Ok Pogliling nog Langgal
39
32 Na midoksuꞌ na ong mga kolangkapan para sog Langgal.
Inunut nong mga tow Israel ok kotanan nok sinuguꞌ nok Tuhan diyon ni Musa.
33 Dadi inoyit nilon ni Musa ong mga kolangkapan bug mga olo-olo nituꞌ para sog Langgal,
mga poksodangan dun,
mga bolabagin bug gugdokanan dunut mga gontudan,
34 og gatopin nog inimung tidu sok panit nog bilibili laki nok tininaꞌ nok pula bug mga mokolingkat nog len panit nog binatang,
sampoy ok kurtina nin para pogolot sog Langgal.
35 Inoyit nilon da sop ni Musa ok Kaban Pigjanjian dunut nok sopuluꞌ suguan nok Tuhan bu dungmaꞌ in nog bulawan nok poktawagon nok pokpongampunan nog dusa,
sampoy mga tanggunganin.
36 Doksuꞌ inoyit nilon og lomisahan nok pogbotangan nok pan bug kotanan nok kolangkapanin sampoy ok pan nog wakilon sok Tuhan.
37 Tubus mga politaan bug pogontudanin bulawan bug mga kolangkapanin sampoy og lana nin.
38 Pokpuwas nituꞌ ong mobeteꞌ lomisahan nok pidibabowan nog bulawan,
og lana pongsutsi,
ok komanyan momut,
bu ok kurtina poktambol sog bongowan nog Langgal.
39 Doksuꞌ ok poktutungan nok kurban nok pidokotan nok tumbaga dunut poktitianin nok tumbaga da sop,
bug mga tanggunganin sampoy ok kotanan nog langkapin.
Tubus ok polonggana nok pogugasan bug gontudanin.
40 Puwas nituꞌ ok kokanaꞌ nok poggalad sog loma-lomahan,
sampoy mga gugdokin dunut mga gontudan nog galad koyon,
mga tali nin bug goksukin bug kurtina poktambol sog bongowan nog galad,
bu ok kotanan nong mga kolangkapan nong mogamit sog Langgal.
41 Midoksuꞌ na sop imungon ong mga ponapot nok koimaman moktolagad sog baloy sutsi,
yonin na ok ponapot sutsi ni Harun,
bug mga ponapot nok solugon nog gumbataꞌ in nog laki bilaꞌ mogimam ilon diyon.
42 Inunut nong mga tow Israel ok kotanan nok sinuguꞌ nok Tuhan diyon ni Musa.
43 Liniling ni Musa ok kotanan nog ininang nilon,
bu mitongowin nog ininang nilon ok kotanan mamaꞌ nok sinuguꞌ nok Tuhan diyanin.
Dadi pingoni-ngonihanin ilon nog barakat.