Pasal ni Nabi Ibrahim bu ni Sultan Abimelek
20
Tubus ginumonat siloꞌ Ibrahim tidu song Mamre bangka angoy song Negeb.
Dituꞌ ilon migonong soliyan sog lot nok Kades bug Sur,
doksuꞌ miglandan ilon sog Gerar.
2 Na miktaluꞌ si Ibrahim song mga tow dituꞌ pasal sog libunin nok si Sarah,
inangkonin nog gilugin.
Dadi ok Sultan sog Gerar nok si Abimelek,
pialapin si Sarah poꞌ poglibunonin bosiya.
3 Tibuwa ongon solobuk gobi mikpotoginop ok Tuhan dituꞌ ni Abimelek,
taluꞌ in,
“Matoya na koyon,
poꞌ og libun koyon nog inalap nu,
taga laki.”
4 Sugaid si Abimelek daꞌ in pa kolilow si Sarah,
dadi tinumabal yanin,
“U Tuhan,
patoyon nu taꞌ ok tow nog daꞌdun og dusa nin?
5 Miktaluꞌ buwan si Ibrahim dinakon nog gilugin si Sarah,
bu miktaluꞌ sop si Sarah nog gilugin si Ibrahim.
Daꞌdun ok ponginsabutu dun,
dadi daꞌdun og dusa u sog ininangu kituꞌ.”
6 Ok taluꞌ nok Tuhan sog diyalom toginopin,
“Oo,
kiosunan ku nog daꞌdun ok ponginsabut nu dun,
saan na akon tokodoy ok sinumaggaꞌ dinika nog diꞌ nu yanin motogbing,
bagun diꞌ a mogdusa dinakon.
7 Dadi populiꞌ nu og libun koyon sog laki nin,
poꞌ og laki nin koyon ong nabi.
Mongoni-ngoni yanin dinakon bagun motubuꞌ a pa,
sugaid taluan ku ika,
bug diꞌ nu populion,
tantu matoya da sampoy ong mga tow sog diyaloman nu.”
8 Poglomaꞌ doliꞌ-ondow migbuwat si Abimelek bangka nin potawagoy og lam nong mga ponindogin,
bangka nin taluoy ok pasal sok toginopin,
bu miondok ilon tokodoy.
9 Na pitawag ni Abimelek si Ibrahim,
bangka nin sakoy,
“Olo og ininang nu dinami?
Olo og dusa u dinika nog binotang nu akon bug mga piktowan ku sok kodusahan?
Kanaꞌ mopatut og ginang nu koyon.
10 Manu ininang nu maꞌ kituꞌ?”
11 Na miktaluꞌ si Ibrahim,
“Baluꞌ u dun daꞌdun ong migogondok sok Tuhan dini sog bonuwa kini.
Mipikilu,
insunoy patoyon niyu akon bagun moalap niyu og libun ku.
12 Motud da sop nong mogilug ami,
salu ommaꞌ bu suwoy sog ginaꞌ,
sugaid piglibun ku yanin.
13 Dangan sinuguꞌ u nok Tuhan mokpolayuꞌ sog bonuwa nog gommaꞌ u,
tinaluan ku na asal og libun ku,
‘Bisan ayin-ayin ita angoy nog bonuwa,
sumboy taluon nu nong mogilug ita,
og gindanan nok kolasa nu dinakon.’ ”
14 Pagga maꞌ nituꞌ,
inuliꞌ ni Abimelek si Sarah dituꞌ ni Ibrahim,
bangka nin pa bogoyoy nong mga bilibili,
mga sapiꞌ bug gulipon libun bug laki.
15 Na miktaluꞌ pa si Abimelek,
“Tontong nu og ginlupaan ku,
pomiliꞌ a na bug ayin-ayin ok kolegan nu mogonong.”
16 Doksuꞌ tinaluanin si Sarah,
“Binogoyan ku og gilug nu songibu tibuk silber kosalaan bagun kosunan nong mga duma nu nog daꞌ u ika kotogbing,
og gindanan nong molissin ka.”
17-18 Na sabap sok pogalap ni Abimelek ni Sarah,
ok tumbas nok Tuhan ondiꞌ mokopogbataꞌ og lam nok kolibunan sog gastanaꞌ in.
Dadi mingoni-ngoni si Ibrahim sok Tuhan,
bu binulung nok Tuhan si Abimelek bug libunin bug mga guliponin nog libun bagun mokopogbataꞌ na ilon puliꞌ.