Mijukup na og Langgal
40
Tubus miktaluꞌ ok Tuhan diyon ni Musa,
2 “Potindog nu og Langgal sok ponognaan nog gondow sok ponognaan nog bulan sog bogu tahun.
3 Dadi posolod nu ok Kaban Pigjanjian bu dondingoy nu nok kurtina moimung nog bilik mahasutsi.
4 Tubus oyit nu og lomisahan nok pan sumolod sok sobolaꞌ bilik nok tinawag nog bilik sutsi,
bu pogusoy-usoyoy nu motang ong mga gimu nin.
Posolod nu da sop ok pogontudan nok politaan bangka nu botang ong mga politaanin.
5 Og lomisahan mobeteꞌ nok pidibabowan nog bulawan para poktutungan nok komanyan,
botang nu sop sog luwasan nog Bilik Mahasutsi sok sobolaꞌ nok Kaban Pigjanjian.
Tubus tangonoy nu nok kurtina og bongowan nog Langgal.
6 Doksuꞌ botang nu ok poktutungan nok kurban sog luwasan,
sog gadapan nog bongowan koyon.
7 Ontud nu sog luwasan ong mosolag nok polonggana sog ginongaan nog Langgal bug poktutungan nok kurban,
bu ungodoy nu nok tubig.
8 Alad nu nok kokanaꞌ og lumibut nog Langgal,
bu tangonoy nu nok kurtina og bongowanin.
9 Pokpuwas nituꞌ alap nu og lana momut bangka nu pisikoy sog Langgal bug lam nok kolangkapanin bagun mosutsi poꞌ wakilon dinakon.
10 Pisikoy nu sop nog lana momut ok poktutungan nok kurban sampoy og lam nong mga kolangkapanin bagun wakilon dinakon.
Dadi mahasutsi na ok pokkurbanan koyon.
11 Tubus pisikoy nu nog lana ong mosolag nok polonggana dunut nog gontudanin bagun mosutsi.
12 Oyit nu si Harun bug gumbataꞌ in nog laki sog bongowan nog Langgal,
bangka nu ilon liguꞌ nok tubig.
13 Posolugoy nu si Harun nok ponapot sutsi,
bu tuyungoy nu yanin nog lana pongsutsi gantaꞌ pogwakil diyanin nog gimam moktolagad dinakon.
14 Popolani nu da sop ong mga gumbataꞌ in nog laki bangka nu ilon posolugoy nong mga juba.
15 Tuyungoy nu da sop ilon nog lana pongsutsi mamaꞌ nog ininang nu sog gommaꞌ nilon bagun moimung ilon nong mga gimam moktolagad para dinakon.
Na biyan sok kopoksutsi dinilon koyon,
piselen na ok ponupuꞌ ni Harun moimung nok koimaman pangkat-momangkat.”
16 Na inunut ni Musa ok kotanan nok sinuguꞌ diyanin nok Tuhan.
17 Dadi pitindog og Langgal sok ponognaan nog gondow sog ikosolobuk nog bulan nog bogu tahun.
Yonin koyon og ikoduwaꞌ tahun nok pogawaꞌ nilon tidu song Misir.
18 Mamaꞌ nini og ininang niloꞌ Musa:
Pimotang nilon ong mga gontudan,
bangka nilon pasokoy bu pindogoy diyon ong mga papan bug gugdokin,
bu binotang nilon ong mga bolabagin.
19 Doksuꞌ binoklad nilon ok kokanaꞌ sok tas nog Langgal poggatop dun bangka nilon lapisoy mamaꞌ na nok sinuguꞌ nok Tuhan diyon ni Musa.
20 Tubus inalapin ong mga batu lokpiꞌ nok sinulatan nok sopuluꞌ suguan nok Tuhan,
bangka nin ungodoy sok Kaban Pigjanjian,
bu tinutupanin nok tutupin nok poktawagon Pokpongampunan nog Dusaa.
Tinangonin da sop ong mga tanggungan nok kaban kituꞌ.
21 Doksuꞌ pisolod ni Musa ok Kaban Pigjanjian sog Langgal bangka nin olotoy nok kurtina modikpol gantaꞌ pogimung dun nog Bilik Mahasutsi.
Inunut ni Musa ok sinuguꞌ nok Tuhan diyanin.
22 Pibotangin og lomisahan nok pan sok solod nog Langgal sog dapit bibang sog diyalom nog Bilik Sutsi nong mikosobolaꞌ sok kurtina modikpol koyon.
23 Pigusoy-usoyin sog lomisahan koyon ok pan sutsi nog winakil sok Tuhan mamaꞌ na nok sinuguꞌ nok Tuhan diyanin.
24-25 Pibotang da sop ni Musa ok pogontudan nok politaan dunut nong mga politaanin para sok Tuhan dituꞌ sog diyalom Langgal sog dapit lintu sok sunguan nog lomisahan.
Inunutin ok sinuguꞌ nok Tuhan diyanin.
26 Pibotangin da sop og lomisahan nok pidibabowan nog bulawan para sok komanyan diyon sog diyalom Langgal sok sobolaꞌ nok kurtina modikpol nok pigolot sog Bilik Mahasutsi.
27 Tubus miktutung yanin diyon nok komanyan momut mamaꞌ na nok sinuguꞌ nok Tuhan diyanin.
28 Pitangonanin nok kurtina og bongowan nog Langgal.
29 Binotang niloꞌ Musa ok poktutungan nok kurban sog luwasan molani sog bongowan koyon,
bangka nin kurbanoy ok potubuon,
bu winakilin sop diyon og bunga tirigu mamaꞌ na nok sinuguꞌ nok Tuhan diyanin.
30 Tubus piontudin sog luwasan ong mosolag nok polonggana koyon sog ginongaan nog Baloy bug pokkurbanan,
bu inungodanin nok tubig pongugas.
31 Dadi dituꞌ pongugas si Musa,
si Harun bug mga gumbataꞌ in nog laki nok komot bug botis nilon.
32 Mongugas ilon kada sumolod sog Langgal atawa mokpolani sok pokkurbanan.
Inunut nilon ong mga suguan nok Tuhan diyon ni Musa.
33 Pokpuwas nituꞌ inalad niloꞌ Musa og loma-lomahan sog lumibut nog Langgal bug pokkurbanan,
bu tinangonan nilon nok kurtina og bongowan nog galad.
Dadi midoksuꞌ ni Musa og ginang koyon.
Ok Sahaya nok Kotas nok Tuhan Milokop sog Langgal
34 Doksuꞌ kidungmaan nog gabun og Langgal bu milokop nok sahaya nok kotas nok Tuhan og baloy.
35 Ondiꞌ na mokosolod si Musa sog Langgal poꞌ kidungmaan na nog gabun bu milokop nok sahaya nok kotas nok Tuhan og baloy.
36 Na andun-andun mokpinda og gabun sok tas nog Langgal,
mopanow da sop ong mga tow Israel mogunut sog gabun.
37 Sugaid bilaꞌ tumonaꞌ og gabun,
tumonaꞌ da sop ilon taman song mokpinda na sop.
38 Bilaꞌ gondow,
diyon og gabun sog dibabow nog Langgal,
og gindanan nog diyon ok Tuhan,
bu bilaꞌ gobi ongon ong mamaꞌ nog gapuy diyon sog gabun koyon bagun motongow nok kotanan nong mga tow Israel.
Sog bon nok panow nilon,
lolayun mamaꞌ niyon.
Wassalam