Ponognaan 38

Si Yahud bu si Tamar

Na sog waktu nituꞌ, simuwoy si Yahud song mga gilugin bu dituꞌ yanin migonong sok solobuk laki, ong ngalanin si Hira sog bonuwa Adullam.

2 Dangan dituꞌ na si Yahud, mitongowin ok solobuk libun nog bangsa , og bataꞌ ni Suha, bu mipoglibunin. 3 Na migbodos og libunin bu migbataꞌ nog laki bu iningalanan ni Yahud nog Er. 4 Migbodos na sop yanin bangka pogbataꞌ nog laki. Iningalananin nog Onan. 5 Migbodos yanin puliꞌ bangka pogbataꞌ nog laki. Iningalananin nok Sela. Dangan binataꞌ si Sela, dituꞌ ilon migonong sog bonuwa Kesib.

6 Dangan mogulang na si Er, og bataꞌ ni Yahud nog gulang bataꞌ, pilibunanin sok solobuk libun, ong ngalanin Tamar. 7 Sugaid si Er molaat sok ponontong nok Tuhan, dadi inalap nok Tuhan ong nyawa nin.

8 Miktaluꞌ si Yahud sog bataꞌ in nok si Onan, longin, “Unut nu na og gaddat ta niyu. Poglibun nu og balu nog gilug nu bagun ongon og bataꞌ nog gulang bataꞌ nu tidu dinika.” 9 Sugaid kiosunan ni Onan bug mogbataꞌ yanin sog balu nog gilugin, diꞌ da moitung nog bataꞌ in. Dadi daꞌ in pobodosoy bagun daꞌdun ok tupuꞌ nog gilugin kituꞌ nong minatoy. 10 Na og ininang ni Onan, molaton sok ponontong nok Tuhan, saan na inalap da sop nok Tuhan ong nyawa nin.

11 Dadi miktaluꞌ si Yahud song mimonugangan dun nok si Tamar, “Uliꞌ a poguna song mga mokogulang nu! Diꞌ a pa sokaliꞌ moglaki. Bagadan nu na si Sela sumubul.” Maꞌ niyon ok tinaluꞌ ni Yahud poꞌ mipikilin nog insunoy matoy da sop si Sela. Dadi minuliꞌ si Tamar sog baloy nong mokogulangin.

12 Dangan migobon minatoy og libun ni Yahud, og bataꞌ ni Suha. Dangan miawaꞌ ok kosusahan ni Yahud sok kopatoy nog libunin, mipanow yanin sok pogguntingan nog bilibili nin sog bonuwa Timna. Og duma nin mangoy dituꞌ, ok supali nin nok si Hira, ok tow Adullam.

13 Na ongon ong mikosuksug ni Tamar nong mangoy ok ponuganganin sok Timna, poꞌ guntinganin ong mga bilibili nin. 14 Dadi sinalinan ni Tamar ok sinolugin nog dogdoy sok kobalu nin, bu dinungmaanin ong muluꞌ in. Doksuꞌ miningkud yanin molani sog bongowan nog lungsud Enayim sok kilid nog dalan posunguꞌ sok Timna. Poꞌ kiosunanin nok subul na si Sela, sugaid ondaꞌ da polakihoy diyanin.

15 Na mitongow ni Yahud si Tamar, sugaid daꞌ in kolilahoy poꞌ migdungmaꞌ nong muluꞌ in. Baluꞌ in dun og libun bayadan. 16 Dadi minapit si Yahud diyon ni Tamar, taluꞌ in, “Melega taꞌ mogunut dinakon?” Maꞌ niyon ok taluꞌ in poꞌ daꞌ in kosunoy nog yonin koyon ong mimonugangan diyanin. Tabal ni Tamar, “Olo og bogoyon nu dinakon?” 17 Ok tabal ni Yahud, “Poyitan ku ika nok solobuk bataꞌ kambing tidu song mga potubuon ku.” Tinumabal si Tamar, “Bogoyan nu poguna akon nog gindanan nog janjiꞌ nu toktob sok poyiton nu og bataꞌ kambing kituꞌ.” 18 Miktaluꞌ si Yahud, “Olo ok kolegan nu nog gindanan nog bogoyon ku dinika?” Tinumabal si Tamar, “Bagak nu dinakon og gantung liug nu nok pogamiton nu moktatak sog lam nog gartaꞌ nu, sampoy ok tungkod nu.” Na binogoy kituꞌ ni Yahud, bangka nin polanihoy, bu ok posunguanin mobodos. 19 Doksuꞌ minuliꞌ na si Tamar, bangka nin awaoy og dungmaꞌ song muluꞌ in. Sinolugin mokpuliꞌ og dogdoy sok kobalu nin.

20 Na pioyit ni Yahud sok supali nin nok si Hira ok kambing nog bogoyonin sog libun kituꞌ bagun malap og olo-olo nog binagakin dituꞌ. Sugaid daꞌ na kobalak ni Hira. 21 Dadi sinakan ni Hira ong mga kolakihan sog bonuwa koyon, “Mitongow niyu taꞌ og libun bayadan nong migingkud sok kilid dalan sog Enayim?” Tinumabal ong mga tow, “Daꞌdun ma og libun bayadan dini.” 22 Dadi mikpuliꞌ si Hira dituꞌ ni Yahud, taluꞌ in, “Daꞌ u yanin kobalak, bu taluꞌ sop nong mga kolakihan dituꞌ nok tidu pa sok tagnaꞌ daꞌdun dow og libun bayadan dituꞌ.” 23 Taluꞌ ni Yahud, “Posagadan na diyanin ong mga gartaꞌ u kituꞌ, bagun diꞌ ita pokkotawahan nong mga tow dituꞌ. Pioyitu na diyanin og bataꞌ nok kambing, sugaid daꞌ nu yanin kobalak.”

24 Dangan mga tolu bulan na ong miniyan, piosunan si Yahud, “Ong mimonugangan nika nok si Tamar migbigaꞌ bu mibodos na tanan.” Na miktaluꞌ si Yahud, “Poluwas niyu yanin, bangka tutungoy.” 25 Dangan inoyit na si Tamar, ongon ok sinuguꞌ in bagun sumuksug ni Yahud, “Og gapuꞌ nok poktatak dunut nog gikotin, sampoy ok tungkod kini, yonin na og gommaꞌ nog bodosan ku. Ilolahoy nu busung-busung bug sima og gapuꞌ nini!” 26 Kiilalahan mogdayun ni Yahud nog diyanin, dadi miktaluꞌ yanin, “Daꞌdun og dusa nin. Akon da ok taga , poꞌ daꞌ u yanin pokawingoy sog bataꞌ u nok si Sela.” Na ondaꞌ pokpolani puliꞌ si Yahud ni Tamar.

27 Sog waktu na nok pogbataꞌ ni Tamar, kiosunan nok kambal og bataꞌ in. 28 Dangan pinakitan na yanin, limuwas ok komot nok solobuk nog bataꞌ. Inikotan mogdayun nok pandoy nok kokanaꞌ pula bu taluꞌ in, “Yonin kini ong mikuna lumuwas.” 29 Sugaid pisolod mokpuliꞌ nog bataꞌ ok komotin, bu ok kambalin ong miguna lumuwas. Miktaluꞌ ok pandoy, “Anduꞌ, mingagowa tokodoy kini lumuwas.” Dadi iningalanan og bataꞌ nok Peres. 30 Doksuꞌ nituꞌ limuwas sop ok kambalin nok taga gikot nok pula sok komot. Iningalanan og bataꞌ nok Sera.