Ok Pokselen-selen nok Tuhan nok Ponaluon nong Manusiyaꞌ sog Babel
11
Sok tagnaꞌ kituꞌ solobuk da ok ponaluon nog lam nok tow sog dunya,
bu migbatuk da ong mga taluꞌ nilon.
2 Dangan mikpinda-pinda ong mga tow nok pogonongan nilon posunguꞌ sok silangan,
mikodopot ilon sok solobuk bonuwa sog Babilonya,
bu dituꞌ ilon migonong.
3 Na migisun ong mga tow,
“Alung,
mogimung ita nog briksa.
Mongalap ita nog basak pula nong modakol,
bangka ta pinitoy bagun tumogas.”
Og briks og ginamit nilon og gantiꞌ sog batu,
bu ok kitlan og ginamit nilon pokpodokot.
4 Tubus miktaluꞌ ilon,
“Mogimung ita nok siyudad nok taga baloy nong mokodopot sog langit bagun ita mobantug,
bu diꞌ ita mokanat sog dunya.”
5 Na minonog tumontong ok Tuhan nok siyudad bug baloy molawa nog inimung nong mga towanan.
6 Dadi miktaluꞌ ok Tuhan,
“Miksolobuk ilon kotanan,
bu solobuk da ok ponaluon nilon,
bu yonin pa kini ok ponognaan nok ponginangon nilon.
Na daꞌdun na ong mologon dinilon,
bisan olo-olo ok kolegan nilon inangon.
7 Alung,
mangoy ita dituꞌ dinilon,
poglen-lenon ta ok ponaluon nilon bagun diꞌ ilon moksinabutoy.”
8 Saan na kinanat nok Tuhan ong mga tow sog ginlupaan,
bu linumotaꞌ ilon mogimung nok siyudad.
9 Og lungsud kini iningalanan nog Babel,b
poꞌ dituꞌ piglen-len nok Tuhan ok ponaluon nong mga tow,
bu tidu dituꞌ kinanatin ong mga tow sog ginlupaan.
Ong mga Ponupuꞌ ni Sem
10 Yonin kini ok ponupuꞌ ni Sem.
Duwaꞌ tahun pokpuwas nog lunup,
dangan migumul si Sem sogatus tahun,
binataꞌ og bataꞌ in nog laki.
Ong ngalanin Arpaksad.
11 Tidu bataoy si Arpaksad,
kidungagan pa og gumul ni Sem lima gatus tahun,
bu kidungagan pa og bataꞌ in nong mga laki bug libun.
12 Dangan tolu puluꞌ bu lima tahun na si Arpaksad,
binataꞌ og bataꞌ in nog laki nok si Sela.
13 Tidu bataoy si Sela,
kidungagan pa og gumul ni Arpaksad pat gatus bu tolu tahun,
bu kidungagan pa og bataꞌ in nong mga laki bug libun.
14 Dangan tolu puluꞌ tahun na si Sela,
binataꞌ og bataꞌ in nok si Eber.
15 Tidu bataoy si Eber,
kidungagan pa og gumul ni Sela pat gatus bu tolu tahun,
bu kidungagan pa og bataꞌ in nong mga laki bug libun.
16 Dangan migumul si Eber tolu puluꞌ bu pat tahun,
binataꞌ og bataꞌ in nog laki nok si Peleg.
17 Tidu bataoy si Peleg,
kidungagan pa og gumul ni Eber pat gatus bu tolu puluꞌ tahun,
bu kidungagan pa og bataꞌ in nong mga laki bug libun.
18 Na dangan tolu puluꞌ tahun na si Peleg,
binataꞌ og bataꞌ in nog laki nok si Reu.
19 Tidu bataoy si Reu,
kidungagan pa og gumul ni Peleg duwaꞌ gatus bu siyam tahun,
bu kidungagan pa og bataꞌ in nong mga laki bug libun.
20 Dangan migumul si Reu tolu puluꞌ bu duwaꞌ tahun,
binataꞌ og bataꞌ in nog laki nok si Serug.
21 Tidu bataoy si Serug,
kidungagan pa og gumul ni Reu duwaꞌ gatus bu pitu tahun,
bu kidungagan pa og bataꞌ in nong mga laki bug libun.
22 Dangan migumul si Serug tolu puluꞌ tahun,
binataꞌ og bataꞌ in nog laki nok si Nahor.
23 Tidu bataoy si Nahor,
kidungagan pa og gumul ni Serug duwaꞌ gatus tahun,
bu kidungagan pa og bataꞌ in nong mga laki bug libun.
24 Dangan migumul si Nahor duwaꞌ puluꞌ bu siyam tahun,
binataꞌ og bataꞌ in nog laki nok si Tera.
25 Tidu bataoy si Tera,
kidungagan pa og gumul ni Nahor sogatus bu sopuluꞌ bu siyam tahun,
bu kidungagan pa og bataꞌ in nong mga laki bug libun.
26 Dangan pitu puluꞌ tahun na si Tera,
bangka pa yanin pokopogbataꞌ.
Ong mga gumbataꞌ in nog laki,
yonin na siloꞌ Ibram,
Nahor bug Haran.
Ong mga Ponupuꞌ ni Tera
27 Yonin kini ok suksugan pasal song mga ponupuꞌ ni Tera.
Si Tera og gommaꞌ ni Ibram,
Nahor bug Haran.
Si Haran,
yonin na og gommaꞌ ni Lot.
28 Minatoy si Haran dituꞌ sog Ur ok pigonongan nong mga tow Kaldeyac sog bonuwa nok pigbataan dun.
Sog waktu nok kopatoyin,
totubuꞌ pa og gommaꞌ in nok si Tera.
29 Na miglibun si Ibram ni Saray,
bu miglibun sop si Nahor ni Milka,
og bataꞌ ni Haran,
bu og gilug ni Iska.
30 Si Saray baug,
saan na daꞌdun og bataꞌ in.
31 Na ginonatan ni Tera og Ur,
ok pigonongan nong mga tow Kaldeya.
Inoyit ni Tera og bataꞌ in nok si Ibram,
bug gapuꞌ in nok si Lot,
og bataꞌ ni Haran bug mimonugangan dun nok si Saray.
Posunguꞌ ilon sog bonuwa nok Kanaan,
sugaid pogdatong nilon sog bonuwa nog Haran,
dituꞌ na ilon migonong.
32 Na minatoy na si Tera sog bonuwa koyon nog duwaꞌ gatus bu lima tahun og gumulin.