Ok Pogloklus nog Lunup
8
Sugaid si Nuh,
daꞌ da kolingowoy nok Tuhan,
sampoy ong mga binatang modongon bug mila sog diyalom nog gadjung.
Pioyupin og galuꞌ sog dunya,
dadi miktagnaꞌ na kumoti ok tubig.
2 Mitambol mokpuliꞌ ong mga kotubudan sog diyalom lupaꞌ,
bu piulowin og dupiꞌ.
3 Dadi migmayaꞌ-mayaꞌ kumoti.
Pogdoksuꞌ nog bon nok sogatus bu lima puluꞌ ondow,
mikkulang na ok tubig.
4 Dadi sog ikosopuluꞌ bu pitu ondow nog ikopitu nog bulan,
sinumangyad na og gadjung sok kobontudan nog Ararat.
5 Sigi-sigi mokkokoti ok tubig kituꞌ.
Na sok ponognaan nog gondow sog ikosopuluꞌ nog bulan,
bangka pa kotongow og dibabow nong mga kobontudan.
6 Dangan mikobiyan pa ok pat puluꞌ ondow,
binukaꞌ ni Nuh ok tomboan nog inimungin sog gadjung,
7 bangka nin boluyoy og guwak,
dadi linumayug ayin-ayin sampoy nong mimala na og lupaꞌ.
8 Doksuꞌ binoluyin na sop ok solobuk kolopati bagun kosunanin bug linumoklus na taꞌ ok tubig.
9 Sugaid daꞌ pokotongow ok kolopati nok koapunanin,
poꞌ modakol pa ok tubig sog ginlupaan.
Dadi mikpuliꞌ yanin sog gadjung.
Piapun ni Nuh sok komotin,
bangka nin posolodoy sog gadjung.
10 Na pibiyan ni Nuh ok pitu ondow,
bangka nin boluyoy puliꞌ ok kolopati.
11 Poksindop nog gondow mikpuliꞌ ok kolopati miktangag nog dawon nog jaytun nog bogu pa koupuꞌ.
Saan na kiosunan ni Nuh nok posunguꞌ na kumoti ok tubig sog ginlupaan.
12 Migbagad na sop yanin nok pitu ondow,
bangka nin na sop boluyoy ok kolopati.
Sugaid daꞌ na pokpuliꞌ diyanin.
13 Dangan migumul na si Nuh nom gatus bu sala tahun,
sok ponognaan nog gondow sok tolipunan nog bulan,
kinumoti na ok tubig.
Inawaꞌ na ni Nuh ok sobahagiꞌ nog gatop nog gadjung,
bu mitongowin nong mimala-mala na og lupaꞌ.
14 Dangan sog ikoduwaꞌ puluꞌ bu pitu ondow sog ikoduwaꞌ nog bulan,
mimala na og ginlupaan.
15 Na miktaluꞌ ok Tuhan diyon ni Nuh,
16 “Luwasa na sog gadjung dunut nog libun nu bug mga gumbataꞌ nu,
sampoy na ong mimonugangan dinika.
17 Poluwas nu sop ong mga totubuꞌ diyon dinika,
og lam nong mga binatang modongon bug mila,
sampoy ong mga mokponanap sog lupaꞌ,
bug komanuk-manukan,
bagun moktupuꞌ bu dumakol sampoy song mokanat ilon sog ginlupaan.”
18 Na minonog si Nuh dunut nog libunin,
bu mga gumbataꞌ in sampoy ong mga mimonugangan diyanin.
19 Mimonog sop ong miglologinis nong mga mokponanap bug mga binatang bug komanuk-manukan nong moglilow sog ginlupaan.
Ok Pokkurban ni Nabi Nuh
20 Doksuꞌ migimung si Nuh nok pokkurbanan posunguꞌ sok Tuhan.
Minalap yanin tidu sok sosoginis nog binatang bug komanuk-manukan nog halal,
bangka nin imungoy nok kurban tutung para sok Tuhan.
21 Kisulutan ok Tuhan nog gomut nok kurban,
dadi mikopogdiyamatoy yanin,
“Diꞌ u na suknaan mokpuliꞌ og ginlupaan pasal sok kolaat nong manusiyaꞌ.
Asal na molaat ong niyat nilon tidu pa sok kobetean nilon,
sugaid ondiꞌ u na puliꞌ papason og lam nok totubuꞌ mamaꞌ nog ininangu.
22 Na sog bon nog ongon og dunya,
ongon ok timpu pomula bug timpu gani,
ongon ok pomodos bug pondupiꞌ,
ongon ok timpu minit bug timpu tigdow,
bu ongon og gobi bug gondow.”