Ok Pokpolunup nok Tuhan sog Ginlupaan
7
Na dangan midoksuꞌ na imungon og gadjung kituꞌ,
tinaluan nok Tuhan si Nabi Nuh,
“Soloda na sog gadjung dunut nog libun nu bug mga gumbataꞌ nu,
sampoy na ong mga mimonugangan dinika,
poꞌ ika da ong mologdong sok ponontongu sog waktu kini.
2 Pogoyita pitu parisan nog ginisan nog binatang halal,
bu soparisan tidu sog ginisan nog binatang kanaꞌ halal.
3 Pogoyita sop pitu parisan nog ginisan nok komanuk-manukan bagun motubuꞌ bu moktupuꞌ og lam nog ginisan sog ginlupaan.
4 Poꞌ pogdoksuꞌ nok pitu ondow,
podupian ku og ginlupaan solod sok pat puluꞌ ondow bu pat puluꞌ gobi bagun mopapas og lam nong mga piongon ku sog ginlupaan.”
5 Dadi inunut ni Nuh og lam nok suguan nok Tuhan diyanin.
6 Sog waktu nong migumul yanin nom gatus tahun,
minatong na og lunup sog ginlupaan.
7 Na sinumolod na si Nuh dunut nog libunin,
gumbataꞌ in,
bug mga mimonugangan diyanin sog gadjung bagun ilon moawon sog lunup.
8-9 Dadi minangoy og lam nog ginisan nog binatang,
halal bug kanaꞌ halal,
sampoy ong mga mokponanap sog lupaꞌ bu ong mga komanuk-manukan doduwaꞌ buk libun-laki diyon ni Nuh sog gadjung.
Tubus pisolodin,
mamaꞌ na nok suguan nok Tuhan diyanin.
10 Na pogdoksuꞌ nok pitu ondow koyon,
miktagnaꞌ na moglunup og ginlupaan.
11 Dadi dangan migumul na si Nuh nom gatus tahun sog ikosopuluꞌ bu pitu ondow sog ikoduwaꞌ nog bulan,
mibogdak og lam nok kotubudan sog diyalom lupaꞌ.
Bu sunoy pa mamaꞌ nong mibukaꞌ ok timpong nok tubig sog langit,
bangka pogdupiꞌ nong molandos.
12 Kidupian og ginlupaan gobi-gondow sog bon nok pat puluꞌ ondow bu pat puluꞌ gobi.
13 Na sog gondow nong miktagnaꞌ moglunup,
mikosolod na siloꞌ Nuh sog gadjung dunut nog libunin bu og bataꞌ in siloꞌ Sem,
Ham bug Japet sampoy na ok tolubuk libun nilon.
14 Mikosolod da sop og lam nog ginisan nong mga binatang modongon bug mila,
sampoy ong mga mokponanap sog lupaꞌ,
bug lam nog ginisan nok komanuk-manukan.
15 Minangoy og lam nok taga ginawa mikparis-paris diyon ni Nuh sog gadjung.
16 Dadi ong mga mikosolod koyon og libun bug laki nog lam nong motubuꞌ sog ginlupaan,
mamaꞌ na nok suguan nok Tuhan ni Nabi Nuh.
Pogdoksuꞌ,
bangka na tamboloy nok Tuhan dinilon.
17 Na sigi-sigi og lunup sog ginlupaan sok solod nok pat puluꞌ ondow koyon.
Dadi miksidalom ok tubig,
bangka pa lantung og gadjung.
18 Dangan dinumalom na ok tubig,
mianud na og gadjung.
19 Miksidalom pa tokodoy ok tubig sampoy milolop na og lam nok kobontud-bontudan nong mokolawa.
20 Migidud pa ok tubig,
sampoy mikodopot mga pat dopa og dalomin tidu sok sung-sung nok kobontudan.
21 Saan na milomos og lam nong mga taga ginawa nong moglilow sog ginlupaan,
ong mga binatang modongon,
mila sampoy na ong mga mokponanap,
ok komanuk-manukan bug lam nong manusiyaꞌ.
22 Kiputukan nog ginawa og lam sog ginlupaan.
23 Pinapas nok Tuhan og lam nong manusiyaꞌ,
komanuk-manukan bug mga binatang sampoy na ong mga mokponanap sog ginlupaan.
Mipapas ilon sog dunya.
Si Nuh da ong misamaꞌ totubuꞌ bug mga mikodunut diyanin sog gadjung.
24 Linunupan og ginlupaan sog bon nok sogatus bu lima puluꞌ ondow.