Ponognaan 18

Ok Pokposun nok Tuhan nong Mokopogbataꞌ si Sarah

Na ongon solobuk gondow, mikpotongow puliꞌ ok Tuhan diyon ni song mokosolag nok kayuhan ni Mamre. Miningkud yanin sog bongowan nog lokow-lokowin solabu nong minit ok podos. 2 Poktontongin, sunoy pa mitongowin ok tolu kotow nog laki minindog sog gunanin. Dadi migdaliꞌ-daliꞌ si Ibrahim lumumpak dinilon, bangka sudjud tandaꞌ nok pogaddatin. 3 Miktaluꞌ yanin, “U Tuwan, bilaꞌ mololata dinakon, apita pa bosiya busung-busung dini sog nu. 4 Poyitan ta amu minsan dona mikaan nok tubig pogugas nog botis niyu, bangka amu ulali sok pun nok kayu. 5 Pagga miniyan amu ma sog gulipon niyu kini, potiyangan niyu akon mogoyit nong mokan niyu bagun lumasig-lasig og lawas niyu mopanow.” Tinumabal ilon, “Oo sigi, moksukul.”

6 Dadi migdaliꞌ-daliꞌ si Ibrahim sumolod sog lokow-lokowin bangka nin taluoy si Sarah, “Pogdaliꞌ a, alapa nong modakol nok tirigu nong mobais tokodoy, abdun nu, bangka nu imungoy nok pan.” 7 Doksuꞌ migdaliꞌ-daliꞌ na sop si Ibrahim mangoy sok pogboluyan nong mga potubuonin, bangka yanin pomiliꞌ nong mosubuk nok sapiꞌ nong mobataꞌ, bangka nin bogoyoy sok sosuguonin. Tubus sinumbaliꞌ mogdayun bangka na usibaoy nok sosuguonin. 8 Dangan milutuꞌ na ok kan kituꞌ, inoyitin na song mga towin dunut nog gatas pitogas-togas bu gatas inumon. Soliyan nilon kuman sok pun kayu, dituꞌ sop si Ibrahim miktolagad.

9 Na sinakan nilon si Ibrahim, “Ayin og libun nu nok si Sarah?” Tinumabal yanin, “Dituꞌ sog diyalom nog .” 10 Miktaluꞌ ok Tuhan, “Mokpuliꞌ u da sunud tahun, mamaꞌ nini nog waktu, bu ongon na og bataꞌ ni Sarah nog laki.” Na minginongog si Sarah song molani nog bongowan sok tolikudan nong miktaluꞌ kituꞌ. 11 Na si Ibrahim bu si Sarah mogulang na tokodoy, bu diꞌ na pogbulanon si Sarah. 12 Saan na kinotawa si Sarah sog diyalom atoyin, “Ongon pa taꞌ buwan ong napsu u nong mogulang ami na ma kini nog laki u?” 13 Dadi tinaluan si Ibrahim nok Tuhan, “Manu mikkotawa ma si Sarah bu miktaluꞌ nong mokobataꞌ pa taꞌ yanin nong mogulang na ma? 14 Ongon taꞌ buwan ong mologon sok Tuhan? Mamaꞌ na nok tinaluꞌ u, mokpuliꞌ u da dini sunud tahun mamaꞌ nini nog waktu, bu ongon na og bataꞌ ni Sarah nog laki.” 15 Na miondok si Sarah, saan na mimolilu yanin, ok taluꞌ in, “Daꞌ u le pokkotawa.” Sugaid miktaluꞌ ok Tuhan, “Mikkotawa a ba.”

Ok Pongoni ni sok Tuhan pasal sok tow bug Gomora

16 Dangan migdayun na ilon koyon, inatod ilon ni Ibrahim sampoy sok kioklungan na nilon og bonuwa Sodom. 17 Doksuꞌ sog diyalom atoy nok Tuhan, “Diꞌ u na pogbuni ni Ibrahim bug olo og inangon ku sog bonuwa Sodom, 18 poꞌ yanin ok pun nog bangsa mosolag bu mokowasa, bu tidu diyanin barakatan ku og lam nok kobangsa-bangsahan sog dunya. 19 Yanin ok piniliꞌ u bagun moktintuluꞌ song mga gumbataꞌ in bu ponupuꞌ in nong mogunut ilon sok kolegan ku, bu monginang nong mobais bug mologdong bagun mounut og janjiꞌ u diyanin.”

20 Dadi miktaluꞌ ok Tuhan dituꞌ ni Ibrahim, “Landuꞌ kolaton ok sumbungan pasal song mga tow Sodom bug Gomora, bu mobogat tokodoy ong mga nilon. 21 Saan na mangoyu dituꞌ, poꞌ poligsaon ku bug motud taꞌ atawa kanaꞌ.”

22 Doksuꞌ migdayun na og duwaꞌ kotow posunguꞌ sog bonuwa Sodom, tibuwa mikpobagak ok Tuhan diyon, bu minadap si Ibrahim diyanin. 23 Tubus mikpolani si Ibrahim sok Tuhan, bangka poktaluꞌ, “U Tuhan, sunuon nu taꞌ papason ong mokologdong nok tow song mga tow molaton? 24 Bilaꞌ buwan ongon og lima puluꞌ kotow nong mokologdong sog bonuwa koyon, pogmulkaan nu pa taꞌ? Mogdadi taꞌ kololatan nu og bonuwa koyon para sog lima puluꞌ kotow nong mologdong? 25 Tantu diꞌ nu sunuon papason ong mokologdong nok tow sok tow molaat. Tantu ondiꞌ nu popogbatukon og hukuman nu song mga tow nog daꞌdun og dusa nin sok taga dusa. Ika ong Monghuhukum song mga tow, tantu mologdong og hukuman nu.” 26 Miktaluꞌ ok Tuhan, “Bilaꞌ ongon ong mobalaku lima puluꞌ kotow mologdong sok Sodom, kololatan ku da og bonuwa koyon sabap dinilon.” 27 Miktaluꞌ si Ibrahim, “U Tuhan Pogbayaꞌ-bayaꞌ, manusiyaꞌ u da. Daꞌdun ok kopatutu mogabit-abit dinika. Ampun nu akon busung-busung, poꞌ towakkalan ku na mongoni dinika puliꞌ. 28 Bilaꞌ buwan kokulangan lima kotow og lima puluꞌ koyon nok pingoni u dinika, pogmulkaan nu pa taꞌ tokodoy og bonuwa koyon?” Tinumabal ok Tuhan, “Bilaꞌ ongon ong mobalaku pat puluꞌ bu lima kotow nong mologdong, diꞌ u na pogmulkaan og bonuwa koyon.” 29 Miktaluꞌ mokpuliꞌ si Ibrahim, “Na soupama bayuꞌ ongon da pat puluꞌ kotow nong mologdong sog bonuwa koyon?” Ok tabal nok Tuhan, “Kololatan ku og bonuwa koyon bilaꞌ ongon pat puluꞌ kotow nong mologdong diyon.” 30 Taluꞌ ni Ibrahim, “U Pogbayaꞌ-bayaꞌ, busung-busung, diꞌ a dona mogboluꞌ, poꞌ melegu pa moksak mokpuliꞌ. Na olo ma, bilaꞌ ongon da tolu puluꞌ kotow?” Ok tabal nok Tuhan, “Diꞌ u papason og bonuwa koyon bilaꞌ ongon pa tolu puluꞌ kotow.” 31 Miktaluꞌ pa si Ibrahim, “U Tuhan Pogbayaꞌ-bayaꞌ, ampun nu akon nong motowakkalu moksak. Bilaꞌ buwan soupama duwaꞌ puluꞌ kotow da ong mobalak nu?” Tinumabal ok Tuhan, “Para sog lolatu sog duwaꞌ puluꞌ kotow koyon, diꞌ u papason og bonuwa koyon.” 32 Miksak pa mokpuliꞌ si Ibrahim, “U Tuhan, diꞌ a dona mogboluꞌ, poꞌ insan ku dona kini poksak. Sowpama sopuluꞌ kotow dona ong mobalak nu dituꞌ.” Miktaluꞌ ok Tuhan, “Para sog lolatu sok sopuluꞌ kotow nong mologdong, diꞌ u pogmulkaan og bonuwa koyon.” 33 Pogdoksuꞌ nilon mogabit-abit, minawaꞌ na ok Tuhan, bu si Ibrahim sop mikpuliꞌ na sog bonuwa nin.