Ok Pogbataꞌ ni Sarah diyon ni Isahak
21
Na mamaꞌ nok tinaluꞌ nok Tuhan,
binogoyanin si Sarah nok kobaisan,
bu binologboganin og jinanjiꞌ in dun.
2 Dadi migbodos si Sarah bu migbataꞌ pa yanin nog laki nong mogulang na si Ibrahim.
Limuwas og bataꞌ mitang sog waktu nok kotaluꞌ nok Tuhan dituꞌ ni Ibrahim tagnaꞌ,
3 bu iningalanan ni Ibrahim og bataꞌ in nog Isahak.
4 Dangan midopot walu ondow og bataꞌ in,
inislam ni Ibrahim mamaꞌ na nok sinuguꞌ nok Tuhan diyanin.
5 Sog waktu nog binataꞌ si Isahak,
migumul si Ibrahim sogatus tahun.
6 Doksuꞌ miktaluꞌ si Sarah,
“Pikotawa u nok Tuhan kobalan nog loliyagu,
bu sima-sima ong mokodongog pasal nini,
mokopokkotawa da sop.”
7 Bu taluꞌ in pa,
“Tidu sok tagnaꞌ daꞌdun ong mokopoktaluꞌ ni Ibrahim nong mokopoduduꞌ u pa nog bataꞌ in,
sugaid mikobataꞌ u pa nong mogulang na yanin.”
8 Dangan simolag-solag na si Isahak,
linungaꞌ na nog ginaꞌ in.
Sog gondow nok kolungaꞌ dun,
migjamu si Ibrahim nong mosolag.
Ok Pogawaꞌ ni Hadjar bu ni Ismael
9 Na mitongow ni Sarah nog linokudiꞌ og bataꞌ in nok si Isahak nog bataꞌ ni Ibrahim diyon ni Hadjar,
nok tow Misir.
10 Dadi tinaluanin si Ibrahim,
“Poawaꞌ nu og libun gulipon koyon bug bataꞌ in,
poꞌ og bataꞌ nog libun gulipon koyon diꞌ kobahagian nok pusakaꞌ nog bogoyon sog bataꞌ u nok si Isahak.”
11 Na misusa tokodoy si Ibrahim,
poꞌ si Ismael,
og bataꞌ in da sop.
12 Sugaid miktaluꞌ ok Tuhan,
“Diꞌ a mosusa pasal sog bataꞌ nu bu sog libun gulipon nu nok si Hadjar.
Unut nu na tibuwa ok tinaluꞌ ni Sarah,
poꞌ biyan ni Isahak koongonan ka nong mga ponupuꞌ nong mogoyit nong ngalan nu.
13 Na pasal sog bataꞌ nog gulipon koyon,
podakolon ku da sop ok ponupuꞌ in,
bu moimung yanin nok solobuk bangsa,
poꞌ ok tupuꞌ nu da sop yanin.”
14 Poglomaꞌ doliꞌ-ondow,
minalap si Ibrahim nong mokan bug panit nok tinulodan nok tubig,
bangka nin botangoy sog baga ni Hadjar.
Doksuꞌ pipanowin na ilon nog bataꞌ in.
Dadi mikpanowan ilon dituꞌ sog ginlupaan nong mimala sog Berseba.
15 Dangan mitipot ok tubig nog binalun nilon,
binagakin og bataꞌ in sok pun nong mikaan nok kayu.
16 Tubus mipanow yanin sog gunahan mga lima puluꞌ dopaa og layuꞌ in sog bataꞌ.
Dituꞌ yanin miningkud momikil,
“Ondiꞌ u mokosandal mogbantoy bilaꞌ matoy og bataꞌ u.”
Dadi migunggul yanin moksogow.
17 Sugaid midongog nok Tuhan ok sogow nog bataꞌ in,
na tinaluan si Hadjar nong malaikat nok Tuhan tidu sog langit,
“Olo ok kosusahan nu?
Ondiꞌ a mondok poꞌ midongog da nok Tuhan ok sogow nog bataꞌ nu.
18 Angoy nu buwat og bataꞌ nu bangka nu ambit,
poꞌ ok taluꞌ nok Tuhan:
‘Imungon ku ok ponupuꞌ in nong mosolag nog bangsa.’ ”
19 Doksuꞌ ongon ok pitongow nok Tuhan diyanin nok tubud.
Dadi minangoy yanin dituꞌ bangka nin ponuoy ok poktulodanin nok tubig,
bangka nin poinumoy og bataꞌ in.
20 Ondaꞌ potiyangoy nok Tuhan og bataꞌ bu sinumolag na yanin.
Migonong yanin sog ginlupaan nong mimala nok Paran,
bu mopandoy yanin momanaꞌ.
21 Dangan dituꞌ yanin sok Paran,
pilibunan yanin nog ginaꞌ in nok solobuk budjang nog bangsa Misir.
Ok Pikpasadan ni Nabi Ibrahim bu ni Sultan Abimelek
22 Na sog waktu nituꞌ minangoy si Abimelek dituꞌ ni Ibrahim dunut nok kounutan nong mga sundalu nin nok si Pikol.
Miktaluꞌ si Abimelek ni Ibrahim,
“Tinabangan ka tokodoy nok Tuhan sog lam nog inangon nu.
23 Na poksapa a sok Tuhan nog diꞌ a monipu dinakon bu song mga ponupuꞌ u.
Sugaid mamaꞌ nok pibaisan ku ika,
pobaisan nu sop akon sampoy og bonuwa nok pigonongan nu soliyan-soliyan kini.”
24 Tinumabal si Ibrahim,
“Oo,
sapahan ku.”
25 Doksuꞌ miksuksug si Ibrahim pasal sok timbaꞌ in nog inagow nong mga gulipon ni Abimelek.
26 Miktaluꞌ si Abimelek,
“Daꞌdun ok sene-sabutu bug sima ong miginang dun.
Daꞌ a pokposun dinakon,
bu ugatu pa koyon kosunoy.”
27 Tubus minalap si Ibrahim nong mga bilibili bug mga sapiꞌ bangka nin bogoyoy ni Abimelek.
Doksuꞌ migimung ilon nok pokpasadan.
28 Minalap pa tokodoy si Ibrahim nok pitu buk bataꞌ nog bilibili nog libun bangka nin polenoy.
29 Dadi sinakan ni Abimelek si Ibrahim,
“Olo ong maana nok pitu buk bilibili nok piduwoy nu koyon?”
30 Ok tabal ni Ibrahim,
“Alap nu ok pitu buk bilibili kini,
og gindanan nog akon ong mikkukut nok timbaꞌ kini.”
31 Dadi iningalanan og bonuwa koyon nog Berseba,b
poꞌ miksinapahoy ilon dituꞌ.
32 Doksuꞌ nilon mogimung nok pokpasadan sog bonuwa Berseba,
minuliꞌ si Abimelek bu si Pikol sog bonuwa Pilistin.