Ponognaan 47

Piilala ni Yusup si Yaꞌkub dituꞌ ni Pirꞌawn

Doksuꞌ minangoy si Yusup dituꞌ ni Pirꞌawn, taluꞌ in, “Minatong na og gommaꞌ u bug mga koilugan ku tidu sok , bu inoyit nilon ong mga potubuon bug lam nog gartaꞌ nilon. Dituꞌ ilon ningkomun sog Gosen.”

2 Tubus pidunut ni Yusup og lima kotow nog gilugin bangka nin poilalahoy diyon ni Pirꞌawn. 3 Na sinakan ilon ni Pirꞌawn, taluꞌ in, “Olo ok pongusaha niyu?” Ok tabal nilon, “Ampun Sultan, ami kini mogogipat nog bilibili, mamaꞌ da sop nong mga mokogulang nami.” 4 Tinaluan nilon puliꞌ si Pirꞌawn, “Minangoy ami nong mga sosuguon nu kini mogonong dini soliyan poꞌ landuꞌ na ok ponggutom sok Kanaan, bu daꞌdun na ong mosoksab nong mga potubuon nami. Na bilaꞌ mogdadi, momuhun ami dinika nong mogonong ami sog Gosen.” 5 Taluꞌ ni Pirꞌawn ni Yusup, “Dini na og gommaꞌ nu bug mga pigilugan nu, 6 bu ong togama tumolimaꞌ sok tolianak nu. Poonong nu ilon sog Gosen, ok kinobaisan nog lupaꞌ. Bu bilaꞌ ongon dinilon ok taga kokosun, poipat nu dinilon ong mga potubuon ku.”

7 Doksuꞌ nituꞌ inoyit ni Yusup og gommaꞌ in, bu piilala nin dituꞌ ni Pirꞌawn. Na mingoni-ngoni si Yaꞌkub nok kobaisan sok Tuhan para ni Pirꞌawn. 8 Tubus sinakan ni Pirꞌawn si Yaꞌkub, “Andun na og gumul nu?” 9 Tinumabal si Yaꞌkub ni Pirꞌawn, “Og waktu nok kopoglunsul-lunsulu dini sog dunya sogatus bu tolu puluꞌ tahun da. Mologon ok kibiyan-biyanan ku, bu og gumulu ondaꞌ pokobatuk song mga gumul nong mga gomboꞌ u.” 10 Taluꞌ pa ni Yaꞌkub diyon ni Pirꞌawn, “Bung mayan, barakatan ka nok Tuhan.” Doksuꞌ nituꞌ minawaꞌ na si Yaꞌkub.

11 Dadi pionong ni Yusup song Misir og gommaꞌ in bug mga koiluganin, bu binogoyanin ilon nok kinobaisan nog lupaꞌ sog bonuwa nog Ramsis, mamaꞌ nok taluꞌ ni Pirꞌawn. 12 Inaku ni Yusup og gastu nok kan nog gommaꞌ in bug mga gilugin sampoy mga libun-bataꞌ nilon.

Pasal sok Ponggutom

13 Na miksilanduꞌ ok ponggutom, daꞌdun na ok kan ayin-ayin. Ok tow bug mga tow Kanaan molamma na pasal sog gutom. 14 Linimud ni Yusup og lam nok sin nog binayad nong mga tow Misir bug tow Kanaan nong minaluy nog . Doksuꞌ inoyitin ok sin sog gastanaꞌ ni . 15 Dangan mitipot na ok sin nong mga tow Misir bug mga tow Kanaan, minangoy ilon dituꞌ ni Yusup, taluꞌ nilon, “Bogoyan nu ami nok kan poꞌ mitipot na ok sin nami. Diꞌ nu ami posagadan matoy nog gutom.” 16 Ok tabal ni Yusup, “Bilaꞌ daꞌdun na ok sin niyu, oyit niyu dini ong mga potubuon niyu. Soliyuhan ku diniyu nok kan.” 17 Dadi inoyit nilon dituꞌ ni Yusup ong mga potubuon nilon, mga bilibili, kambing, sapiꞌ bug mga . Sog diyalom nok sotahun kituꞌ, binogoyan ilon ni Yusup nok kan gantiꞌ nog lam nong mga potubuon nilon.

18 Pogdoksuꞌ nok tahun kituꞌ, minangoy na sop mokpuliꞌ ong mga tow dituꞌ ni Yusup, taluꞌ nilon, “Tuwan, diꞌ nami na bunihon dinika nong mitipot na ok sin bug mga potubuon nami. Daꞌdun na ong misamaꞌ dinami luwal og lawas bug lupaꞌ nami. 19 Dadi tabang nu ami, diꞌ nu ami posagadan matoy nog gutom, poꞌ mogasta da sop og lupaꞌ nami. Na golom pa saluy nu na sampoy na og lawas nami poksoliyu nami nok kan. Bisan uliponon ami na ni Pirꞌawn bu diyanin na og lupaꞌ nami, basta bogoyan nu hadja ami nok kan bug boniꞌ nok pomulahon bagun ongon ok kotubuan nami.” 20 Dadi piksaluy nong mga tow Misir og lam nog lupaꞌ nilon dituꞌ ni Yusup para ni Pirꞌawn, poꞌ landuꞌ na tokodoy ok ponggutom. Sinaluy ni Yusup ok kotanan nog lupaꞌ nilon, dadi si Pirꞌawn na og gapuꞌ in. 21 Bu ok kotanan nok tow song Misir, miimung nog ni Pirꞌawn. 22 Og daꞌ kosaluy ni Yusup, og lupaꞌ da nong mga koimaman, poꞌ asal na ilon ginastuhan ni Pirꞌawn. Saan na daꞌ ilon pogdagang nog lupaꞌ nilon.

23 Doksuꞌ miktaluꞌ si Yusup song mga tow, “Ningkomun misaluyu na amu bug mga lupaꞌ niyu para ni Pirꞌawn. Na kinya na og boniꞌ, bogoyon ku diniyu bagun amu mokopomula. 24 Bilaꞌ gumani amu na, sumboy bogoyon niyu ni Pirꞌawn og ikolima bahagiꞌ nok songkuꞌ niyu. Tibuwa ok pat bahagiꞌ diniyu bagun ongon ong moboniꞌ niyu bu ongon ong mokan niyu bug mga tow sog diyaloman niyu.” 25 Ok tabal nilon, “Tuwan, ika ong mikotabang dinami sok kosigpitan. Mura-murahan kosulutan ka dinami. Meleg ami mokpoulipon ni Pirꞌawn.” 26 Dadi inimung ni Yusup nok saraꞌ sog bonuwa Misir, yonin na og ikolima nok songkuꞌ nong mga tow sumboy bogoyon ni Pirꞌawn, liyu sok songkuꞌ nong mga gimam. Ok saraꞌ kini inunut pa sampoy ningkomun.

Ok Pomilin-milin ni Yaꞌkub

27 Dadi migbonuwa siloꞌ sog Gosen, ok sakup nong . Mikkodakol tokodoy ilon bu mikkodayahan. 28 Migonong si Yaꞌkub song Misir sopuluꞌ bu pitu tahun sampoy mikosaut sogatus bu pat puluꞌ bu pitu tahun og gumulin.

29 Dangan kinanamanin na nok posunguꞌ na yanin matoy, pitawagin si Yusup bangka nin taluoy, “Bilaꞌ molasa a da dinakon, botang nu ok komot nu sok pa u, poꞌ posapahon ku ika nog diꞌ nu akon kubulon song Misir bilaꞌ matoyu. 30 Sugaid oyit nu og bangkoyu lumuwas song Misir. Doksuꞌ kubul nu akon sok pongubulan nong mga mokogulangu.” Tinumabal si Yusup, “Oo Ommaꞌ, unuton ku da ok tinaluꞌ nu.” 31 Taluꞌ ni Israel, “Sapa a dinakon.” Na sinumapa si Yusup. Dadi simudjud si Israel sok tas nok tuluganin dunut poksukulin.