Ok Pogangoy niloꞌ Israel song Misir
46
Na mipanow na siloꞌ Israel,
inoyit nilon og lam nog gartaꞌ nilon bangka ilon angoy sog Berseba.
Pogdatong nilon dituꞌ,
mikkurban si Israel posunguꞌ sok Tuhan,
ok Tuhan da sop nog gommaꞌ in nok si Isahak.
2 Poglogobi,
mikpotongow diyanin ok Tuhan,
taluꞌ in,
“Yaꞌkuba,
Yaꞌkub.”
Tinumabal yanin,
“Kini u da.”
3 Na miktaluꞌ ok Tuhan,
“Akon ok Tuhan,
ok Tuhan nog gommaꞌ nu.
Diꞌ a mondok mogonong song Misir,
poꞌ imungon ku ok ponupuꞌ nu nong mosolag nog bangsa sog bonuwa koyon.
4 Diyon ku da tattap dinika song Misir,
bu oyiton ku da puliꞌ sog bonuwa kini ong mga ponupuꞌ nu.
Bilaꞌ matoya na,
diyon da si Yusupb song molani nu.”
5 Doksuꞌ nituꞌ migdayun na siloꞌ Yaꞌkub tidu sog Berseba posunguꞌ sog bonuwa Misir.
Pisakoy nilon si Yaꞌkub sampoy ong mga libun-bataꞌ nilon song mga korumata nok pinoyit ni Pirꞌawn.
6 Inoyit nilon da sop ong mga potubuon nilon bu kotanan nog gartaꞌ nilon tidu sog bonuwa Kanaan.
Dadi minatong si Yaꞌkub bug lam nok ponupuꞌ in song Misir,
7 og lam nog bataꞌ in libun bug laki,
bug lam nog gapuꞌ in libun bug laki.
Mga Ponupuꞌ ni Yaꞌkub
8 Na yonin kini ong mga ngalan nong mga ponupuꞌ ni Yaꞌkub nog iningalanan da sop nog Israel nong mikopogunut diyanin mangoy song Misir.
Og bataꞌ in nog gulang bataꞌ nok si Ruben,
9 bug mga gumbataꞌ ni Ruben nog laki,
siloꞌ Hanok,
Pallu,
Hesron bu Karmi.
10 Ok sumunuꞌ si Simeon bug mga gumbataꞌ in nog laki,
siloꞌ Yemuel,
Yamin,
Ohad,
Yakin,
Sohar bu Saul.
Si Saul kini,
og ginaꞌ in,
og bangsa Kanaan.
11 Sumunuꞌ si Lebi bug mga gumbataꞌ in nog laki,
siloꞌ Gerson,
Kohat bu si Merari.
12 Doksuꞌ si Yahud bug mga gumbataꞌ in nog laki,
yonin na siloꞌ Sela,
Peres bu Sera.
Ongon pa og bataꞌ ni Yahud duwaꞌ kotow nong minatoy sok Kanaan,
yonin na si Er bu si Onan.
Og gumbataꞌ ni Peres,
yonin na siloꞌ Hesron bug si Hamul.
13 Tubus si Issakar bug mga gumbataꞌ in nog laki,
siloꞌ Tola,
Puwa,
Yasub bu Simron.
14 Doksuꞌ si Sebulun bug mga gumbataꞌ in nog laki,
siloꞌ Sered,
Elon bu Yaleel.
15 Ilon na koyon ong mga ponupuꞌ ni Yaꞌkub nog laki tidu sog libunin nok si Leya.
Binataꞌ ilon koyon sok Paddan Aram sampoy si Dina,
og bataꞌ nilon nog libun.
Simaut tolu puluꞌ bu tolu og lam nok ponupuꞌ ni Yaꞌkub tidu ni Leya.
16 Tubus si Gad bug mga gumbataꞌ in nog laki,
yonin na si Sipiyon,
Haggi,
Suni,
Esbon,
Eri,
Arodi bu si Areli.
17 Sumunuꞌ si Aser bu ong mga gumbataꞌ in nog laki,
yonin na si Imnah,
Iswa,
Iswi,
Beria bug gilug nilon nog libun yonin na si Sera.
Ong mga gumbataꞌ ni Beria nog laki,
yonin na si Heber bu si Malkiel.
18 Na ilon na koyon ong mga ponupuꞌ ni Yaꞌkub nog laki tidu ni Silpa,
ok sosuguon nog libun nog binogoy ni Laban sog bataꞌ in nok si Leya.
Simaut sopuluꞌ bu nom og dakol nilon kotanan.
19 Na ong mga gumbataꞌ ni Yaꞌkub nog laki sog libunin nok si Rakiya,
yonin na si Yusup bu si Benhamin.
20 Ong mga gumbataꞌ ni Yusup sog libunin nok si Asenat,
binataꞌ song Misir,
yonin na si Manasse bu si Eprayim.
Si Asenat kini,
og bataꞌ nog gimam nok si Potipera sog bonuwa On.
21 Ong mga gumbataꞌ ni Benhamin nog laki,
yonin na siloꞌ Bela,
Beker,
Asbel,
Gera,
Naaman,
Ehi,
Ros,
Muppim,
Huppim bu si Ard.
22 Yonin na koyon ong mga ponupuꞌ ni Yaꞌkub nog laki tidu sog libunin nok si Rakiya.
Sopuluꞌ bu pat ilon kotanan.
23 Doksuꞌ si Dan bug bataꞌ in nog laki nok si Husim.
24 Sumunuꞌ si Naptali bug mga gumbataꞌ in nog laki,
yonin na siloꞌ Yaseel,
Guni,
Yeser,
bu si Sillem.
25 Ilon na koyon ong mga ponupuꞌ ni Yaꞌkub nog laki tidu ni Bilha,
ok sosuguon nog libun nog binogoy ni Laban sog bataꞌ in nok si Rakiya.
Simaut pitu kotow og dakol nilon kotanan.
26 Ongon nom puluꞌ bu nom og dakol nok ponupuꞌ ni Yaꞌkub nong mikopogunut song Misir,c
liyu song mga libun nog gumbataꞌ in.
27 Bu ongon asal og duwaꞌ kotow nog bataꞌ ni Yusup binataꞌ song Misir.
Dadi pitu puluꞌ kotow ilon dituꞌ song Misir.
Ok Pogdatong niloꞌ Yaꞌkub sog Gosen
28 Na piuna ni Yaꞌkub og bataꞌ in nok si Yahud dituꞌ ni Yusup,
poꞌ mokilumpak yanin sog bonuwa Gosen.
29 Dadi simakoy si Yusup sok korumata nin bangka nin lumpakoy og gommaꞌ in sog Gosen.
Na pogdatongin diyon,
kinokopin og gommaꞌ in,
bu migaduyan yanin.
30 Taluꞌ ni Israel ni Yusup,
“Ningkomun bisan matoyu na,
poꞌ mitongowu na nok totubuꞌ a da.”
31 Doksuꞌ nituꞌ taluꞌ ni Yusup song mga koiluganin bu sog lam nong migunut sog gommaꞌ in,
“Mangoyu pa ni Pirꞌawn poꞌ suksugan ku yanin nong minatong amu na dini tidu sok Kanaan.
32 Posunan ku si Pirꞌawn nong mogogipat amu nong mga potubuon,
bu inoyit niyu og lam nok tumpukan nog bilibili,
kambing bug sapiꞌ niyu bug lam nong mga gartaꞌ niyu.
33 Bilaꞌ potawagon amu ni Pirꞌawn bu moksak diniyu bug olo og gusaha niyu,
34 taluan niyu nong mamaꞌ amu da nong mga mokogulang niyu.
Mogogipat amu da sop nong mga potubuon tidu sok kobikaan niyu.
Na bilaꞌ maꞌ nituꞌ,
poonongonin amu dini sog Gosen poꞌ mompok ong mga tow Misir song mga mogogipat nong mga potubuon.”