Ponognaan 45

Mikpokilala si Yusup song mga Gilugin

Na diꞌ na kosandalan ni Yusup ok porossahanin sog gadapan nong mga sosuguonin, dadi tinaluanin ilon. “Pongawaꞌ amu!” Dangan ilon-ilon dona nong mga gilugin, mikpokilala na yanin. 2 Migaduy nong mopagas si Yusup, sampoy song midongog nong mga tow diyon, bu midongog dituꞌ sog gastanaꞌ ni ok pasal niyon. 3 Taluꞌ ni Yusup song mga gilugin, “Akon kini si Yusup. Totubuꞌ pa taꞌ saan si Ommaꞌ?” Dangan midongog nong mga gilugin ok taluꞌ in, daꞌ ilon pokopoktaluꞌ poꞌ kitokkowan ilon kobalan nog gondok. 4 Na miktaluꞌ si Yusup dinilon, “Pokpolani amu dinakon.” Dadi mikpolani ilon. Taluꞌ ni Yusup, “Akon og gilug niyu nok si Yusup, ok piksaluy niyu song Misir. 5 Diꞌ amu mosusa bu ondiꞌ niyu taksilon og lawas niyu nok piksaluy niyu akon. Poꞌ ok Tuhan ong mikpangoy nakon dini. Piuna nin akon tidu diniyu bagun kotabangan ok kotubuꞌ nong modakol nong manusiyaꞌ.

6 Duwaꞌ tahun na ong miniyan nok ponggutom, bu ongon pa ok sumunud nog lima tahun nog daꞌdun pokpomula bu ponggani. 7 Piuna u dini nok Tuhan tidu diniyu bagun amu kotabangan tidu sog gutom bagun ongon ong mosamaꞌ nok ponupuꞌ niyu sog dunya. 8 Kanaꞌ amu ong mikpangoy nakon dini, sugaid ok Tuhan. Inimungin akon nong mokpopituwa ni Pirꞌawn bug kounutan nog lam nok ponindogin bu sog bonuwa Misir. 9 Na pogdaliꞌ amu na muliꞌ dituꞌ ni Ommaꞌ, taluꞌ niyu diyanin, Maꞌ nini ok tinaluꞌ nog bataꞌ nu nok si Yusup. ‘Inimungu nok Tuhan nok kounutan sog bonuwa Misir. Dadi angoya dini dinakon nong mosompun. 10 Dini a na pogonong sog bonuwa nog Gosen molani dinakon. Oyit nu dini og gumbataꞌ nu, koapuan nu, mga potubuon nu bug lam nog gartaꞌ nu. 11 Bilaꞌ diyon amu na sog Gosen, akon na ong moggastu diniyu, poꞌ lima tahun pa og bon nok ponggutom kini. Diꞌ u meleg nok kogutoman amu bug mga potubuon niyu.’ ” 12 Miktaluꞌ pa si Yusup, “Mitongow niyu na kotanan, sampoy na ika Benhamin nog akon na tokodoy og gilug niyu nok si Yusup. 13 Na suksugan niyu si Ommaꞌ nok pasal sok kowasa u dini song Misir, bug lam nong mitongow niyu dini. Pogdaliꞌ amu, bangka niyu yanin oyit dini.”

14 Doksuꞌ nituꞌ kinokop ni Yusup ong mongudin nok si Benhamin bangka yanin pogaduy, bu kimokop da sop si Benhamin diyanin bu migaduy. 15 Na pingalokan ni Yusup og lam nok koiluganin dunut gaduyin. Tubus inabit-abit yanin nok koiluganin.

Piangoy ni si Yaꞌkub song Misir

16 Dangan midongog ok suksugan dituꞌ sog gastanaꞌ ni Pirꞌawn nong minatong ong mga gilug ni Yusup, migloliyag si Pirꞌawn bug mga ponindogin. 17 Miktaluꞌ si Pirꞌawn dituꞌ ni Yusup, “Taluan nu ong mga gilug nu nog lulanan nilon na ong mga nilon bagun ilon mokopuliꞌ sok . 18 Poalap nu dinilon og gommaꞌ nu bug mga libun-bataꞌ nilon, bangka nu ilon populiꞌ dini. Bogoyan ku ilon nog lupaꞌ nong mosubuk dini song Misir bagun mokokan ilon nong mobais nok songkuꞌ. 19 Suguꞌ nu ong mga gilug nu nong mogoyit ilon nong mga tidu dini posunguꞌ sok Kanaan, bagun ongon kosakoyan nong mga libun-bataꞌ nilon bug gommaꞌ nu. 20 Diꞌ na ilon mosusa bug ongon og gartaꞌ nilon nong mobagak, poꞌ bogoyon ku da dinilon og olo-olo nong mobais dini song Misir.”

21 Na inunut kini nong mga gumbataꞌ ni . Binogoyan ilon ni Yusup nong mga korumata, mamaꞌ na nok tinaluꞌ ni Pirꞌawn, bu pibalunanin ilon nok kan nilon sok popanowan. 22 Binogoyan da sop ilon ni Yusup nog gamis mohalgaꞌ. Tibuwa ong ni Benhamin, lima buk gamis og binogoyin dun bu tolu gatus tibuk . 23 Pioyitan sop ni Yusup og gommaꞌ in sopuluꞌ buk kudaꞌ himar nong miponuꞌ nog ginis-ginisan nong mokobais nog lulan tidu song Misir, bu sopuluꞌ buk kudaꞌ himar nog libun, miponuꞌ sop nog lulan nog , pan bug mga ginisan nok kan, balunon nog gommaꞌ in sok popanowan.

24 Doksuꞌ nituꞌ pipanow na ni Yusup ong mga gilugin, bu tinaluanin ilon, “Diꞌ amu moksuwal-suwal sog dalan.” 25 Dadi ginumonat na ilon tidu song Misir bangka ilon uliꞌ sok Kanaan dituꞌ sog gommaꞌ nilon.

26 Pogdatong nilon sok Kanaan, tinaluan nilon mogdayun og gommaꞌ nilon, long nilon, “Ommaꞌ, totubuꞌ doma saan si Yusup! Yanin ok kounutan ningkomun sog bonuwa Misir.” Na mitongngang si Yaꞌkub, bu diꞌ yanin mokotombaꞌ. 27 Sugaid, dangan midongogin og lam nok pimilin ni Yusup kituꞌ, bu mitongowin ong mga korumata nok pioyit ni Yusup sakoyanin posunguꞌ song Misir, miksibais ok porossahanin. 28 Taluꞌ ni Yaꞌkub, “Tumombaꞌ u na, og bataꞌ u nok si Yusup totubuꞌ dodaꞌ. Na mangoyu dituꞌ tumontong diyanin sog diꞌ u pa matoy.”