Ponognaan 37

Si Yusup bu mga Koiluganin

Dadi si Yaꞌkub, diyon da migonong sok , ok pigonongan nog gommaꞌ in.

2 Yonin kini ok suksugan pasal ni Yaꞌkub bug mga ponupuꞌ in. Na si Yusup migumul na sopuluꞌ bu pitu tahun, bu mogogipat yanin nong mga bug kambing dunut nong mga gilugin nog gumbataꞌ ni Bilha bu ni Silpa. Ilon koyon ong mga libun nog gommaꞌ in. Na pokposunon ni Yusup sog gommaꞌ in ok pasal song mga ginang nong mga gilugin nong molaton. 3 Kolasahan tokodoy ni si Yusup tidu song mga koiluganin, poꞌ mogulang na yanin dangan binataꞌ si Yusup. Na inimunganin si Yusup nog gamis nong molingkat. 4 Dangan mitongow nok koiluganin nog labi og lasa nog gommaꞌ nilon ni Yusup tidu dinilon, na pigdumutan nilon si Yusup, bu daꞌdun ok taluon nilon diyanin nok kanaꞌ pa mosakit.

5 Ongon og waktu miktoginop si Yusup, bangka nin suksugoy sok koiluganin. Na migdungag hadja ok pogdumut nilon diyanin. 6 Ok taluꞌ ni Yusup song mga gilugin, “Poginongog amu busung-busung nok tinoginopu! 7 Sog diyalom toginopu, dituꞌ ita niyu kotanan sog guma gumani bu mimogbod ita. Sokaliꞌ og binogbodu minindog pahatul bangka libutoy bu sudjudoy nog binogbod niyu.” 8 Miktaluꞌ ok koiluganin, “Totu? Moimunga taꞌ nok sultan bu pogbayaan nu taꞌ ami?” Dadi migidud pa ok pogdumut nilon ni Yusup pasal sok toginopin bug sok tinaluꞌ in koyon.

9 Doksuꞌ miktoginop na sop si Yusup bu sinuksugin sok koiluganin. “Miktoginopu nong mitongowu og gondow, og bulan, bug sopuluꞌ bu sala nog bitun simudjud dinakon.” 10 Sinuksuganin sop og gommaꞌ in nok toginopin, sugaid pigboluanan yanin nog gommaꞌ in, taluꞌ in, “Olo ong maana nu niyon, nog ami nog ginaꞌ nu bug koilugan nu sumudjud dinika?” 11 Na milingit ok koilugan ni Yusup diyanin, sugaid pinikil-pikil nog gommaꞌ in ok pasal sok toginopin.

Pigdagang si Yusup bangka Koyit song Misir

12 Ongon gondow minangoy ok koilugan ni Yusup sog bonuwa Sekem bagun mokposoksab bug mogipat nog bilibili bug kambing nog gommaꞌ nilon. 13-14 Pogobon-obon miktaluꞌ si ni Yusup, “Toꞌ, ong mga gilug nu migipat nong mga potubuon dituꞌ sog bonuwa Sekem. Angoya dituꞌ bangka nu tontongoy bug olo na taꞌ ok kobotang-botang nilon bug mga potubuon. Pogdoksuꞌ pokpuliꞌ a dini bangka nu akon suksugoy.” Ok tabal ni Yusup, “Oo, Ommaꞌ.”

Dadi pigonatin na si Yusup, bu mipanow yanin tidu sok kopatagan nog Hebron bangka angoy sok Sekem. 15 Dangan dituꞌ na yanin, na mikpanowan yanin diyon. Ongon ok tow nong miksak diyanin, “Olo ok pinontong nu?” 16 Ok tabal ni Yusup, “Pinontongu ong mga gilugu. Taluan nu akon busung-busung bug ayin ilon mikposoksab.” 17 Taluꞌ nok tow koyon, “Minawaꞌ na ilon. Midongogu nok taluꞌ nilon nog dituꞌ ilon angoy sog Dotan.” Na timuyuk si Yusup song mga gulang bataꞌ in, bu mibalakin ilon dituꞌ sog Dotan.

18 Molayuꞌ pa yanin, mitongow na yanin nong mga gulang bataꞌ in. Sog daꞌ pa yanin pokosampoy dituꞌ dinilon, pigisunan nilon nok patoyon yanin. 19 Ok taluꞌ nok kokoniya, “Koyon na ok polotoginop. 20 Alung, patoyon ta yanin, bangka ta labuoy sok timbaꞌ. Ok posunon ta, pinatoy yanin nong mga binatang talun. Tontongon ta bug mounut pa taꞌ ok toginopin.” 21 Sugaid dangan midongog ni Ruben og gisun nilon, minontong yanin nok pobiyan bagun diꞌ mogmula si Yusup, taluꞌ in, “Diꞌ ta niyu yanin patoyon. 22 Diꞌ ta niyu yanin poduguan, labuon ta niyu hadja yanin sog diyalom nok timbaꞌ nok kinotihan koyon sok talunan.” Iniling maꞌ nituꞌ ni Ruben poꞌ ong niyatin, tabangonin si Yusup bagun pulion dituꞌ sog gommaꞌ nilon. 23 Dangan mikosampoy si Yusup dituꞌ song mga gulang bataꞌ in, linuwas nilon og gamisin kituꞌ nong molingkat, 24 bangka nilon labuoy si Yusup sok timbaꞌ nok kinotihan.

25 Doksuꞌ miningkud ilon bangka kan. Sunoy pa mitongow nilon ok tumpukan nog bangsa . Ong mga guntaꞌ nilon linulanan nong mga palapala, bulung, bug pokpomut tidu sog Gilead nog oyiton song Misir. 26 Taluꞌ ni Yahud song mga gilugin, “Olo ong malap taꞌ bilaꞌ patoyon ta og gilug ta, bangka bunihoy ok kopatoyin? 27 Golom pa poksaluy ta niyu yanin sog bangsa Ismael koyon. Ondiꞌ ta na patoyon poꞌ gilug ta niyu da yanin.” Na kisuatan ong mga gilug ni Yahud song mipikilin.

28 Dangan pogbiyan nong mga polonaluy nog bangsa Ismael tidu song Midian, inalap nilon si Yusup sok timbaꞌ bangka nilon dagangoy duwaꞌ puluꞌ tibuk . Doksuꞌ inoyit na si Yusup nong mga bangsa Ismael song Misir.

29 Pokpuliꞌ ni Ruben sok timbaꞌ, daꞌ in na kotongow si Yusup. Na landuꞌ tokodoy ok susa nin, sampoy nog ginodit-goditin og dogdoyin. 30 Doksuꞌ mikpuliꞌ yanin song mga koiluganin bangka nin taluoy, “Ondaꞌ na dituꞌ si Yusup sog diyalom timbaꞌ. Olo na og inangon ku?”

31 Dangan maꞌ nituꞌ, miksumbaliꞌ ilon solobuk kambing bangka nilon tokmuoy sog duguꞌ og gamis ni Yusup. 32 Doksuꞌ nituꞌ inoyit nilon og gamis, bangka nilon potongowoy sog gommaꞌ nilon, bu taluꞌ nilon, “Mitongow nami og gamis kini, ilalahan nu bug ni Yusup taꞌ atawa kanaꞌ?” 33 Kiilalahan mogdayun nog gommaꞌ nilon, taluꞌ in, “Oo, og gamis koyon nog bataꞌ u. Kinan na dodaꞌ yanin kituꞌ nog binatang talun, bu ginodit-godit na yanin kituꞌ.” 34 Dadi ginodit ni Yaꞌkub og dogdoyin sog lawasin bangka solug nok ponapot nok panit nong mokasap, og gindanan nok kosusahanin. Na miobon ok korukkaanin sog bataꞌ in. 35 Og lam nog gumbataꞌ in libun-laki minangoy mogamu-amu diyanin, sugaid sigi-sigi da ok pogdukkaꞌ in, ok taluꞌ in, “Diꞌ mawaꞌ ok korukkaan ku sog bataꞌ u sampoy song moktuyuku diyanin.” Dadi migaduy yanin puliꞌ pasal sog bataꞌ in.

36 Dangan dituꞌ na si Yusup song Misir, pigdagang yanin nong mikosaluy dun dituꞌ ni Potipar. Si Potipar kini ok kounutan nong mga sundalu mogogipat nog gastanaꞌ ni .