Ponognaan 44

Ok Tasa ni Yusup^a

Na sinuguꞌ ni Yusup ok sosuguonin, taluꞌ in, “Ponuꞌ nu og lam nok kadut nilon koyon nog toktob song moyit nilon. Bu uliꞌ nu ok sin nilon koyon sok kadut nilon kokoniya. 2 Doksuꞌ botang nu ok tasa u nok sok kadut nok kinomongudan, sampoy ok sin nok pigbayadin.” Na inunut nok sosuguon kituꞌ og lam nok tinaluꞌ ni Yusup.

3 Pogdoliꞌ-ondow, piuliꞌ na ong mogilug dunut nok nilon. 4 Sugaid sog daꞌ pa ilon tagad pokopolayuꞌ sok siyudad, miktaluꞌ si Yusup sok pingandolanin, “Pogdaliꞌ a, gonat nu ong mga tow kituꞌ. Bilaꞌ mosaut nu, taluoy nu, ‘Manu doksuꞌ amu bogoyoy nok kobaisan, ok pinungbas niyu ok kolaatan ma? 5 Manu dinakow niyu ma ok tasa silber nog gamu u? Yonin pa sop koyon ok tasa nok poginumanin bu pongutikaanin. Molaton tokodoy og ginang niyu kini.’ ”

6 Na dangan misautin ilon, tinaluꞌ in nilon mamaꞌ nok suguan diyanin. 7 Dadi ok tabal nilon sok tow kini, “Tuwan, manu mikopoktaluꞌ a ma nong mamaꞌ niyon? Polosili, diꞌ ami mga sosuguon nu kini mokoinang nong mamaꞌ niyon. 8 Kiosunan nu da sop ok sin nong mibalak nami sok kadut nami kituꞌ, inoyit nami da mokpuliꞌ dini tidu sok bu inuliꞌ nami da dinika. Manu intoman nu ma ami monakow nok silber atawa bulawan sog baloy nog gamu nu? 9 Bilaꞌ motongow nu ok tasa silber tidu sok solokotow dinami, na sumboy yanin patoyon, bu imung nu ami nog nog gamu nu.” 10 Taluꞌ nok sosuguon ni Yusup, “Mobais na, sugaid og imungon ku nog gulipon, ok tow hadja nong minalap nok tasa kituꞌ, og duma mogdadi da muliꞌ.” 11 Na migdaliꞌ-daliꞌ mokpoponog ok sosolokotow nok kadut nilon, bangka nilon ukadoy.

12 Dadi pinglungkal nok sosuguon ni Yusup ong mga kadut nok sosolokotow, tinagnaan tidu sog gulang bataꞌ mangoy sok komongudan. Na mitongow ok tasa silber sok kadut ni Benhamin. 13 Dadi ginodit nilon mogdayun og dogdoy nilon pasal sog landuꞌ nok kosusahan nilon. Linulan nilon mokpuliꞌ ong mga goyit nilon song mga kudaꞌ himar, bangka ilon pokpuliꞌ sok siyudad.

14 Pogdatong ni Yahud bug gilugin sog baloy ni Yusup, diyon pa si Yusup. Na simudjud og lam nilon diyanin. 15 Doksuꞌ tinaluan ilon ni Yusup, “Manu ininang niyu ma ong mamaꞌ niyon? Daꞌ niyu taꞌ kosunoy nog daꞌdun ong mobuni dinakon poꞌ mogutikaꞌ u?” 16 Taluꞌ ni Yahud, “Tuwan, daꞌdun na ong motaluꞌ nami. Diꞌ nami na kosunan bug ponoy ok pokpotampal nami dinika nok kosobonnalan. Yonin na kini ok tumbas nok Tuhan sog nami. Na ningkomun, gulipon nu na ami kotanan, kanaꞌ hadja ok kitongowan nok tasa silber kituꞌ.” 17 Taluꞌ ni Yusup, “Polosili, diꞌ u koyon moinang. Ok tow hadja nok kitongowan nok tasa silber og imungon ku nog gulipon, sugaid amu kotanan luwal diyanin, mogdadi na muliꞌ nong mosannang sog gommaꞌ niyu.”

Inabit-abit ni Yahud si Yusup pasal ni Benhamin

18 Dadi mikpolani si Yahud dituꞌ ni Yusup, ok taluꞌ in, “Tuwan, ampun nu dona akon. Melegu mogabit-abit dinika, diꞌ a dona mogboluꞌ sok sosuguon nu kini poꞌ mamaꞌ a na ni Pirꞌawn song . 19 Maꞌ nini tuwan, sinakan nu ami sibon bug ongon pa taꞌ og gommaꞌ nami bug gilug nami nog laki. 20 Ok tabal nami dinika, ongon pa og gommaꞌ nami, sugaid mogulang na, bu ongon pa solokotow mongud nami nog laki, nog binataꞌ nong mogulang na si Ommaꞌ. Kolasahan yanin ni Ommaꞌ bu sala-sala nin dona totubuꞌ tidu sog len ginaꞌ, poꞌ og gilugin minatoy na. 21 Doksuꞌ miktaluꞌ a dinami nog oyiton nami yanin dinika bagun nu yanin motongow. 22 Ok tabal nami dinika, diꞌ yanin mogdadi mosuwoy sog gommaꞌ nami, poꞌ bilaꞌ moksuwoy ilon, insunoy matoy si Ommaꞌ. 23 Sugaid tinaluan nu ami nog diꞌ ami mogdadi mokpotongow dinika bilaꞌ diꞌ nami moyit ok komongudan nami diyon dinika.

24 Na dangan mikuliꞌ ami sog gommaꞌ nami nog yanin da sop ok sosuguon nu, pisampoy nami diyanin ok tinaluꞌ nu dinami, Tuwan. 25 Doksuꞌ nituꞌ tinaluan ami nog gommaꞌ nami nong mokpuliꞌ ami dini sumaluy nok kan bisan dona mikaan. 26 Ok tabal nami diyanin, ‘Diꞌ ami mokopuliꞌ dituꞌ mokpotongow sok tow kituꞌ, bug diꞌ nami moyit ok komongudan nami.’ 27 Na tinaluan ami nog gommaꞌ nami, taluꞌ in, ‘Kiosunan niyu da sop nog duwaꞌ kotow da og bataꞌ u tidu sog libun ku nok si Rakiya. 28 Ok solokotow mibolong na tidu dinakon, bu tinumombaꞌ u nog ginodit-godit yanin nog binatang talun, poꞌ daꞌ u na yanin kotongow mokpuliꞌ tidu sok kawaꞌ in dini. 29 Na bilaꞌ oyiton niyu ong mongudin kini, bu ongon ong mokomula dun, bogoyan niyu na sop akon nok kosusahan nong mokopatoy na dinakon poꞌ mogulangu na.’

30 Dadi Tuwan, diꞌ ami mokopuliꞌ sog gommaꞌ nami nog diꞌ nami moyit og bataꞌ, poꞌ og bataꞌ koyon sukpat nog gumul nog gommaꞌ nami. 31 Na bilaꞌ motongow ni Ommaꞌ nog daꞌ pokunut og bataꞌ, tantu matoy yanin nok kosusahan nong mobogoy nami diyanin, mogulang na pa sop yanin. 32 Bu inakuhan ku ni Ommaꞌ nog akon, ok sosuguon nu, ong mogoyit nog bataꞌ koyon, taluꞌ u diyanin, ‘Ommaꞌ, bilaꞌ diꞌ u yanin moyit mokpuliꞌ dini dinika, susunan nu akon sog bon ku totubuꞌ.’ 33 Dadi Tuwan, pongonihon ku dinika, akon na hadja ong mokpoulipon dinika gantiꞌ nong mongudu. Podunut nu na yanin busung-busung song mga gilugu muliꞌ. 34 Ponoy ok kopuliꞌ u dituꞌ ni Ommaꞌ bug diꞌ mokopogunut dinakon ong mongudu? Diꞌ u mokotatas moktontong ni Ommaꞌ nong mokkosusahan.”