Ok Pomilin-milin ni Yaꞌkuba song mga Gumbataꞌ in
49
Na tinawag ni Yaꞌkub og lam nog gumbataꞌ in,
taluꞌ in,
“Pokpolani amu dinakon,
poꞌ taluan ku amu bug olo ok koposunguan niyu lomaꞌ-dinglag.
2 Angoy amu dini mga gumbataꞌ u,
poginongog amu nok taluon ku.
3 Ika Ruben,
og bataꞌ u nog gulang bataꞌ,
ok pagasu bu og gindanan nog akon og laki.
Mobantuga bu mopagasa bosiya tidu sok koilugan nu.
4 Sugaid ong napsu nu mamaꞌ nong mologos nok tubig nog diꞌ kosaggaan,
poꞌ sinammal nu ok pogbolilidan ku sog ininang nu sog libun ku.b
Saan na diꞌ a na mokolabi song mga gilug nu.
5 Amu sop Simeon bu Lebi,
batuk amu da.
Gamiton niyu ong mga kalis niyu sok kolaatan.c
6 Diꞌ u meleg mampuꞌ nog olo-olo ok koisunan niyu.
Poꞌ bilaꞌ molingit amu,
momatoy amu mogdayun nok tow,
bu mogloliyag amu momutuk nog gugat nok sapiꞌ sog lolitokin.
7 Suknaan amu pasal sok koboluꞌ niyu poꞌ miglanduꞌ kobisa.
Poksuwoy-suwoyon ong mga ponupuꞌ niyu moglunsulan sog liwag nog bonuwa Israel.
8 Na ika Yahud sanglitan ka nong mga gilug nu,
bu rumukuꞌ ilon dinika,
bu dagon nu ong mga banta nu.
9 Ika Yahud,
mamaꞌ a hantang nong mobataꞌ nog liyon.
Bilaꞌ modoksuꞌ na kuman,
muliꞌ na lumoku bangka tulug.
Daꞌdun ong mokotowakkal sumasow dun.
10 Diꞌ modoksuꞌ ok poksultanan nong mga ponupuꞌ nu,
bu mogbayaꞌ-bayaꞌ ilon toktob matong na og gapuꞌ in tokodoy.
Yanin ok sumboy tombaan nong mga kobangsa-bangsahan.
11 Ikotanin ok kudaꞌ himarin sok pun anggul,
ong nati kudaꞌ himarin sok kinobaisan nok panga nog anggul.
Og gamisin mamaꞌ nog dinoktakanin sok tubig anggul,
poꞌ og bayuꞌ-bayuꞌ in mamaꞌ nog duguꞌ.
12 Ong mata nin mamaꞌ nok tinaꞌ nok tubig anggul bu ong ngisi nin,
moputiꞌ pa tidu sog gatas.
13 Na ika sop Sebulun,
ok pogonongan nu sok kilid dagat,
pogdongguan nong mga kappal.
Og liwag nog lupaꞌ nu mosaut sampoy sog bonuwa Sidon.
14 Ika Issakar,
mamaꞌ a hantang mopagas nok kudaꞌ himar nong mogloku sok pogulalihan nong mga bilibili.
15 Poktontong nu nong mohantap og bonuwa bu mokololiyag og lupaꞌ diyon,
atasan nu mokpisan nong mobogat,
togolon nu moginang mamaꞌ hantang nog gulipon.
16 Ika Dan,
monghukuma nok piktowan nu mamaꞌ nong mga len nok pangkatan ni Israel.
17 Mamaꞌ a nong moboluꞌ nong mamak sok kilid dalan nong monoktuk nog botis nok kudaꞌ nong miyan bagun molabuꞌ ok tow nong mingudaꞌ dun.”
18 Taluꞌ pa ni Yaꞌkub,
“U Tuhan,
mogbagadu nok pogawon tidu dinika.”
19 Miktaluꞌ puliꞌ si Yaꞌkub sog gumbataꞌ in.
“Na ika sop Gad,
sulungon ka nong mga mundu,
sugaid mogonat nu da ilon,
bangka a pokosuliꞌ.
20 Ika sop Aser,
songkuan og lupaꞌ nu,
ika ok piktiduhan nog landuꞌ kobais nok pongonganon dait song mga sultan.
21 Ika sop Naptali,
mokololiyag ok pokposampoy nu,
ibadat sog gusa nong mikoboluy,
moluhaya a gumobok.
22 Bu ika Yusupd,
mamaꞌ a nok pun kayu sok kilid tubig,
mogjatu og bunga nin bu ok panga nin tumontun sog luwasan nog galad.
23 Bakasa ginonat nong mga banta nu,
pinanaꞌ nilon ika,
bu binsanaon nilon ika.
24 Sugaid ok panaꞌ nu misimpan lolayun,
bu mopagas og bingkon nu biyan sok poktabang nok Tuhan Mokowasa,
ok Tuhan nog gommaꞌ nu.
Yanin da sop ong Mogogipat,
ok taming nog gommaꞌ nu nog diꞌ kutongan.
25 Yanin ok Tuhan Mokowasa,
ok Tuhan ku.
Yanin ok tumabang bu mogbarakat dinika.
Barakatanin ika nok tubig tidu sog langit bug tubig tidu sog diyalom lupaꞌ,
barakatanin sop ika nong modakol nok ponupuꞌ bug mga potubuon.
26 Ong mga barakat nog gommaꞌ nu mosolag tidu sog bontud,
mosaut sok sung-sung nok kobukidan.
Bung mayan barakatan ka Yusup soumul-tahun mamaꞌ nong mga barakat koyon,
poꞌ ika ok kounutan nong mga gilug nu.
27 Na ika Benhamin,
mamaꞌ a nog gayam talun nog gibogon.
Solom-solom kanonin ong midapaꞌ in,
bu lolabung-lolabung bobahagionin ong mialapin.”
28 Na yonin kituꞌ ok pimilin-milin ni Yaꞌkub sok sosolokotow nog gumbataꞌ in.
Ilon na koyon ok sopuluꞌ bu duwaꞌ kotow nog bataꞌ ni Israel nok piktiduhan nong mga pangkatan nog bangsa Israel.
Ok Kopatoy ni Yaꞌkub
29 Na sinuguꞌ ni Yaꞌkub ong mga gumbataꞌ in,
ok taluꞌ in,
“Akon kini,
posunguꞌ u na tumuyuk song mga pingapuꞌ u nong minatoy.
Kubul niyu akon dituꞌ sok pikkubulan nong mga mokogulangu,
dituꞌ sog langub batu sog lupaꞌ nog bakas ni Epron,
ok tow Hit.
30 Og langub koyon dituꞌ mibotang song Makpela,
dapit silangan molani song Mamre sog bonuwa Kanaan.
Misaluy nog gomboꞌ u nok si Ibrahim dituꞌ ni Epron,
bangka nin imungoy nok pongubulan.
31 Dituꞌ kinubul ong mga gomboꞌ u nok siloꞌ Ibrahim bu si Sarah sampoy og gommaꞌ bug ginaꞌ u nok si Isahak bu si Ribeka.
Dituꞌ u da sop kinubul og libun ku nok si Leya.
32 Og lupaꞌ bu og langub batu koyon,
misaluy tidu sok tow Hit.”
33 Pogdoksuꞌ ni Yaꞌkub momilin-milin song mga gumbataꞌ in,
migbolilid yanin mokpuliꞌ bangka yanin kowapat.