Ok Pogjanjian nok Tuhan bu ni Nabi Nuh
9
Dadi binarakatan nok Tuhan si Nuh bug mga gumbataꞌ in,
tinaluanin ilon,
“Pogbataꞌ amu bagun dumakol bug mokanat ong mga ponupuꞌ niyu sog dunya.
2 Mondok na diniyu og lam nok komanuk-manukan,
mga binatang mobeteꞌ mosolag nong moglilow sog ginlupaan,
bu mga kosodaan sok tubig.
Amu da ong mokopogbayaꞌ dinilon.
3 Mokan niyu na sop ilon mamaꞌ nog binogoyu diniyu nong mokan niyu ong mga pomulan tagnaꞌ.
4 Sugaid ondiꞌ niyu kanon og gungod nok taga duguꞌ,
poꞌ og duguꞌ og gindanan nok kotubuꞌ.
5 Sima-sima ong momunuꞌ nong manusiyaꞌ,
tantu tumbasan ku,
bisan pa og binatang.
Abatan ku sima-sima ong momunuꞌ nog batukin manusiyaꞌ.
6 Piongon ku ong manusiyaꞌ migbatuk-batuk dinakon,
saan na sima-sima ong malap nong nyawa nong manusiyaꞌ,
alapan da sop yanin nong nyawa nog duma nin.
7 Na pasal diniyu,
pogbataꞌ amu bagun moksidakol bug mokanat ong mga ponupuꞌ niyu sog ginlupaan.”
8 Miktaluꞌ pa ok Tuhan diyon ni Nuh bu song mga gumbataꞌ in,
9 “Na akon sop,
poongonon ku na ok pogjanjian ta,
sampoy sok ponupuꞌ niyu,
10 bug lam nog ongon og ginawa nin,
yonin na ong mga komanuk-manukan,
bug mga binatang modongon bug mila nok sinumakoy dunut diniyu sog gadjung,
sampoy ong mga ponupuꞌ nilon.
11 Bologbogan ku ok pogjanjian kini diniyu.
Ondiꞌ na puliꞌ mopapas tiduanan nog lunup og lam nok taga ginawa sog ginlupaan,
bu diꞌ na moongon puliꞌ og lunup nong mokoladak nog ginlupaan.”
12-13 Na ok taluꞌ nok Tuhan,
“Binotangu na og binaddali sog langit,
bu yonin kini og gindanan nok pogjanjian ta niyu bu sog lam nok taga ginawa pangkat-momangkat.
14 Bilaꞌ polollomon ku og dunya,
bangka kotongow og binaddali,
15 na,
pondomon ku og janjiꞌ u diniyu bu sog lam nog ongon og ginawa nin,
nog ondiꞌ na mopapas puliꞌ og lam nok taga ginawa kobalan nog lunup.
16 Saan na bilaꞌ motongowu og binaddali sok kogabunan,
mopondomu ok pogjanjian nok piongon ku diniyu bu sog lam nok taga ginawa sog ginlupaan soumul-tahun.
17 Og binaddali da og gindanan nog bologbogan ku ok pogjanjian ku sog lam nok taga kotubuꞌ sog ginlupaan.”
Si Nabi Nuh bug mga Gumbataꞌ in
18 Na og gumbataꞌ ni Nuh nog limuwas sog gadjung,
yonin na siloꞌ Sem,
Ham bug Japet.
Si Ham kini,
yonin na og gommaꞌ ni Kanaan.
19 Tidu sok tolu kotow nog gumbataꞌ ni Nuh kini,
mikanat ong mga tow sog ginlupaan.
20 Na ok kotubuan ni Nuh,
moguma.
Yanin ok tow nong mikuna momula nog anggula.
21 Ongon og gondow mininum yanin nok tubig anggul bangka kolangu,
saan na linuwasin ok ponapotin bangka tulug sog lokow-lokowin.
22 Na og gommaꞌ ni Kanaan nok si Ham,
mitongowin nong miglobas og gommaꞌ in,
bangka nin suksugoy song mga gilugin sog luwasan.
23 Doksuꞌ minalap si Sem bu si Japet nok tadjung,
bangka nilon sigloyoy sog baga nilon.
Tinumolikud ilon sumolod sog lokow-lokow bangka nilon dungmaoy og gommaꞌ nilon.
Daꞌ ilon poglingoy-lingoy bagun diꞌ nilon motongow og gommaꞌ nilon nong miglobas.
24 Dangan kiulian na og langu ni Nuh,
bangka nin pa kosunoy og ininang nog bataꞌ in nok kinomongudan nok si Ham,
og gommaꞌ ni Kanaan.
25 Miktaluꞌ yanin,
“Suknaan si Kanaanb.
Imungon yanin nok kinobabaan nog gulipon nong mga gilugin.”
26 Bu tinaluꞌ in pa,
“Pudjihon ok Pogbayaꞌ-bayaꞌ,
ok Tuhan ni Sem.
Moimung si Kanaan nog gulipon ni Sem.
27 Bung mayan podakolon ok ponupuꞌ bu poliwagon da bosiya nok Tuhan ok pogonongan ni Japet,
bu moksulut da bosiya ong mga ponupuꞌ ni Sem bu ni Japet.
Moimung da bosiya si Kanaan nog gulipon ni Japet.”