Ponognaan 50

Na migaduy si Yusup kimokop sog gommaꞌ in bangka nin alokoy. 2 Doksuꞌ nituꞌ miksuguꞌ si Yusup song mga sosuguonin nok polihalaon og bangkoy nog gommaꞌ in. 3 Og bon nok pokpolihalaꞌ nilon dun pat puluꞌ ondow poꞌ binotangan nilon og bangkoy nog bulung bagun ondiꞌ moduꞌ mamaꞌ nog gaddat asal sog bonuwa . Na migdukkaꞌ ong mga tow diyon sog bon nok pitu puluꞌ gobi.

4 Dangan midoksuꞌ og waktu nok pogdukkaꞌ nilon, miktaluꞌ si Yusup song mga ponindog ni , longin, “Anduꞌ, posampoy niyu pa ok taluon ku dituꞌ ni Pirꞌawn. 5 Pisapa u nog gommaꞌ u nog bilaꞌ matoy yanin, sumboy kubulon ku yanin sok kubulan nok pidinsamaꞌ in dituꞌ sok . Dadi pongonihon ku ni Pirꞌawn nok kumboyonin da bosiya akon mangoy sok Kanaan mokkubul nog gommaꞌ u. Doksuꞌ mokpuliꞌ u da mogdayun.” 6 Ok tabal ni Pirꞌawn ni Yusup, “Angoya na dituꞌ. Kubul nu og gommaꞌ nu mamaꞌ na nok pisapa nin dinika.”

7 Dadi minangoy na si Yusup sok Kanaan mokkubul nog gommaꞌ in. Migunut diyanin ok kotanan nok ponindog ni Pirꞌawn, bu ok kotanan nok tow motas sog gastanaꞌ bu ong mga miglokounutan song Misir. 8 Migunut sop ni Yusup ong mga salu baloyin, mga koiluganin bug mga salu baloy nog gommaꞌ in. Ong mibagak sog Gosen, ong mga mokobikaꞌ nog gumbataꞌ da bug mga potubuon nilon. 9 Modakol tokodoy nok tow ong migunut ni Yusup, ongon na ong mikkudaꞌ bug mikkorumata.

10 Dangan mikodopot ilon sok poglegekan nok pogingalanan nog Atad, song molani nok subaꞌ nog Jordan, mikkorukkaan ilon. Pigjagahan niloꞌ Yusup og gommaꞌ in sog bon nok pitu gobi. 11 Dangan mitongow nong mga tow Kanaan ok pogdukkaꞌ nilon diyon sog Atad, taluꞌ nilon, “Landuꞌ tokodoy ok korukkaan nong mga tow Misir.” Saan na iningalanan nilon og bonuwa koyon nog Abel Misrayim ok posabut dun og “pogdukka nong mga tow Misir”.

12 Dadi inunut nong mga gumbataꞌ ni Yaꞌkub ok pimilin-milinin kituꞌ dinilon. 13 Poꞌ inoyit nilon og bangkoyin dituꞌ sok Kanaan bangka nilon kubuloy sog langub batu song Makpela, sog dapit silangan nong Mamre. Og lupaꞌ kini misaluy ni tidu ni Epron ok tow Hit, bangka nin imungoy nok pongubulan. 14 Pogdoksuꞌ ni Yusup kubuloy og gommaꞌ in, mikpuliꞌ na yanin song Misir sampoy ong mga gilugin, bug lam nong mga migunut mokkubul.

Pibogan ni Yusup ok Porossahan nong mga Gilugin

15 Na dangan minatoy na og gommaꞌ nilon, migisun-isun ong mga gilug ni Yusup, taluꞌ nilon, “Sunoy mogdumut si Yusup dinita, bu sulianin ita sog lam nok kolaatan nog ininang ta diyanin.” 16 Dadi mikpoyit ilon nog lapal dituꞌ ni Yusup, taluꞌ nilon, “Sog daꞌ pa patoy si Ommaꞌ, mimilin yanin dinami, taluꞌ in, 17 ‘Taluꞌ niyu ni Yusup nok pongonihon ku diyanin nog ampunonin na amu pasal sok kolaatan nog ininang niyu diyanin.’ Dadi ningkomun mongoni ami nog ampun dinika song mga nong miinang nami, ong mga da sop nok Tuhan nok piktuhanan nog gommaꞌ ta niyu.” Dadi migaduy si Yusup dangan midongogin og lapal koyon tidu song mga gilugin.

18 Doksuꞌ nituꞌ minangoy sumudjud og lam nog gilugin dituꞌ diyanin, taluꞌ nilon, “Kini ami na mokpoulipon dinika.” 19 Sugaid ok tabal ni Yusup dinilon, “Diꞌ amu mondok. Kanaꞌ u da ok Tuhan nong mokotumbas diniyu. 20 Motud nok kolegan niyu mongmula u, sugaid ok kolegan nok Tuhan mobais ok posunguanin. Poꞌ yonin kituꞌ ong maksud nok Tuhan bagun kotabangan ok kotubuꞌ nong modakol nok tow mamaꞌ nong mitongow ta na. 21 Dadi diꞌ amu mondok, gastuhan ku amu bug mga gumbataꞌ niyu.” Na pagga maꞌ nituꞌ ok tinaluꞌ ni Yusup, mosannang na puliꞌ ok pongatoyan nilon.

Ok Kopatoy ni Yusup

22-23 Na si Yusup bug mga gilugin sampoy ok kotanan nok ponupuꞌ nog gommaꞌ in kituꞌ, migonong ilon song . Misaut pa ni Yusup og ikotolu pangkatan nok ponupuꞌ in tidu ni Eprayim, bu migiba nin pa ong mga gapuꞌ ni Manasse, mga gumbataꞌ ni Makir. Mikodopot og gumul ni Yusup sogatus bu sopuluꞌ tahun, bangka yanin patoy.

24 Na sog daꞌ pa patoy si Yusup mimilin yanin song mga koiluganin, “Posunguꞌ u na matoy. Sugaid diꞌ amu da potiyangan nok Tuhan, bu oyitonin da amu sog bonuwa nog jinanjiꞌ in song mga pingapuꞌ taꞌ nok siloꞌ bu bu sog gommaꞌ ta nok si Yaꞌkub.” 25 Doksuꞌ pisapa ni Yusup ong mga ponupuꞌ ni , taluꞌ in, “Poksapa amu, bilaꞌ matong na og waktu nog oyiton amu na nok Tuhan sog bonuwa kituꞌ, oyiton niyu ok tulan ku.”

26 Na minatoy si Yusup sog gumul nok sogatus bu sopuluꞌ tahun, bu binotangan nog bulung og bangkoyin bagun ondiꞌ moduꞌ bangka ungodoy sok kaban song Misir.

Wassalam