Pasal ni Hadjar bu ni Ismael
16
Na og libun ni Ibram nok si Saray,
ondiꞌ mokobataꞌ.
Tibuwa ongon og guliponin,
ong ngalanin si Hadjar,
ok tow Misir.
2 Ok taluꞌ ni Saray ni Ibram,
“Dang,
tontong nu ba,
tidu na sok kolegan nok Tuhan og diꞌ u mokopogbataꞌ.
Bilaꞌ buwan poglibunon nu og gulipon ku?
Kalu-kalu mokobalak ita nog bataꞌ tidu diyanin.”a
Tinumombaꞌ si Ibram sok tinaluꞌ nog libunin.
3 Saan na inalap ni Saray si Hadjar bangka nin polakihoy ni Ibram.
Sog waktu nok piglibun ni Ibram si Hadjar,
sopuluꞌ tahun na ilon migonong sok Kanaan.
4 Dadi miksolobuk na ilon,
doksuꞌ migbodos na si Hadjar.
Dangan kiosunanin nong migbodos yanin,
pibabaꞌ-babaꞌ in si Saray.
5 Na miktaluꞌ si Saray ni Ibram,
“Dang,
ika ok sabapan saan na pibabaꞌ-babaꞌ u nog gulipon ku.
Tidu dinakon nok pilibunan ku ika diyanin,
sugaid dangan migbodos tibuwa yanin,
pibabaꞌ-babaꞌ in na akon.
Tuhan dona ong mokosun dinita.”
6 Ok taluꞌ ni Ibram,
“Dang,
tontong nu ba,
ika da ong migbayaꞌ sog gulipon nu,
inang nu na tibuwa ok kolegan nu.”
Na linogon ni Saray si Hadjar,
saan na milaguy yanin.
7 Mikodopot yanin sok tubudan nog ginlupaan mimala dituꞌ sog dalan posunguꞌ sok Sur.
Na inangoy yanin nong malaikat nok Tuhan.
8 Tinaluanin si Hadjar,
“Hadjar,
gulipon ni Saray,
ayin ka tidu,
bu ayin ka posunguꞌ?”
Ok tabalin,
“Milaguyu tidu sog gamu u nok si Saray.”
9 Taluꞌ nong malaikat nok Tuhan,
“Pokpuliꞌ a dituꞌ sog gamu nu,
bangka a pokpobabaꞌ diyanin.”
10 Bu tinaluꞌ in pa,
“Podakolon ku tokodoy ong mga ponupuꞌ nu,
boyaan ondiꞌ moitung ok kodakolin.
11 Ika koyon og bodosa,
bu ondiꞌ na mobon mogbataꞌ a nog laki.
Ingalanan nu yanin Ismael,b
poꞌ midongog nok Tuhan nok kilogonan ka.
12 Og bataꞌ nu koyon moimung mamaꞌ nok kudaꞌ gulangan.
Sumaggaꞌ yanin song mga tow,
bu ong mga tow sumaggaꞌ da sop diyanin.
Diꞌ yanin mokopoksolobuk nok pogbonuwahan bug mga lahasiyaꞌ in.”
13 Dadi iningalananin ong migabit-abit diyanin kituꞌ,
“Ika ok Tuhan nong miktontong.”
Na sog diyalom atoy ni Hadjar,
“Totubuꞌ u pa taꞌ kini,
bisan mitongowu na ong miktontong na asal dinakon?”
14 Saan na ok timbaꞌ sog bonuwa koyon iningalanan nog Ber Lahay Roi,
yonin na “Ok Timbaꞌ nok Solama-lama Ongon,
ong Miktontong dinakon.”
Mibotang ok timbaꞌ koyon sog lot nok Kades bug Bered.