Si Yusupa bug Libun ni Potipar
39
Na dangan inoyit si Yusup nog bangsa Ismael dituꞌ song Misir,
sinaluy yanin ni Potipar.
Si Potipar kini,
ok kounutan nok sundalu nong mogogipat nog gastanaꞌ ni Pirꞌawn.
2 Dinumahan nok Tuhan si Yusup,
dadi ok kotanan nog ginangin mobais tibuwa.
Dituꞌ yanin miktolagad sog baloy nog gamu nin nok tow Misir.
3 Na mitongow ni Potipar nog dinumahan nok Tuhan si Yusup,
poꞌ binarakatan yanin nok Tuhan sog lam nog ginangin.
4 Dadi kisulutan si Potipar ni Yusup,
saan na pingandolanin sog baloyin bu sok kotanan nong mga gartaꞌ in.
5 Tidu sog waktu kituꞌ,
binarakatan nok Tuhan og baloy ni Potipar,
mga piktowanin bug lam nog gartaꞌ in bisan og guma nin bug mga potubuonin.
Rinidjikian yanin nok Tuhan pasal ni Yusup.
6 Pingandol na tokodoy ni Potipar ok kotanan nok pongartaꞌ in dituꞌ ni Yusup,
bu daꞌdun na muwal ok kosusahanin,
bu kanaꞌ kuman hadja.
Na si Yusup kini mopiyalaki bu mobais og lawasin.
7 Dadi daꞌ kobon kiolegan yanin nog libun ni Potipar,
bu inonggatin si Yusup,
“Uboy nu akon.”
8 Sugaid daꞌ koleg si Yusup,
taluꞌ in,
“Tontong nu ba,
mingandol tokodoy og gamu u dinakon.
Daꞌ in na malingoy og olo-olo nog gartaꞌ in sog baloyin,
pingandolin na nakon kotanan.
9 Itungan migbatuk ami da nong mokopogbayaꞌ sog baloy kini,
bu akon ok pipogbayaꞌ in sog lam nog olo-olo nituꞌ liyu dinika,
poꞌ og libunin ika.
Diꞌ u tokodoy moinang nok tipuhon ku yanin.
Dusa mosolag koyon sok Tuhan!”
10 Bisan maꞌ nituꞌ,
gondow-gondow da poktogolonin si Yusup,
sugaid diꞌ meleg si Yusup muboy diyanin atawa mokpolani diyanin.
11 Sokaliꞌ solobuk gondow,
sinumolod si Yusup sog baloy moginang,
mamaꞌ na nok kibiyaksahanin,
sugaid daꞌdun bisan solokotow ok sosuguon nog laki diyon.
12 Na sinaggow nog libun ni Potipar mogdayun si Yusup sok ponapot,
bangka poktaluꞌ diyanin,
“Alung na!”
Sugaid mikogobok si Yusup sog luwasan,
bu mibagak ok ponapotin sok komot nog libun koyon.
13 Dangan mitongow nog libun ni Potipar nog ginumobok sog luwasan si Yusup,
bu ok ponapotin da ong mibagak sok komotin,
14 tinawagin ong mga sosuguonin,
ok taluꞌ in,
“Tontong niyu ba kini,
ok tow Ibrani nong misaluy nog laki u,
migbogoy nok kosipogan dinita.
Simolod yanin sog biliku bagun muboy bosiya dinakon,
daypara mikolosiku.
15 Dangan midongogin og losiku,
migdaliꞌ-daliꞌ yanin lumuwas sog baloy,
bu mibagak ok ponapotin dinakon.”
16 Tinaguꞌ in ok ponapot ni Yusup song molani nin sampoy nong mikuliꞌ sog baloy og laki nin.
17 Dadi sinuksugin kini sog laki nin,
“Og gulipon nu nog Ibrani nog inoyit nu dini,
sinumolod yanin bagun bogoyanin bosiya akon nok kosipogan.
18 Sugaid dangan miglosiku,
gimobok yanin posunguꞌ sog luwasan bu mibagak pa tanan og juba nin.”
Pinirisu si Yusup
19 Dangan midongog ni Potipar ok sinuksug nog libunin pasal sog ininang ni Yusup,
milingit tokodoy yanin.
20 Dadi pisaggow ni Potipar si Yusup bangka nin popirisuhoy sok pokpirisuhan ni Pirꞌawn nong mga tow.
Na dituꞌ na yanin.
21 Sugaid dinumahan si Yusup nok Tuhan.
Pitongowin ok kolasa-kololatin dun,
saan na kisulutan diyanin ok kounutan nong mogogipat nok pirisuhan.
22 Inimungin si Yusup nok kounutan nong mga pinirisu,
bu pingandolin dun og lam nog ginang dituꞌ.
23 Daꞌdun na ok kosusahanin poꞌ si Yusup na ong mingonggayd sok kotanan sog diyalom nok pirisuhan.
Dinumahan si Yusup nok Tuhan saan na ok kotanan nog ginangin mobais na hadja ok koposunguanin.