangka pogimung nok ponilunganin dapit sok silangan nog bonuwa koyon.
Miningkud yanin dituꞌ,
poꞌ umatianin bug olo ok posunguan nong Ninibe.
6 Sugaid kiinitan da si Yunus,
dadi pitubuꞌ nok Tuhan ok solobuk pomulan bagun kotilungan yanin bu polasigon ok pikilanin,
tinumubuꞌ bangka solag,
bu molawa pa tidu ni Yunus.
Na migloliyag tokodoy yanin pasal sok pomulan kituꞌ.
7 Sugaid poglomaꞌ doliꞌ-ondow,
piokan nok Tuhan sog gulod ok pomulan kituꞌ,
dadi milawos bangka patoy.
8 Na dangan similak na og gondow,
pioyup nok Tuhan ong minit nog galuꞌ tidu sok silangan.
Kiinitan og gulu ni Yunus nog gondow,
bangka yanin kolamma.
Koleganin nong matoy na,
dadi miktaluꞌ yanin,
“Golomu pa matoy gabaꞌ song motubuꞌ.”
9 Na miktaluꞌ ok Tuhan ni Yunus,
“Ongon taꞌ kopatut nu molingit pasal sok pomulan koyon?”
Tinumabal si Yunus,
“Oo,
ongon,
milingitu tokodoy bu melegu na matoy.”
10 Miktaluꞌ ok Tuhan,
“Milolata tanan sok pomulan koyon nong mitubuꞌ solod sok sondow bu sogobi da,
bu minatoy poglomaꞌ doliꞌ-ondow,
sokaliꞌ daꞌdun tanan og boloy nu momula bu mokpotubuꞌ niyon.
11 Akon pa taꞌ og diꞌ mololat song Ninibe nog landuꞌ pa sop kosolag nok siyudad,
pigonongan nog labi sogatus bu duwaꞌ puluꞌ ngibu kotow nog daꞌdun ok sene-sabut nilon bug olo og ginang nong molaat bug olo ong mobais,
bu ongon pa modakol nong mga binatang?”
Wassalam