Og Gindanan nok Pigjanjian nok Tuhan bu ni Nabi Ibrahim
17
Dangan migumul na si Ibram siyam puluꞌ bu siyam tahun,
mikpotongow ok Tuhan diyanin bangka poktaluꞌ,
“Akon ok Tuhan nong Mokowasa.
Tombaꞌ a dinakon,
bu pokpohatula,
2 bagun kobologbogan ku ok pigjanjian ta,
bu podakolon ku tokodoy ok ponupuꞌ nu.”
3 Dadi simudjud si Ibram,
bu miktaluꞌ puliꞌ ok Tuhan,
4 “Maꞌ nini og janjiꞌ u dinika:
Imungon ku ika nog gommaꞌ nong modakol tokodoy nog bangsa.
5 Kanaꞌ na Ibram ong ngalan nu,
sugaid Ibrahima na,
poꞌ imungon ku ika nog gommaꞌ nong modakol nog bangsa.
6 Podakolon ku tokodoy ong mga ponupuꞌ nu.
Imungon ku ika nok pun nong modakol nog bangsa,
bu ong modakol nok sultan,
ika ok poktiduhan nilon.
7 Ok pigjanjian kini bologbogan ku dinika bu song mga ponupuꞌ nu soumul-tahun.
Akon tibuwa ok Tuhan niyu mokpangkat-momangkat.
8 Bogoyon ku dinika bu song mga ponupuꞌ nu og lupaꞌ nok soliyan pigonongan niyu koyon.
Dadi amu na og gapuꞌ nog lam nog lupaꞌ nok Kanaan soummul-tahun,
bu akon ok Tuhan nong mga ponupuꞌ nu.”
9 Bu tinaluan na sop nok Tuhan si Ibrahim,
“Na ika,
sumboy nu bologbogan ok pogjanjian ta kini sampoy ong mga ponupuꞌ nu mokpangkat-momangkat.
10 Yonin kini ok pogjanjian ta bug mga ponupuꞌ nu nog bologbogan niyu nok sumboy islamon ok sosuku nok kolakihan,
11 poꞌ yonin koyon og gindanan nok pogjanjian ta.
12 Dadi tidu ningkomun sumboy islamon ong mga ponupuꞌ nu nog laki mokpangkat-momangkat bilaꞌ modopot na walu ondow tidu bataoy.
Sampoy na ong mga gulipon niyu,
bisan ong mga binataꞌ sog baloy niyu bu ong mga misaluy niyu sog len-len bonuwa,
pongislamon da sop.
13 Suboy tokodoy islamon ok sosuku nok kolakihan sog diyaloman nu,
bagun ongon og gindanan nong motongow niyu sog lawas niyu nog ok pigjanjian ta kini mogot soumul-tahun.
14 Na bilaꞌ ongon ok solobuk laki nog ondaꞌ koleg islamon,
na ondiꞌ yanin moitung nok sukuꞌ u,
poꞌ binoluba nin ok pigjanjian ta.”
15 Tinaluan na sop nok Tuhan si Ibrahim,
“Na pasal sog libun nu nok si Saray,
tidu ningkomun,
Sarahb na ong ngalanin,
kanaꞌ na Saray.
16 Barakatan ku yanin,
bu bogoyan ku ika nog bataꞌ nog laki tidu diyanin.
Barakatan ku yanin,
bu moimung yanin nog ginaꞌ nong modakol nog bangsa,
bu moongon ong mga sultan moktidu diyanin.”
17 Dadi simudjud si Ibrahim bangka pokkotawa soliyanin mogniyat,
“Mokobataꞌ u pa taꞌ nok sogatus na og gumulu?
Bu si Sarah,
mokobataꞌ pa taꞌ nok siyam puluꞌ na og gumulin?”
18 Tubus miktaluꞌ si Ibrahim sok Tuhan,
“U Tuhan,
bung mayan barakatan nu si Ismael!”
19 Miktaluꞌ ok Tuhan,
“Oo,
sugaid mokopogbataꞌ da og libun nu nok si Sarah nog laki bu ingalanan nu yanin Isahak.c
Poogoton ku diyon diyanin ok pigjanjian ta sampoy na song mga ponupuꞌ in soumul-tahun.
20 Na pasal ni Ismael,
bogoyon ku da ok pingoni nu,
barakatan ku yanin,
bu podakolon ku tokodoy ok tupuꞌ in.
Moimung yanin nog gommaꞌ nok sopuluꞌ bu duwaꞌ datuꞌ bu imungon ku yanin nong mosolag nog bangsa.
21 Sugaid bologbogan ku ok pigjanjian ta sog bataꞌ nu nok si Isahak,
yonin na og bataon ni Sarah sok sunud tahun,
mamaꞌ da sop nog waktu kini.”
22 Pogdoksuꞌ taluoy nok Tuhan si Ibrahim,
na minawaꞌ na yanin.
23 Dadi sog gondow koyon,
inalap ni Ibrahim og bataꞌ in si Ismael bug lam nok piktowanin nog laki,
minsan binataꞌ ilon sog baloyin atawa misaluy,
bangka ilon islamoy kotanan mamaꞌ na nok tinaluꞌ nok Tuhan.
24 Si Ibrahim siyam puluꞌ bu siyam tahun og gumulin dangan inislam yanin,
25 bu og bataꞌ in nok si Ismael sopuluꞌ bu tolu tahun.
26 Dadi inislam si Ibrahim bug bataꞌ in nok si Ismael sog gondow koyon
27 dunut nog lam nok piktowanin nok kolakihan.