Ok Poksuloy nok Tuhan diyon ni Nabi Ibrahim
22
Dangan miniyan mga sanu tahun,
sinuloyan nok Tuhan bug ponoy ok kogot nok kotombaꞌ ni Ibrahim diyanin.
Dadi sinabi yanin nok Tuhan,
“Ibrahim.”
Ok tabal ni Ibrahim,
“Kini u da.”
2 Tinaluꞌ nok Tuhan,
“Oyit nu si Isahak,
og bataꞌ nu tokodoy nok kolasahan nu.
Angoy amu sog bonuwa nong Muriya,
bu imung nu yanin nok kurban tutungon para dinakon.
Taluan ku da ika bug ayin og bontud nok pokkurbanan nu diyanin.”
3 Poglomaꞌ doliꞌ-ondow tinogama ni Ibrahim ok kudaꞌ himarin,
bangka nin podunutoy og duwaꞌ kotow sosuguonin bug bataꞌ in nok si Isahak.
Sog daꞌ ilon pa gonat,
mimakiꞌ yanin nok kayu poktagun nok kurban.
Doksuꞌ mipanow na ilon sog bonuwa nok tinaluꞌ nok Tuhan diyanin.
4 Sog ikotolu ondow nok panow nilon,
mitongow na ni Ibrahim sok kolayuan og bonuwa nok tinaluꞌ nok Tuhan.
5 Dadi miktaluꞌ si Ibrahim sog duwaꞌ kotow sosuguonin,
“Dini amu na soliyan bug kudaꞌ ta himar.
Tumukad ami pa sog bontud koyon mokpudji sok Tuhan.
Doksuꞌ mokpuliꞌ ami da dini.”
6 Na pipisan ni Ibrahim ni Isahak ok kayu para sok poktutung nok kurban,
bu si Ibrahim da ong migoyit nok keg bug pokpolokot,
bangka na ilon panow.
7 Doksuꞌ miktaluꞌ si Isahak “Ommaꞌ!”
Ok tabal ni Ibrahim “Olo,
Toꞌ?
Kini u da.”
Taluꞌ ni Isahak,
“Ongon ok pokpolokot ta bu ongon sop ok kayu ta,
sugaid ayin og bataꞌ nog bilibili nok kurbanon taa?”
8 Taluꞌ ni Ibrahim,
“Toꞌ,
Tuhan da ong mogbogoy nog bataꞌ nog bilibili para kurban tutung.”
Doksuꞌ migdayun na ilon tumukad.
9 Pogdatong nilon sog bonuwa nok tinaluꞌ diyanin nok Tuhan,
migimung si Ibrahim nok pokkurbanan.
Tubus binotangin ok kayu sok tasin,
bu inikotanin og bataꞌ in nok si Isahak,
bangka nin pobolilidoy sok tas nok kayu koyon.
10 Doksuꞌ inalapin ok kegin poꞌ sumbalionin na bosiya og bataꞌ in.
11 Sugaid tinawag yanin nong malaikat nok Tuhan sog langit,
“Ibrahim!
Ibrahim!”
Timabal yanin “Kini u da.”
12 Tinaluan yanin nong malaikat,
“Diꞌ nu posakitan og bataꞌ nu bu diꞌ nu yanin olohon,
poꞌ kiosunan ku na nong migogondoka sok Tuhan.
Poꞌ minsan og bataꞌ nu tokodoy nok kolasahan nu,
diꞌ nu da inugunanb dinakon.”
13 Poktongal ni Ibrahim,
mitongowin og bilibili nog laki,
misangit ok sungagin sog buganan.
Dadi inalap ni Ibrahim bangka nin imungoy nok kurban tutungon,
gantiꞌ nog bataꞌ in.
14 Na iningalanan ni Ibrahim og bonuwa kituꞌ Yahwehc Yire,
ong maana nin Ok Tuhan ong Mogbobogoy.
Dadi sampoy ningkomun,
miimung nog baasa,
“Sog bontud nok Tuhan,
mogbogoy yanin bug olo ok kulang.”d
15 Doksuꞌ miktaluꞌ mokpuliꞌ ong malaikat nok Tuhan sog langit.
16-17 Taluꞌ in,
“Mamaꞌ nini ok taluꞌ nok Tuhan,
‘Akon tokodoy og jumanjiꞌ dinika,
bu sinumapa u song ngalan ku nog barakatan ku ika,
poꞌ minsan og bataꞌ nu tokodoy nok kolasahan nu,
diꞌ nu inugunan kurbanon para dinakon.
Podakolon ku ong mga ponupuꞌ nu,
mamaꞌ nog dakol nog bitun sog langit atawa mamaꞌ nok kodakol nok pontad sok kilid dagat.
Moalap nok ponupuꞌ nu ok pigbonuwahan nog banta nilon.
18 Sabap sok ponupuꞌ nu,
mobarakat og lam nok kobangsa-bangsahan sog dunya poꞌ tinumombaꞌ a sok suguan ku.’ ”
19 Doksuꞌ mikpuliꞌ siloꞌ Ibrahim sog duwaꞌ kotow nok sosuguonin,
bangka ilon pokpuliꞌ sog Berseba bu dituꞌ na ilon migonong.
Ong mga Ponupuꞌ ni Nahor
20 Na pogdoksuꞌ nituꞌ,
ongon ong mikposun ni Ibrahim nong mikobataꞌ na og gilugin nok si Nahor sog libunin nok si Milka.
Walu kotow og bataꞌ in nog laki.
21 Si Us og gulang bataꞌ,
ok kongudanin si Bus,
doksuꞌ si Kemuel,
yanin og gommaꞌ ni Aram.
22 Tubus miksunud-sunud na siloꞌ Kesed,
Haso,
Pildas,
Yidlap bu si Betuel.
23 Na si Betuel kini,
yanin na og gommaꞌ ni Ribeka.
Yonin kini og walu kotow nog gumbataꞌ laki ni Milka bu ni Nahor,
og gilug ni Ibrahim.
24 Ongon da sop og gumbataꞌ ni Nahor sog len libunin nok si Rauma.
Ong mga gumbataꞌ nilon nog laki yonin na siloꞌ Teba,
Gaham,
Tahas bu si Maaka.