Ponognaan 19

Ok Kolaatan nong mga Tow Sodom

Poglogobi, minatong og duwaꞌ kotow kituꞌ sok Sodom soliyan miningkud si sog bongowan nok siyudad koyon. Dangan mitongowin og duwaꞌ kotow koyon, minindog yanin poꞌ lumpakonin, bangka yanin sudjud sog lupaꞌ gindanan nok pogaddatin. 2 Taluꞌ ni Lot, “Mga tuwan, apit amu pa busung-busung sog baloy nog niyu. Alapan ta amu nok tubig pongugas nog botis niyu, bu dituꞌ amu na tulug gobi kini. Suboy na doliꞌ-ondow bangka amu pogdayun.” Ok tabal nilon, “Potiyangan na, dini ami na sooy mogulabung sog loma-lomahan nok siyudad kini.” 3 Sugaid tinogol tokodoy ilon ni Lot, dadi migunut ilon sog baloyin. Na pilutuan na ni Lot nok pan bug ginis-ginisan nong mokan. Pogdoksuꞌ, kinuman na ilon.

4 Sugaid sog daꞌ pa ilon tulug, miktopuk og lam nok kolakihan subul bug mogulang sog luwasan nog baloy ni Lot, bangka nilon poglibutoy. 5 Doksuꞌ ginapisan nilon si Lot, “Hoy Lot! Ayin na ong mga tow nog laki nog inoyit nu sog baloy nu koyna? Poluwas nu ilon dini, bagun libunon nami ilon.”

6 Dadi linumuwas si Lot tidu sog baloyin, bangka nin tamboloy og bongowan. 7 Taluꞌ in song mga kolakihan, “U mga pigilugan ku, pongonihon ku tokodoy diniyu, diꞌ amu monginang nong mamaꞌ niyon nok kolaat. 8 Bilaꞌ meleg amu, ongon duwaꞌ kotow og bataꞌ u nog budjang, poluwason ku ilon diniyu, bangka niyu inang og olo-olo ok kolegan niyu. Tibuwa og duwaꞌ kotow nok towu, diꞌ niyu lambinon, poꞌ sog diyalom kongkoman ku ilon koyon.” 9 Tibuwa miktaluꞌ ilon, “Awaꞌ a sog bongowan!” Doksuꞌ migabit-abit ilon song mga duma nilon, “Kanaꞌ yanin ok tow dini, sokaliꞌ ningkomun ok koleganin yanin ong mogbayaꞌ!” Dadi ok taluꞌ nilon ni Lot, “Na og inangon nami dinika labi pa tidu sog inangon nami song mga tow nu kini.” Tubus dinondol nilon si Lot, bu posunguꞌ bosiya nilon ladakon og bongowan. 10 Na binotong nog duwaꞌ kotow malaikat si Lot posunguꞌ sog diyalom baloy, bangka nilon tamboloy og bongowan. 11 Bu binuta nilon og lam nok kolakihan subul bug mogulang sog luwasan, bagun diꞌ nilon mobalak og bongowan.

Ok Poglaguy niloꞌ tidu sok Siyudad nok Sodom

12 Tinaluan nog duwaꞌ kotow si Lot, “Bilaꞌ ongon pa og lahasiyaꞌ nu dini, ong mga gumbataꞌ nu libun bug laki atawa mga momikit dinika sok siyudad kini, oyit nu og lam nilon molaguy. 13 Pogmulkaan nami na saan og bonuwa kini, poꞌ ok kolaatan nong mga towin mamaꞌ nong mosolag nog losik sumbungan posunguꞌ sok Tuhan. Saan na piangoyin ami dini mokpapas nog bonuwa kini.” 14 Dadi inangoy ni Lot og duwaꞌ kotow nog laki nong momikit posunguꞌ diyanin, bangka nin taluoy, “Pogdaliꞌ amu! Mawaꞌ ita na dini, poꞌ papason na nok Tuhan og bonuwa kini.” Sugaid daꞌ ilon tombaꞌ poꞌ baluꞌ nilon, og gansoy da ni Lot.

15 Dangan doliꞌ-ondow na, pidaliꞌ-daliꞌ na nong mga malaikat si Lot, taluꞌ nilon, “Pogdaliꞌ a, oyit nu og libun nu bug duwaꞌ kotow nog bataꞌ nu nog libun, bangka amu mogdayun awaꞌ bagun diꞌ amu mosunuꞌ papason song mulkaꞌ nong mosugat sog bonuwa kini.” 16 Dangan miganggaꞌ-anggaꞌ si Lot, inonggaydan yanin nong mga malaikat sok komot dunut libun-bataꞌ in. Inoyit nilon lumuwas tidu sog bonuwa koyon, poꞌ milolat ok Tuhan diyanin.

17 Pogluwas nilon sok siyudad koyon, sinuguꞌ ilon nok solobuk malaikat, “Pogdaliꞌ amu lumaguy, bagun diꞌ amu mongmula. Diꞌ amu lumingoy atawa lumotaꞌ sog dotagan kini. Gobok amu sok kobontud-bontudan bagun ondiꞌ amu mosunuꞌ mopapas.” 18 Sugaid tinumabal si Lot, “Anduꞌ tuwan, diꞌ u na tokodoy mokogaga. 19 Milolata sog nu bu mosolag ok kotabang nu dinami tidu sok komulahan, sugaid diꞌ u mokogaus gumobok sok kobontud-bontudan. Kalu-kalu mosautu nog balaꞌ bangka u patoy sog diꞌ u pa matong dituꞌ. 20 Tontong nu, ongon og bonuwa mikaan molani dini, popolaguy nu ami busung-busung dituꞌ, poꞌ mobeteꞌ da koyon nog bonuwa. Dadi diꞌ ami mongmula.” 21 Ok tabal nong malaikat, “Kumboyon ku ika sok pingoni nu, diꞌ u papason ong mikaan nog bonuwa koyon. 22 Na ponggobok amu na, poꞌ diꞌ u mokoinang nog olo-olo bilaꞌ diꞌ amu dumatong dituꞌ.” Ong ngalan nog bonuwa koyon, yonin na ok Soar.

Ok Poglubu nok bug Gomora

23 Na similak na og gondow dangan minatong si sog bonuwa Soar. 24 Doksuꞌ pidupian mogdayun nok Tuhan nog batu taga gapuy ok Sodom bug Gomora. 25 Dadi miampud og duwaꞌ bonuwa bug lam nok kopatagan. Mimatoy og lam nong migonong dituꞌ, sampoy og lam nong mga pomulan. 26 Na pasal sog libun ni Lot, linumingoy yanin. Poglingoyin miktimaluy yanin nok siga migbatu.

27 Poglomaꞌ doliꞌ-ondow migbuwat si bangka angoy sog bonuwa nog bakas pigabit-abitan nilon nok Tuhan Pogbayaꞌ-bayaꞌ. 28 Inoklunganin ok Sodom bug Gomora bug lam nok kopatagan. Mitongowin og landuꞌ kodikpol nog bol sog bonuwa koyon, mamaꞌ nog bol nong mosolag tokodoy nok tutung. 29 Na sog waktu nok pinapas nok Tuhan ong mga bonuwa sok kopatagan koyon, mipondomin si Ibrahim, saan na pipolaguyin siloꞌ Lot sok pigbonuwahan nilon bagun diꞌ mongmula.

Ok Pun nong mga Bangsa Moab bug Ammon

30 Na miondok si . Dadi minawaꞌ yanin sog bonuwa Soar dunut duwaꞌ kotow nog bataꞌ in nog budjang bangka pogonong sog langub sok kobontudan. 31 Na ongon gondow, miktaluꞌ og gulang bataꞌ song mongudin, “Og gommaꞌ ta mogulang na, bu daꞌdun na tokodoy og laki dini sog dunya kini nong moglibun nita bagun mogbataꞌ ita mamaꞌ nog duma.” 32 Tinaluanin ong mongudin nok polanguhon nilon og gommaꞌ nilon bagun mokopolani ilon diyanin supaya diꞌ mobolong ong mga tupuꞌ nog gommaꞌ nilon. 33 Dadi sog gobi niyon, pilangu nilon og gommaꞌ nilon. Dangan milangu na si Lot, daꞌdun na ok ponginsabutin. Doksuꞌ mikpolani og gulang bataꞌ kini sog gommaꞌ in. 34 Poglomaꞌ sinuksug nog gulang bataꞌ song mongudin og ininangin. Tubus tinaluꞌ in nok polanguhon nilon da sop og gommaꞌ nilon sog gobi koyon. Doksuꞌ ong mongud na sop ong mokpolani diyanin bagun diꞌ mobolong ong mga tupuꞌ nog gommaꞌ nilon. 35 Dadi sog gobi niyon, pilangu nilon puliꞌ og gommaꞌ nilon, bu ong mongud na sop ong mikpolani diyanin. Tibuwa daꞌdun na ok ponginsabut ni Lot.

36 Dangan maꞌ nituꞌ og ginang nilon, mibodos og duwaꞌ kotow nog bataꞌ in nog budjang. 37 Na og gulang bataꞌ migbataꞌ yanin nog laki, iningalananin Moab. Yanin ok piktiduhanan nong mga tow nog bangsa Moab. 38 Ok kongudanin sop, migbataꞌ yanin nog laki, iningalananin Ben Ammi. Yanin ok piktiduhanan nong mga tow nog bangsa Ammon.