Ponognaan 42

Ok Pokpanow nong mga Gilug ni Yusup^a

Dangan kiosunan ni Yaꞌkub nog ongon ok poksaluy nog dituꞌ song , tinaluanin og gumbataꞌ in nog laki, “Poglilow amu na! 2 Midongogu nog ongon ok poksaluy nog bunga tirigu dituꞌ song Misir. Angoy amu dituꞌ saluy bagun diꞌ ita matoy nog gunus.” 3 Dadi mipanow ok sopuluꞌ kotow nog gilug ni Yusup posunguꞌ song Misir bagun sumaluy nog bunga tirigu. 4 Sugaid daꞌ da podunutoy ni Yaꞌkub si Benhamin, ong mongud ni Yusup, poꞌ mondok yanin insunoy mongmula dituꞌ. 5 Dadi minatong na ong mga gumbataꞌ ni Yaꞌkub bug duma nong mga tow song Misir bagun sumaluy nog bunga tirigu, poꞌ miglanduꞌ na ok ponggutom sog bonuwa .

6 Pagga si Yusup na ong miimung nog ikoduwaꞌ nok kounutan song Misir, yanin ong mogbayaꞌ mogdagang nong mga kan song mga tow. Dadi pogdatong nong mga gilug ni Yusup, simudjud ilon kotanan diyanin. 7 Dangan mitongow ni Yusup ok koiluganin, kiilalahanin ilon mogdayun, sugaid ok pogoyitin dun mamaꞌ nog diꞌ in kolilahan. Ginapisan pa ilon ni Yusup, taluꞌ in, “Ayin amu tidu?” Tinumabal ilon, “Tidu ami sok Kanaan, minangoy ami dini sumaluy nok kan.”

8 Kiilalahan ni Yusup ok koiluganin, sugaid daꞌ ilon pokokilala diyanin. 9 Na mipondom ni Yusup ong mga toginopin pasal song mga gilugin koyon, dadi tinaluanin ilon, “Amu koyon migogumatiꞌ. Minangoy amu hadja dini sog bonuwa nami bagun tontongon bug ayin dapit ong molomu solodon.” 10 Ok tabal nilon, “Kanaꞌ Tuwan, sugaid ami kini mga sosuguon nu. Minangoy ami dini sumaluy nok kan. 11 Og lam nami kini mogilug sok solobuk gommaꞌ, kopongandolan ami. Motud ok tinaluꞌ nong mga sosuguon nu kini, ondaꞌ ami pogogumatiꞌ.” 12 Taluꞌ ni Yusup dinilon, “Kanaꞌ. Minangoy amu dini poꞌ tontongon niyu pahatul og bonuwa nami bug ayin dapit ong molomu solodon.” 13 Sugaid ok tabal nilon, “Ami kini mga sosuguon nu, sopuluꞌ bu duwaꞌ kotow mogilug. Solobuk da og gommaꞌ nami, dituꞌ yanin migonong sok Kanaan. Og gilug nami nong mongud, dituꞌ da sog gommaꞌ nami binagak, bu ok solobuk gilug nami daꞌ diya na.” 14 Ok tabal ni Yusup, “Mamaꞌ na nok tinaluꞌ u diniyu nong migogumatiꞌ amu. 15 Sugaid tontongon ta bug motud taꞌ ok tinaluꞌ niyu dinakon. Oyit niyu dini ong mongud niyu. Bilaꞌ diꞌ niyu moyit dini, song ngalan ni , diꞌ amu mokawaꞌ dini. 16 Puliꞌ niyu ok solokotow diniyu malap nog gilug niyu, sugaid amu pirisuhon bagun kosunan ku bug motud taꞌ ok tinaluꞌ niyu. Bilaꞌ kanaꞌ, song ngalan ni Pirꞌawn, motud nong migogumatiꞌ amu.”

17 Doksuꞌ pinirisu nin og lam nilon sog diyalom nok tolu ondow. 18 Pogdopot nog ikotolu ondow, inabit-abit ilon ni Yusup, ok taluꞌ in, “Akon kini ok tow nong migogondok sok Tuhan. Diꞌ u amu patoyon bilaꞌ inangon niyu ok suguan ku. 19 Bilaꞌ motud da nong mobais og gawoy niyu, na solobuk hadja tidu diniyu ong mobagak sok pirisuhan. Ok kodakolan niyu koyon mogdadi na muliꞌ mogoyit nong mga kan bagun ong mga libun-bataꞌ niyu diꞌ moksandal nog gutom. 20 Sugaid sumboy oyiton niyu dini dinakon ok komongudan niyu bagun ku kosunan nong motud ok tinaluꞌ niyu dinakon, bu bagun diꞌ ta amu popatoy.” Na meleg ilon sog gisun ni Yusup. 21 Doksuꞌ taluꞌ nok kokoniya, “Na yonin kini ok tumbas nog ininang ta sog gilug ta niyu kituꞌ. Mitongow ta niyu tokodoy ok kosigpitanin sog waktu nong mikilolat yanin dinita, sugaid daꞌ ta niyu yanin tabangoy. Saan na maꞌ nini ok sigpit ta ningkomun.”

22 Na taluꞌ ni Ruben, “Saan na miktaluꞌ u diniyu, nog diꞌ niyu binsanaon og bataꞌ, sugaid daꞌ amu tombaꞌ. Na ningkomun tinungbasan ita niyu na sok pokpatoy diyanin.” 23 Ondaꞌ nilon kosunoy nong misabut ni Yusup ok pigabit-abitan nilon, poꞌ ongon ong mogogubad. 24 Dangan midongog ni Yusup ok pigabit-abitan nilon, minawaꞌ yanin song mga gilugin, bangka yanin pogaduy. Doksuꞌ mikpuliꞌ da yanin moktaluꞌ dinilon. Ok pibagakin si Simeon bangka nin ikotoy sog gadapan nilon.

25 Pogdoksuꞌ nituꞌ piungodan ni Yusup ok kotanan nok kadut nilon nog , bu pipuliꞌ in ok sin nog binayad nilon. Pibotangin sog diyalom nok kadut nok kokoniya, bangka pa pobalunoy nok kan sok panowan nilon posunguꞌ muliꞌ. Miunut ok kolegan ni Yusup. 26 Dadi linulan na nong mga mogilug sok nilon, bangka ilon panow.

27 Dangan kigobihan ilon sok solobuk bonuwa, inukad nok solokotow dinilon ok kadutin, poꞌ pokanonin ok kudaꞌ himarin. Pogukadin dun, mitongowin mogdayun ok sinin. 28 Na tinawagin ong mga gilugin, taluꞌ in, “Tontong niyu, inuliꞌ dini sog diyalom kadut ok sin ku.” Dadi misobuꞌ, ilon bu mingongkog ilon kobalan nog gondok, taluꞌ nilon, “Inolo ita niyu na kini nok Tuhan?”

29 Dangan minatong na ilon sok Kanaan, sinuksugan na nilon og gommaꞌ nilon sog lam nok kibiyan-biyanan nilon. 30 Taluꞌ nilon sog gommaꞌ nilon, “Ginapisan ami nog ikoduwaꞌ nok kounutan song Misir, bu inintomanin ami nong migogumatiꞌ sog bonuwa nilon. 31 Taluꞌ nami diyanin nog daꞌ ami pogogumatiꞌ. Kopongandolan ami nok tow. 32 Tinaluan nami sop yanin nok sopuluꞌ bu duwaꞌ kotow ami mogilug nog laki, salu ommaꞌ. Ok solokotow daꞌ diya na, bu ok kinomongudan binagak sok Kanaan dituꞌ sog gommaꞌ nami. 33 Ok tabal nok kounutan kituꞌ dinami, ‘Tontongon ku bug motud taꞌ ok taluꞌ niyu nok kopongandolan amu nok tow. Solokotow tidu diniyu sumboy mobagak. Og duma mogdadi na muliꞌ mogoyit nok kan nog libun-bataꞌ niyu bagun diꞌ ilon moksandal nog gutom. 34 Sugaid sumboy oyiton niyu dinakon ong mongud niyu. Bilaꞌ koyon moinang niyu, bangka u pa tombaꞌ nog daꞌ amu pogogumatiꞌ sog bonuwa nami, bu kopongandolan amu nok tow. Doksuꞌ poluwason ku na og gilug niyu, bu moluhaya amu na mokpanowan dini.’ ”

35 Na inudud nilon na og gungod nong mga kadut nilon, bu mitongow nok kokoniya sog diyalom kadut ok pinutus nok sin nilon. Dangan mitongow nilon ok sin, miondok og lam nilon sampoy og gommaꞌ nilon. 36 Miktaluꞌ si Yaꞌkub dinilon, “Kobalan niyu kobolongan ku na tibuwa nog bataꞌ. Daꞌ diya na si Yusup, daꞌ diya na sop si Simeon, bu ningkomun kolegan niyu oyiton na sop si Benhamin. Daꞌdun da ok kodoksuan nok kosusahan ku.” 37 Tinumabal si Ruben sog gommaꞌ in, “Pongandol nu si Benhamin dinakon, bu oyiton ku da yanin mokpuliꞌ dinika. Bilaꞌ diꞌ u yanin moyit muliꞌ, mogdadi nu patoyon og duwaꞌ kotow nog bataꞌ u nog laki.” 38 Ok tabal ni Yaꞌkub, “Diꞌ u podunuton diniyu og bataꞌ u, poꞌ og gilugin minatoy na, yanin dona ong misamaꞌ totubuꞌ. Na mogulangu na, bilaꞌ mongmula yanin sok popanowan, oyitan niyu na sop akon nok kosusahan nong mokopatoy na dinakon.”