Minaanahan ni Yusupa ok Toginop nog Duwaꞌ Kotow Pirisu
40
Na pogdoksuꞌ nituꞌ mikodusa ok kounutan nong mga mokpopoinum ni Pirꞌawn bu ok kounutan nong mga mogogimung nok panin.
2 Dadi milingit tokodoy si Pirꞌawn sog duwaꞌ kotow kini.
3 Pipirisu nin ilon sok pikpirisuhan da sop ni Yusup.
Ok pirisuhan koyon dituꞌ sog baloy nok kounutan nong mga sundalu mogogipat sog gastanaꞌ.
4 Sinaligan si Yusup nok kounutan nong mogogipat nok pirisuhan mogipat dinilon,
bu miobon ilon sok pirisuhan.
5 Ongon solobuk gobi miktoginop og duwaꞌ kotow nong mipirisu kituꞌ,
bu ondaꞌ pogbatuk ong maana nok toginop nilon.
6 Poksisolom minangoy si Yusup dinilon,
bu mitongowin nong misusa ilon.
7 Na sinakanin ilon,
taluꞌ in,
“Manu mamaꞌ ma nong misusa og bayuꞌ-bayuꞌ niyu sog gondow kini?”
8 Ok tabal nilon,
“Miktoginop ami kogobi,
sokaliꞌ daꞌdun ong mokomaana nok toginop nami.”
Taluꞌ ni Yusup,
“Sala-sala da nok Tuhan ong mokomaana nok toginop.
Busung-busung,
suksug niyu dinakon.”
9 Na sinuksug nok kounutan nong mga mokpopoinum ni Pirꞌawn ok toginopin,
taluꞌ in,
“Sog diyalom toginopu mikotongowu sopun nog anggul sog gunahan ku.
10 Tolu buk ok panga nin.
Dangan mingigbus na,
migbulak mogdayun,
bu daꞌ kobon migbunga bangka kinug.
11 Na og basu ni Pirꞌawn dini sok komotu.
Dadi mingupuꞌ u nog bunga nog anggul bangka u poggaoy sog basu kituꞌ,
doksuꞌ binogoyu ni Pirꞌawn.”
12 Dadi miktaluꞌ si Yusup,
“Maꞌ nini ong maana nin:
Ok tolu buk sanga kituꞌ,
tolu ondow.
13 Sog diyalom nok tolu ondow,
poluwason ka ni Pirꞌawn sok pirisuhan.
Populionin ika sog ginang nu nong mokpopoinum diyanin.
14 Dadi bilaꞌ mosannang-sannanga na dituꞌ,
anduꞌ,
potongow nu busung-busung ok kolasa-kololat nu dinakon.
Ondiꞌ nu kolingowan labiton ong ngalan ku diyon ni Pirꞌawn bagun ku sop mokoluwas sok pirisuhan kini.
15 Poꞌ song mattanin,
togol ok kopogoyit nakon dini tidu sog bonuwa nog bangsa Ibrani.
Sokaliꞌ ningkomun dini u sok pirisuhan bu daꞌdun da sop og dusa u.”
16 Dangan midongog nok kounutan nong mga mogogimung nok pan nong mobais ong maana nok toginop nog duma nin,
na sinuksugin da sop ok toginopin diyon ni Yusup,
taluꞌ in,
“Sok toginopu sop,
miktodungu nok tolu ambung nok pan.
17 Og gambung nok kinodibabowan,
miponuꞌ nong mga miglologinis nok pan para ni Pirꞌawn,
sugaid kinan nong mga manuk-manuk.”
18 Ok tabal ni Yusup diyanin,
“Maꞌ nini,
ong maana nin.
Ok tolu ambung kituꞌ,
tolu ondow.
19 Pogdoksuꞌ nok tolu ondow,
poluwason ka na ni Pirꞌawn sok pirisuhan.
Sugaid poputukan ka nog gulu bangka a bitinon sok kayu,
bu kanon nong mga manuk-manuk og gungod nu.”
20 Na sog ikotolu ondow,
simugat sog gondow nok kobataꞌ ni Pirꞌawn.
Dadi migjamu yanin para song mga piktowanin.
Piluwasin ok kounutan nong mga mokpopoinum diyanin bu ok kounutan nong mga mogogimung nok panin bangka nin poadapoy song mga ponindogin.
21 Pipuliꞌ ni Pirꞌawn sog ginangin ok kounutan nong mga mokpopoinum diyanin.
22 Sugaid ok kounutan nong mga mogogimung nok panin,
pibitinin,
bu miunut tokodoy ok tinaluꞌ ni Yusup kituꞌ.
23 Tibuwa daꞌ na kopondom nok kounutan nong mga mokpopoinum ni Pirꞌawn si Yusup.