Og Barakat para ni Manasse bu ni Eprayim
48
Na daꞌ kobon,
ongon ong mikposun ni Yusupa,
taluꞌ in,
“Og gommaꞌ nu miglongkoꞌ na.”
Dadi timibow yanin dituꞌ,
bu inoyitin og duwaꞌ kotow nog bataꞌ in nok si Manasse bu si Eprayim.
2 Na piosunan nok solokotow si Yaꞌkubb,
taluꞌ in,
“Og bataꞌ nu nok si Yusup,
minatong.”
Dadi tinogolin mogbuwat og lawasin tidu sok tuluganin bangka yanin ingkud.
3 Taluꞌ ni Yaꞌkub ni Yusup,
“Sog waktu nog dituꞌ u pa sog bonuwa Lus sog lupaꞌ nok Kanaan,
mikpotongow dinakon ok Tuhan nong Mokowasa bu binarakatanin akon.
4 Ok taluꞌ in dinakon,
‘Tontong nu ba,
podakolon ku ok ponupuꞌ nu,
bu moimung ilon nog bangsa modakol.
Bu bogoyon ku og bonuwa kini song mga ponupuꞌ nu soummul-tahun.’ ”
5 Taluꞌ pa sop ni Yaꞌkub,
“Yusup,
og duwaꞌ kotow nog bataꞌ nu nog laki,
yonin na si Manasse bu si Eprayim nog binataꞌ song Misir sog daꞌ u pa pokangoy dini,
itungon ku nog bataꞌ u mamaꞌ ni Ruben bu ni Simeon.
6 Sugaid bug ongon pa og bataꞌ nu liyu nilon,
na dinika na,
bu mokoalap ilon nok pusakaꞌ tidu ni Manasse bu ni Eprayim.
7 Ininangu ong mamaꞌ nini,
pasal sog ginaꞌ nu si Rakiya.
Poꞌ poguliꞌ u tidu sok Paddan,
soliyan ku pa sog dalan nok kanaꞌ tantu molayuꞌ sog bonuwa Eprata,
minatoy na yanin.
Dadi kinubulu yanin dituꞌ sok kilid dalan posunguꞌ sog Eprata.”
Og Eprata kini,
yonin na og Betlehem ningkomun.
8 Dangan mitongow ni Israel ong mga gumbataꞌ ni Yusup,
miksak yanin,
“Sima koyon?”
9 Ok tabal ni Yusup sog gommaꞌ in,
“Ilon kini ong mga gumbataꞌ u,
og binogoy nakon nok Tuhan sok kobon ku dini song Misir.”
Taluꞌ ni Yaꞌkub,
“Polani nu ilon dini dinakon bagun ku ilon kopongonihan nok kobaisan.”
10 Na si Israel kini,
molamong na ok ponontongin,
poꞌ mogulang na tokodoy yanin.
Dadi pilani ni Yusup ong mga bataꞌ in sog gommaꞌ in.
Kinokop ni Israel ong mga gapuꞌ in bangka nin alokoy koduwaꞌ-duwaꞌ.
11 Taluꞌ in diyon ni Yusup,
“Daꞌ u na pogniyat nong motongowu pa ika mokpuliꞌ.
Sugaid tidu sok kolasa-kololat nok Tuhan,
sampoy ong mga gumbataꞌ nu,
mitongowu pa.”
12 Na inawaꞌ ni Yusup ong mga gumbataꞌ in sog gibahan ni Yaꞌkub,
bangka yanin sudjud.
13 Pogdoksuꞌ nituꞌ binotang ni Yusup si Eprayim sog dapit bibang ni Yaꞌkub,
bu si Manasse sog dapit lintu nin.
14 Sugaid piksoliyu ni Israel ok komotin.
Og lintu nin dinoponin sog gulu ni Eprayim,
yonin na ong mongud,
bu og bibangin dinoponin sog gulu ni Manasse,
yonin na og gulang bataꞌ.
15 Doksuꞌ pingoni-ngonihanin si Yusup bug mga gapuꞌ in nok kobaisan sok Tuhan,
ok taluꞌ in,
“U Tuhan ku,
ok Tuhan da sop nog gomboꞌ u nok si Ibrahim bu gommaꞌ u nok si Isahak.
Ika da ong mogogipat dinakon tidu sok kobikaan ku sampoy song ningkomun.
16 Tinabangan ku nong malaikat nok Tuhan tidu sog lam nok komulahan,
na bung mayan pobaisanin da sop og gumbataꞌ kini.
Bu bung mayan mopondom ong ngalan ku bug ngalan nog gomboꞌ u nok si Ibrahim bug gommaꞌ u nok si Isahak tiduanan dinilon,
bu bung mayan dumakol ilon dini sog ginlupaan.”
17 Dangan mitongow ni Yusup nog binotang ni Yaꞌkub og lintu nin sog gulu ni Eprayim,
daꞌ yanin kosulutoy.
Dadi inonggaydanin ok komot nog lintu nog gommaꞌ in poꞌ pindahonin bosiya sog gulu ni Manasse.
18 Taluꞌ ni Yusup sog gommaꞌ in,
“Kanaꞌ maꞌ niyon Ommaꞌ.
Yonin kini og bataꞌ u nog gulang bataꞌ,
dinya nu botangoy ok komot nu nog lintu.”
19 Na diꞌ meleg og gommaꞌ in,
bu taluꞌ in,
“Kiosunan ku,
Toꞌ.
Ong mga ponupuꞌ ni Manasse moimung da sop nog bangsa mosolag,
bu moimung da sop yanin nong motas.
Sugaid labi motas ong mongudin nok si Eprayim,
bu moimung ong mga ponupuꞌ in nong mga mosolag nog bangsa.”
20 Dadi sog gondow koyon pingoni-ngonihan na ilon ni Israel nok kobaisan,
ok taluꞌ in,
“Bilaꞌ mongoni-ngoni ong mga tow Israel nok kobaisan,
maꞌ nini ok taluon nilon,
‘Bung mayan bogoyan amu da nok Tuhan nok kobaisan mamaꞌ nog binogoyin niloꞌ Eprayim bug Manasse.’ ”
Sok tinaluꞌ ni Israel kini,
piuna nin si Eprayim tidu ni Manasse.
21 Miktaluꞌ si Israel dituꞌ ni Yusup,
“Akon kini posunguꞌ u na matoy,
sugaid diꞌ amu da potiyangan nok Tuhan.
Oyitonin da amu mokpuliꞌ sog bonuwa nong mga pingapuꞌ ta niyu.
22 Na ongon ok pusakaon ku dinika,
labi pa tidu song mga gilug nu.
Yonin na og bukid nong mialapu tidu sog bangsa Amur biyan sok kalis bug panaꞌ u.”