Ok Kolaatan nong Manusiyaꞌ
6
Na dangan dinumakol ong mga tow sog ginlupaan,
modakol na og gumbataꞌ nilon nog libun.
2 Dadi mitongow nong mga bataꞌ nok Tuhan nong mokolingkat ok kobudjangan nong manusiyaꞌ,
bangka nilon poglibunoy og ayin-ayin ok kolegan nilon.
3 Na miktaluꞌ ok Tuhan,
“Ondiꞌ u kumboyon nong motubuꞌ ong manusiyaꞌ soummulan poꞌ ok tow da ilon,
saan na og gumul nilon diꞌ lumabi sok sogatus bu duwaꞌ puluꞌ tahun.”
4 Sok tagnaꞌ kituꞌ bu miniyan pa mga sanu tahun,
ongon ong mokolawa bu mokowasa nong mga tow sog ginlupaan.
Ilon koyon ong mga Nipilim.
Moboluꞌ bu mibantug ilon sok tagnaꞌ kituꞌ.
Ilon koyon ong mga ponupuꞌ nong mga bataꞌ nok Tuhan nong mikopoglibun sok kobudjangan kituꞌ.
5 Na mitongow nok Tuhan nog landuꞌ na kolaton ok ponginangon nong mga manusiyaꞌ sog ginlupaan,
bu og leg nok pikilan nilon song molaat gobi-gondow.
6 Dadi misusa ok Tuhan nok piongonin ong manusiyaꞌ sog ginlupaan,
bu mosolag ok korukkaanin.
7 Saan na miktaluꞌ yanin,
“Papason ku ong mga tow nok piongon ku,
bu mga binatang sampoy ong mga mokponanap sog lupaꞌ,
bug komanuk-manukan,
poꞌ misusa u nok piongon ku ilon.”
8 Sugaid sok ponontong nok Tuhan,
ongon ok tow nok kisuatan yanin dun,
yonin na si Nuh.
Ok Suguan nok Tuhan ni Nabi Nuh pasal sog Gadjung
9 Na yonin kini ok suksugan pasal ni Nabi Nuh.
Si Nuh ok tow nong mologdong.
Ondiꞌ yanin kotuntutan sog waktu niyon,
bu molani tokodoy yanin sok Tuhan.
10 Taga bataꞌ si Nuh tolu kotow,
yonin na siloꞌ Sem,
Ham bug Japet.
11 Na muwal ni Nuh,
sok ponontong nok Tuhan og lam nok tow molikoꞌ tokodoy,
bu ok kolaat nilon milokop sog ginlupaan.
12 Pogliling nok Tuhan dun,
mitongowin nong molaat tokodoy ok ponginangon nog lam nok tow.
13 Dadi tinaluanin si Nuh,
“Tipoton ku ong mga manusiyaꞌ,
poꞌ pasal dinilon milokop na ok kolatonan sog ginlupaan.
Saan na papason ku ilon sampoy og lam sog dibabow nog lupaꞌ.
14 Dadi pogimunga nog gadjung tidu sok kayu nong mopagon,
bangka nu imungoy nong mga bilik.
Bilaꞌ modoksuꞌ na,
lapat nu nok kitlana ok solod bug luwasanin.
15 Na maꞌ nini ok solagin:
Og yabaꞌ in pitu puluꞌ bu lima dopa,
og lokpangin sopuluꞌ bu duwaꞌ dopa bu tongaꞌ,
bu og lawa nin pitu dopa bu tongaꞌ.
16 Bilaꞌ atopan nu,
suboy duwaꞌ dangow og layuꞌ in tidu sog donding.
Imung nu tolu pangkat,
bu botangan nu nog bongowan ok kilidin.
17 Poꞌ polunupan ku na og ginlupaan bagun mopapas ok sosuku nok taga ginawa diyon,
matoy og lam sog ginlupaan.
18 Sugaid pasal dinika mokpoongon ku nok pogjanjian,
dadi bilaꞌ modoksuꞌ na og gadjung,
solod amu nog libun nu bug mga gumbataꞌ nu,
sampoy na ong mga mimonugangan dinika.
19-20 Pokposoloda sop sog gadjung soparisan libun bug laki tidu sog lam nog ginisan nong mga binatang sampoy na ong mga mokponanap sog lupaꞌ bu komanuk-manukan.
Mangoy ilon dinika bagun ilon motubuꞌ.
21 Pogoyita,
bangka a poktaguꞌ nog lam nog ginisan nong mokan para diniyu bu para song mga binatang bu komanuk-manukan.”
22 Na inunut ni Nuh og lam nok sinuguꞌ nok Tuhan diyanin.