Ponognaan 4

Si bug si Habil

Dadi sok pogduma ni bu ni Hawa, migbodos na si Hawa bangka pogbataꞌ nog laki, ong ngalanin Kabil. Taluꞌ ni Hawa, “Sok tabang nok Tuhan mikobataꞌ u na nog laki.” 2 Pogdoksuꞌ nituꞌ migbataꞌ na sop yanin nog laki, ong ngalanin Habil. Poksolag nilon, si Habil kini mokpotubuꞌ nong mga bug kambing. Og gulang bataꞌ in sop nok si Kabil moguma.

3 Na ongon og gondow migbogoy si Kabil nok songkuꞌ in sok Tuhan. 4 Minalap sop si Habil nong mga tagnaꞌ bataꞌ nog bilibili nin, doksuꞌ piniliꞌ in ok kinobaisan, bangka nin bogoyoy sok Tuhan. Pogliling nok Tuhan dun, kisulutan yanin ni Habil, bu sog binogoyin. 5 Sugaid daꞌ kosulutoy ok Tuhan diyon ni Kabil bu sog binogoyin. Saan na milingit tokodoy si Kabil bangka pogdomuk-domuk. 6 Dadi tinaluan nok Tuhan si Kabil, “Manu milingita bu migdomuk-domuka ma? 7 Bilaꞌ mobais ong niyat nu, tantu tabukon ku og binogoy nu. Sugaid bilaꞌ molaton ong niyat nu, ok kolegan nog pogbayaanin ika, tibuwa sumboy ika ong mogbayaꞌ diyanin. Poꞌ og dusa mamaꞌ nong moboluꞌ nog binatang nong mogomaꞌ dinika bagun dapaonin ika.”

8 Na tinaluan ni Kabil ong mongudin nok si Habil, “Tong, sung ita sog guma.” Dangan dituꞌ na ilon, sunoy pa tinipu ni Kabil patoyoy og gilugin. 9 Pogdoksuꞌ nituꞌ sinakan nok Tuhan si Kabil, “Ayin ma og gilug nu nok si Habil?” Tinumabal si Kabil, “Daꞌ u kosunoy! Akon taꞌ buwan ong mogogipat nog gilugu?” 10 Tubus miktaluꞌ ok Tuhan, “Manu ininang nu ma kini? Poginongoga, miglosik dinakon og duguꞌ nog gilug nu tidu sog lupaꞌ mingoni nog hukuman. 11 Dadi tumbasan ka sop nog lupaꞌ poꞌ mitosopin og duguꞌ nog gilug nu. 12 Na bilaꞌ moguma a, bisan pa andun ok poktuyuꞌ nu, diꞌ a bogoyan nok songkuꞌ nog lupaꞌ. Ayin-ayin ka polaguy, mokpanowan ka na tibuwa sog ginlupaan.”

13 Taluꞌ ni Kabil sok Tuhan, “Diꞌ u modag ok siksaꞌ nog binogoy nu dinakon. 14 Binugow nu na akon sog lupaꞌ bu sog diyaloman nu. Molaguy bu mokpanowan ku na tibuwa sog ginlupaan. Sima-sima ong mokobalak dinakon insunoy patoyon nilon akon.” 15 Sugaid tinabal yanin nok Tuhan, “Diꞌ nilon ika patoyon, poꞌ siksaon ku ok tow nong mokpatoy dinika pitu kali mamaꞌ na nok siksaꞌ u dinika.” Saan na binotangan nok Tuhan nog gindanan si Kabil bagun sima-sima ong mokobalak diyanin, diꞌ yanin patoyon. 16 Dadi minawaꞌ na si Kabil sog gadapan nok Tuhan, bangka yanin pogonong sog bonuwa Nud, dapit silangan nog Eden.

Ong mga Ponupuꞌ ni Kabil

17 Na taga libun na si Kabil. Sok pogduma nilon, migbodos na og libunin, bangka pogbataꞌ nog laki, ong ngalanin si Enok. Mikpotindog si Kabil nog lungsud, bangka nin ingalanoy sop nog Enok. 18 Si Enok migbataꞌ ni Irad, bu si Irad og gommaꞌ ni Mihuyael. Na si Mihuyael og gommaꞌ ni Mitusael, bu si Mitusael og gommaꞌ ni Lamek. 19 Si Lamek, duwaꞌ buk og libunin, si Ada bu si Silla. 20 Si Ada migbataꞌ ni Jabal. Yonin na ok piktiduhan nong mga migonong sog bu mikpotubuꞌ nong mga binatang. 21 Ong ngalan nog gilugin, si Jubal. Yonin na ok piktiduhan nong mga tow nong moggitara bu moksuling. 22 Na si Silla migbataꞌ ni Tubal-Kabil. Yonin na ok polononsal nok tumbaga bug bosi. Og gilugin nog libun si Naama.

23 Na miktaluꞌ si Lamek sog duwaꞌ buk libunin,

“U Ada bu Silla, poginongog amu sok tingogu,

u mga libun ku, umatian niyu ok taluꞌ u,

patoyon ku ok tow bilaꞌ moangolu,

bu og bataꞌ sooy bisan tahan mogbanogu.

24 Bilaꞌ si Kabil poksuliꞌ in pitu kali,

ong nakon, posulian ku pitu puluꞌ bu pitu kali!”

Migbataꞌ pa si Adam ni Set

25 Na pasal ni Adam bug libunin, mikobalak pa ilon puliꞌ nog bataꞌ bangka ingalanoy ni Hawa nok Set. Poꞌ miktaluꞌ yanin, “Binogoyan ku na sop puliꞌ nok Tuhan nog bataꞌ gantiꞌ ni nok pinatoy ni .” 26 Na ongon na sop og bataꞌ ni Set nog laki, iningalananin Enos. Song masa nituꞌ miktagnaꞌ ong mga tow sumabbut song ngalan nok Tuhan.