Ponognaan 43

Ok Pogunut ni Benhamin song Misir

Na limanduꞌ ok ponggutom sog bonuwa . 2 Dangan mitipot na og nong misaluy nilon song Misir, miktaluꞌ og gommaꞌ nilon nok si song mga gumbataꞌ in, “Angoy amu puliꞌ song Misir sumaluy nok kan, bisan dona mikaan.” 3 Sugaid taluꞌ ni Yahud diyanin, “Mingibut-ngibut tokodoy ok tow kituꞌ dinami nog diꞌ ami mogdadi mokpotongow diyanin bilaꞌ diꞌ nami moyit ok komongudan nami. 4 Na bilaꞌ podunuton nu dinami ok komongudan nami, mokpuliꞌ ami dituꞌ bagun sumaluy nok kan. 5 Sugaid bilaꞌ diꞌ nu yanin podunuton, na diꞌ ami mangoy dituꞌ, poꞌ asal ami tinaluan nok tow kituꞌ, nog diꞌ ami mogdadi mokpotongow diyanin bilaꞌ diꞌ nami moyit ong mongud nami.” 6 Taluꞌ ni Israel, “Manu tinaluan niyu pa ma nog ongon pa og len nog gilug niyu? Manu bogoyan niyu ma tokodoy akon nong mosolag nok kosusahan?” 7 Ok tabal nilon, “Sinusut tokodoy nok tow kituꞌ ok pasal ta niyu, bu sinakin ami bug totubuꞌ pa taꞌ og gommaꞌ nami, bu bilaꞌ ongon pa taꞌ muwal og gilug nami. Na sumboy tabalon nami og lam nok sakin. Sima buwan ong mongniyat nong moktaluꞌ yanin nog, ‘Oyit niyu dini og gilug niyu?’ ” 8 Taluꞌ ni Yahud sog gommaꞌ in, “Poyit nu dinakon og bataꞌ bagun mokopanow ami na mogdayun sumaluy nok kan, bagun diꞌ ita niyu matoy nog gunus. 9 Poglillaꞌ u ong nyawa u para sog bataꞌ koyon, bu akon ong mongatas diyanin. Na bilaꞌ diꞌ u yanin moyit mokpuliꞌ dini dinika nok totubuꞌ, susunan nu akon sog bon ku totubuꞌ. 10 Bilaꞌ daꞌ ami da bosiya kobonoy mogbagad dinika, duwaꞌ kali ami na bayuꞌ in pokopuliꞌ dituꞌ.” 11 Na miktaluꞌ og gommaꞌ nilon, nok si Israel, “Na bilaꞌ maꞌ nituꞌ, panow amu na. Pogoyit amu nong molumpak-lumpak nok tow kituꞌ, og olo-olo nong mobais sog bonuwa ta kini bisan dona mikaan, mga pokpomut, tonob, palapala, komanyan bug ginisan nong mga maniꞌ. 12 Poduwaꞌ kali niyu ok sin niyu kituꞌ tagnaꞌ nong mitongow niyu sok kadut niyu poꞌ sumboy ulion niyu. Kalu-kalu milapang. 13 Oyit niyu sop ong mongud niyu, bangka amu angoy mokpuliꞌ sok tow kituꞌ. 14 Bung mayan duhulan amu nok Tuhan Mokowasa bu lumolat da bosiya ok kounutan kituꞌ diniyu bagun populionin si Simeon bu si Benhamin. Sugaid bilaꞌ mobolong na ilon dinakon, na ok Tuhan na ong mokosun.”

15 Dadi migoyit ilon nong mga molumpak-lumpak, bu dinuwaꞌ kali sop nilon ok sin nilon, bangka ilon angoy song Misir dunut ni Benhamin. Doksuꞌ minadap ilon dituꞌ ni Yusup. 16 Dangan mitongow ni Yusup nong migunut dinilon si Benhamin, sinuguꞌ in mogdayun ok pingandolanin nog baloyin, “Oyit nu ong mga tow koyon sog baloyu, bangka a poksumbaliꞌ nok potubuon. Doksuꞌ polutuꞌ nu, poꞌ moglotu-ondowan ami.” 17 Tinombaan nok sosuguon ok tinaluꞌ ni Yusup diyanin. Dadi inoyitin ong mga mogilug sog baloy ni Yusup.

18 Na miondok ong mogilug dangan posunguꞌ ilon sog baloyin. Taluꞌ nilon, “Kalu-kalu inoyit ita dini pasal sok sin nok pipuliꞌ sok kadut ta sok tagnaꞌ ta mangoy dini. Insunoy mongalap-sabap yanin dun, saggowonin ita, bangka ita imungoy nog bu alapon ok ta.”

19 Dangan diyon na ilon sog bongowan nog baloy, inabit-abit nilon ok sosuguon ni Yusup, taluꞌ nilon, 20 “Tuwan, ongon ok kolegan nami suksugon dinika. Mikangoy ami dini insan simaluy nok kan. 21 Na sok poguliꞌ nami linumotaꞌ ami mogulabung sog dalan. Doksuꞌ migukad ami kokoniya nok kadut nami bu mitongow nami ok sin nok pigbayad nami sog diyalom kadut bu daꞌ pa kokulangoy. Dadi inoyit nami dini mokpuliꞌ ok sin kituꞌ. 22 Migoyit ami da sop nog len nok sin nok ponaluy nami nok kan. Daꞌ nami kosunoy bug sima ong migbotang dun sog diyalom nok kadut nami.” 23 Taluꞌ nok pingandolan, “Diꞌ amu mosusa, bu diꞌ amu mondok. Binogoy kituꞌ nok Tuhan niyu, yonin na ok Tuhan nog gommaꞌ niyu. Mitabuku ok sin nok pigbayad niyu.”

Doksuꞌ inoyitin si Simeon dinilon. 24 Na inoyit na sumolod nok sosuguon ong mga mogilug sog baloy ni Yusup, bangka ilon bogoyoy nok tubig pongugas nog botis nilon. Binogoyan sop nok kan ong mga kudaꞌ himar nilon. 25 Soliyan nilon mogbagad nok poguliꞌ ni Yusup nog lotu-ondow, piluwas na nilon og inoyit nilon nog lolumpakan ni Yusup, poꞌ midongog nilon nog diyon ilon pokanoy.

26 Dangan minatong si Yusup sog baloy, binogoy nilon na ong mga lolumpakan nog inoyit nilon, doksuꞌ simudjud ilon kotanan sog gadapanin. 27 Na sinakan ilon ni Yusup bug moolo-olo na taꞌ ilon, bu miksak pa sop yanin, “Moolo-olo na og gommaꞌ niyu nok tinaluꞌ niyu kituꞌ nong mogulang na, totubuꞌ pa taꞌ yanin?” 28 Ok tabal nilon, “Og gommaꞌ nami, nok sosuguon nu, totubuꞌ pa, bu molasig pa.” Doksuꞌ rinumukuꞌ ilon.

29 Dangan mitongow ni Yusup og gilugin nok si Benhamin, miksak yanin, “Yanin taꞌ kini ok kinomongudan niyu nok tinaluꞌ niyu dinakon?” Doksuꞌ tinaluanin si Benhamin, “Bung mayan bogoyan ka nok Tuhan nok kobaisan.” 30 Na migdaliꞌ-daliꞌ si Yusup mawaꞌ diyon poꞌ kaduyon na tokodoy yanin kobalan nok pinglowanin song mongudin. Sinumolod yanin sog bilikin bangka yanin pogaduy. 31 Doksuꞌ mingulaup yanin, bangka luwas. Sinandalanin ok porossahanin bangka yanin poksuguꞌ mogbotang nok kan.

32 Dadi binotangan na nok kan si Yusup sala-sala nin sog lomisahan, bu ong mga gilugin sog len lomisahan, bu ong mga tow Misir sog len lomisahan, poꞌ mopok sumalu kuman ong mga tow Misir song mga tow . 33 Na piingkud ni Yusup ong mga gilugin sog lomisahan piadap diyanin, piksunud-sunud tidu sog gulang bataꞌ mangoy song mongud. Miktinontongoy ilon mogilug, bu misobuꞌ ilon sok pogingkud nilon koyon. 34 Binotangan ilon nok kan tidu sog lomisahan ni Yusup. Sugaid ok kan nog binotang dituꞌ ni Benhamin, lima kalihon og dakolin tidu sok kan nong mga gilugin. Doksuꞌ miginum-inum ilon dunut pogloliyag nilon.