Pogawaꞌ 36

Tinaluan ni ong mga tow, “Siloꞌ Besalel, Oholiyab bug kotanan nok kibogoyan nok kopandoyan bug pikilan nok Tuhan para moginang, ilon ong mogimung nog baloy sutsi bug mga kolangkapanin, mamaꞌ na nok sinuguꞌ nok Tuhan.” 2 Dadi pitawag ni Musa si Besalel bu si Oholiyab bug kotanan nog binogoyan nok Tuhan nok kopandoyan, sosuku nok tow nog ikhlas ok pongatoyan nilon tumabang. 3 Tinabuk nong mga pandoy kituꞌ tidu ni Musa ok kotanan nok sodokka nog binogoy nong mga tow para sok pogimung nog . Kada sisolom mogoyit diyon ni Musa ong mga tow nok sodokka nog ikhlas sok pongatoyan nilon. 4 Dangan modakol na ong mga mibogoy, ginonatan podaliꞌ nong mga pandoy og ginang nilon sog Langgal 5 bangka nilon posunoy si Musa, taluꞌ nilon “Miglabi na ong mga inoyit nong mga tow para sok poginang nok sinuguꞌ nok Tuhan inangon.” 6 Dadi miksuguꞌ si Musa nok posunan ong mga tow sok pigonongan nilon, “Amu mga bangsa libun-laki, lumotaꞌ amu na mogbogoy nok sodokka niyu para sok pogimung nog Langgal.” Dadi linumotaꞌ na ong mga tow mogoyit nong mga sodokka 7 poꞌ mijukup na para sok pogimung nog Langgal bu miglabi pa tanan.

Ok Pogimung nong mga Kolangkapan para sog Langgal

Na og Langgal siyam dopa og yabaꞌ in bu tolu dopa og lokpangin.

Dadi inimung niloꞌ Besalel ok pat buk dungmaꞌ sog gatop nog Langgal nong mitontun sog lupaꞌ. Og ikosolobuk lapis inimung tidu song molingkat nok kokanaꞌ nok pingari-arihan. Og ikoduwaꞌ lapis inimung tidu sog bolohibu nok kambing. Tubus og ikotolu nog lapisin, inimung tidu sok panit nog bilibili, bu og ikopat tidu song mobais nok panit nog len.

Migimung da sop ong mga pandoy nong mga gugdok, papan bug bolabag para sog Langgal. Tubus pinutus nilon nog bulawan, bu inimung nilon tidu sok silber ong mga gontudan dun.

Migimung da sop ong mga pandoy koyon nok tidu sok kayu akasya, bu pinutus nilon nog bulawan og diyalom bug luwasanin. Og yabaꞌ in nom dangow bu tongaꞌ, bu og lokpang bug lawa nin pat dangow. Binotangan nilon sop patbuk gallang-gallang bulawan sok sosolobuk botisin, bu duwaꞌ buk tanggungan nok kayu pinutus da sop nog bulawan para pogbulentengan nilon. Ok tutup nok Kaban Pigjanjian inimung tidu sog bulawan, bu binotangan duwaꞌ buk malaikat migadap. Ok pokpak nilon momoklad bagun kotilungan ok tutupin.

Inimung da sop niloꞌ Besalel og duwaꞌ buk lomisahan nok pinutus nog bulawan, solobuk pogbotangan nok pan pomondoman sok Tuhan, bu solobuk mobeteꞌ para poktutungan nok komanyan. Og duwaꞌ buk lomisahan koyon, inimungan da sop nog gallang-gallang bug tanggungan nok pinutus da sop nog bulawan.

Migimung ong mga pandoy nok poggontudan nok politaan bug mga politaanin tidu song mga tolupuluꞌ bu lima kilu nog bulawan. Ok pun nok poggontudan koyon ongon totolubuk sanga nin song mansing kilidin nok pingari-arihan nong mga bulak-bulak.

Inimung da sop niloꞌ Besalel ong modikpol nok kokanaꞌ nong mogolot sog Langgal bagun moimung og bug Bilik Sutsi. Inimung nilon tidu song mokoluksang nok salban putiꞌ, taluk, bilu bug pula. Pingari-arihan da sop koyon ni Besalel nong malaikat. Migimung da sop ilon nong mga gugdokin nok pinutus nog bulawan, mga gontudanin nok silber bug mga poksodangan nog bulawan. Mamaꞌ nituꞌ da sop ok pogimung nilon nok kokanaꞌ sog bongowan nog Langgal dunut mga gugdokin nok pinutus da sop nog bulawan bu taga gulu bulawan, mga poksodangan bulawan bu mga gontudanin nok tumbaga.

Inimung da sop nong mga pandoy, ong mga juba nog gamiton ni bug mga gumbataꞌ in sok pogimam nilon sog Langgal, ok poktutungan nok kurban, ok polonggana bug pogontudanin tidu sok tumbaga, mga gugdok nog galad bu mga pogontudan tumbaga sog loma-lomahan nog Langgal, kokanaꞌ in, mga goksuk, mga poksodangan, mga tali, bu modakol pa nong mga kolangkapan bulawan bug tumbaga nog gamiton sok pokkurban bug poktolagad sok Tuhan.