Ponognaan 41

Minaanahan ni Yusup ok Toginop ni Pirꞌawn

Dangan duwaꞌ tahun na ong mikobiyan, miktoginop si Pirꞌawn nong minindog yanin sok kilid subaꞌ nong Nil. 2 Sunoy pa ongon ong mitongowin pitu buk sapiꞌ mokosubuk nog gimawon tidu sok subaꞌ, bangka ponoksab. 3 Daꞌ kobon ongon na sop ok pitu buk sapiꞌ nog landuꞌ pokolanggas gimawon tidu sok subaꞌ bangka pokpolani song mga sapiꞌ nong mokosubuk. 4 Doksuꞌ kinan nong mga sapiꞌ mokolanggas ong mga sapiꞌ nong mokosubuk. Taman dituꞌ ok toginop ni Pirꞌawn. Doksuꞌ mikotanud yanin.

5 Na mikotulug na sop si Pirꞌawn bangka poktoginop puliꞌ. Sog diyalom toginopin mikotongow yanin nok sopun paloy, pitu buk tangkoyin nong mosubuk bu mobais og linongowanin. 6 Ondaꞌ kobon, ongon na sop ok pun nok paloy linumuwas, pitu buk da sop ok tangkoyin nog landuꞌ kolanggas bu milawos sabap song minit nog galuꞌ tidu sok silangan. 7 Dadi ong mga tangkoy nong mokolanggas inuglon nilon ok tangkoy nong mokosubuk. Doksuꞌ mikotanud si Pirꞌawn bangka nin kosayuhoy nong miktoginop yanin.

8 Poksisolom misasow si Pirꞌawn, saan na pitawagin og lam nok polonontong bug mokokosun song . Pogdatong nilon, tinaluan na ilon ni Pirꞌawn pasal sok toginopin, sugaid daꞌdun tanan bisan solokotow dinilon ong mokomaana nok toginopin. 9 Na miktaluꞌ ok kounutan nong mga mokpopoinum diyanin kituꞌ, longin, “Ampun Pirꞌawn, mipondomu na og u tagnaꞌ. 10 Ongon og waktu nong milingita sok sosuguon nu kini bu sok kounutan nong mga mogogimung nok pan, bu pipirisu nu ami diyon sok kounutan nong moggogipat nog gastanaꞌ. 11 Solobuk gobi, miktoginop ami duwaꞌ, bu ok toginop nami, daꞌ pogbatuk ong maana nin. 12 Ongon og duma nami dituꞌ nok subul, og bangsa nin . Yanin koyon og nok kounutan nong mga sundalu moggogipat nog gastanaꞌ nu. Dadi sinuksug nami diyanin ong mga toginop nami, bu minaanahanin dinami. 13 Na miunut ok pogmaana nin nong mga toginop nami. Pipuliꞌ nu akon sog ginangu, bu ok kounutan nong mga mogogimung nok pan pibitin sok kayu.”

14 Na pitawag ni Pirꞌawn si Yusup sok pirisuhan, bu pigdaliꞌ-dalian nilon moyit lumuwas. Miktukung si Yusup bu miksalin yanin nok ponapot bangka angoy adap ni Pirꞌawn. 15 Taluꞌ ni Pirꞌawn ni Yusup, “Miktoginopu, sugaid daꞌdun ong mikomaana dun. Midongogu nong mokomaana a dow nok toginop.” 16 Ok tabal ni Yusup ni Pirꞌawn, “Ampun Pirꞌawn, kanaꞌ akon, sugaid ok Tuhan ong mokobogoy nong mobais nok pogmaana.”

17 Dadi sinuksug ni Pirꞌawn ok toginopin ni Yusup, taluꞌ in, “Sok toginopu, minindogu sok kilid subaꞌ nong Nil. 18 Bu mitongowu gimawon sok subaꞌ ok pitu buk sapiꞌ nong mokosubuk bangka ponoksab sok sigbotan. 19 Doksuꞌ nituꞌ ongon na sop og gimawon pitu buk sapiꞌ nong mokolanggas sok subaꞌ. Daꞌ u sibon pokotongow nong maꞌ nituꞌ kolaton nog bayuꞌ-bayuꞌ nok sapiꞌ sog bonuwa Misir. 20 Sokaliꞌ kinan nong mokolanggas nok sapiꞌ ong mikuna gimawon nong mokosubuk nok sapiꞌ. 21 Sugaid pogdoksuꞌ nilon kuman, mamaꞌ da ilon nog daꞌ pokokan, poꞌ lunsan tulan da ilon. Pogdoksuꞌ nituꞌ mikotanudu.

22 Na mikotulugu puliꞌ, bu miktoginopu na sop. Mikotongowu sopun nok paloy nok pitu buk ok tangkoyin, mosubuk bu mobais og linongowanin. 23 Doksuꞌ ongon na sop linumuwas ok pun paloy. Pitu buk da sop ok tangkoy nog landuꞌ kolanggas bu milawos sabap song minit nog galuꞌ tidu sok silangan. 24 Na inuglon nok tangkoy mokolanggas ok tangkoy nong mokosubuk. Sinuksugan ku na ong mga polonontong, sugaid daꞌdun bisan solokotow dinilon ong mikomaana dun.”

25 Tinaluan ni Yusup si Pirꞌawn, “Ok toginop nu koduwaꞌ, batuk da ong maana nin. Piosunan ka nok Tuhan bug olo ok podatongonin posunguꞌ. 26 Ok pitu buk sapiꞌ nong mokosubuk, bu ok pitu tangkoy nong mokosubuk nok paloy, migbatuk da, ong maana nilon pitu tahun. 27 Domikkiyan da sop ok pitu buk sapiꞌ nong mokolanggas, bug pitu tangkoy nok paloy mokolanggas bu milawos sabap sog galuꞌ, batuk da sop. Ong maana nin, sog diyalom pitu tahun ongon ok ponggutom. 28 Pirꞌawn, mamaꞌ na nok tinaluꞌ u kituꞌ dinika, pitongow dinika nok Tuhan bug olo ok posunguꞌ in podatongon. 29 Sog bon nok pitu tahun, sumongkuꞌ tokodoy ong mga pomulan sog liwag nog bonuwa Misir. 30 Tibuwa doksuꞌ nituꞌ sumunud og len nok pitu tahun nok ponggutom. Dadi kolingowan na nong mga tow og waktu nok sinongkuan ilon song Misir, poꞌ ok ponggutom mikobogoy nong mosolag nok kobinsanaan sog bonuwa. 31 Bu ok poksongkuꞌ nok pomulan, kolingowan na sabap song mosolag tokodoy nok ponggutom. 32 Saan na pitoginopa duwaꞌ kali nok Tuhan, bagun nu kosunan nok podatongonin tokodoy koyon nong mosompun. 33 Ampun Pirꞌawn, dadi ningkomun sumboy monontonga solobuk tow nong mopandoy bu modalom og gakkalin sog bonuwa Misir. 34 Pomiliꞌ a nong mga ponindog nong malap nok sobahagiꞌ tidu sog lima bahagiꞌ nong mga songkuꞌ nong mga tow. Poꞌ sog diyalom nok pitu tahun songkuan og bonuwa Misir. 35 Suguꞌ nu dinilon lumpukon og lam nog bahagiꞌ nong malap tidu sok songkuꞌ nong mga tow. Doksuꞌ taguon sog diyalom nong mga komalig ni Pirꞌawn song mga siyudad, bangka ipatoy. 36 Ong mga kan nong molumpuk koyon, podinsamaon para song mga tow bilaꞌ matong na ok pitu tahun nok ponggutom bagun diꞌ ilon matoy nog gunus.”

Miimung si Yusup nok Kounutan song Misir

37 Na kisuatan si Pirꞌawn bug mga ponindogin song mga ginang nong mipikil ni Yusup. 38 Taluꞌ ni song mga ponindogin, “Mokobalak ita pa taꞌ nok tow mamaꞌ nok tow kini nog diyon diyanin og ?” 39 Dadi taluꞌ ni ni Yusup, “Piosun dinika nok Tuhan og lam nini. Na daꞌdun na muwal ok tow nong modalom og gakkalin bu mopandoy mamaꞌ dinika. 40 Sumboy ika na ong momarinta sok piksultanan ku, bu og lam nong mga tow mogunut sok suguan nu. Akon da ong motas tidu dinika.” 41 Doksuꞌ miktaluꞌ si Pirꞌawn ni Yusup, “Ika ok popogbayaon ku sog liwag nong Misir.” 42 Dadi linuwas ni Pirꞌawn ok pinolokin nok poggamitonin moktatak, bangka nin posolugoy sok komot ni Yusup. Pisoluganin da sop si Yusup nog gamis nong mohalgaꞌ bu gantung liug nog bulawan. 43 Doksuꞌ pisakoyin si Yusup sog ikoduwaꞌ nong molingkat nok nin bu ongon sop ong mga miguna mokpoposun, taluꞌ nilon, “Sudjud amu!”

Dadi tidu dituꞌ, si Yusup na og ikoduwaꞌ nong migbayaꞌ sog bonuwa Misir. 44 Taluꞌ ni Pirꞌawn ni Yusup, “Akon ok Pirꞌawn, sugaid daꞌdun ok tow sog diyalom Misir ong mokopoginang nog olo-olo bug diꞌ pobiyanon dinika.”

45-46 Ginantian ni Pirꞌawn ong ngalan ni Yusup nok Sapenat-Paneya, bangka nin polibunoy ni Asenat, og bataꞌ ni Potipera, gimam sok siyudad nog On.

Migumul si Yusup tolu puluꞌ tahun sog waktu nong miktagnaꞌ yanin moginang ni Pirꞌawn, ok sultan song Misir. Dadi linumuwas yanin sog gastanaꞌ bangka nin libutoy og bonuwa Misir.

47 Na sog diyalom pitu tahun, sinumongkuꞌ tokodoy ong mga pomulan sog bonuwa Misir. 48 Dadi linumpuk ni Yusup og lam nog ikolima bahagiꞌ nong mialap tidu song mga songkuꞌ nong mga tow. Sok kada siyudad, dituꞌ tinaguꞌ ong mga bahagiꞌ nok pinggani tidu sog lumibutin. 49 Na modakol na tokodoy ong milumpuk nilon nog , mamaꞌ na nok pontad sok kilid dagat toktob ondiꞌ na motopong. Saan ondaꞌ na poksuguꞌ si Yusup nok topongon.

50 Sog daꞌ pa datong ok ponggutom, ongon na og bataꞌ ni Yusup duwaꞌ kotow nog laki sog libunin nok si Asenat, og bataꞌ ni Imam Potipera tidu sok siyudad nog On. 51 Iningalanan ni Yusup nong Manasse og bataꞌ in nog gulang bataꞌ, poꞌ taluꞌ in, “Sok tabang nok Tuhan, kilingowan ku og lam nok kologonan ku bu og gindowan ku sok salu baloyu.” 52 Bu ong mongud iningalanan ni Yusup nog Eprayim, poꞌ ok taluꞌ in, “Binogoyan ku nok Tuhan nong mga bataꞌ sog bonuwa nong mikobogoy nakon nok kobinsanaan.”

53 Na simaut na pitu tahun nok sinumongkuꞌ ong mga pomulan sog bonuwa Misir. 54 Mamaꞌ na nok tinaluꞌ ni Yusup timagnaꞌ na ok pitu tahun nok ponggutom. Dadi miongon ok ponggutom sog lam nok kobonuwahan, sugaid ongon da ok kan sog bonuwa Misir.

55 Dangan kitipotan nok kan ong mga tow Misir, mingoni ilon nok kan dituꞌ ni Pirꞌawn, bu tinaluanin ilon, “Angoy amu dituꞌ ni Yusup, bu inang niyu olo-olo ok taluonin.” 56 Na limanduꞌ na tokodoy ok ponggutom ayin-ayin sog bonuwa Misir, dadi pibukaꞌ ni Yusup og lam nok komalig nok piktaguan nong mga kan. Doksuꞌ piksaluyin song mga tow Misir. 57 Sampoy ong mga tow sog ayin-ayin bonuwahoy minangoy song Misir sumaluy nong mga kan dituꞌ ni Yusup. Poꞌ ok ponggutom miglanduꞌ na tokodoy sog ginlupaan.