Ponognaan 15

Og Janjiꞌ nok Tuhan diyon ni Ibram

Pogdoksuꞌ nituꞌ midongog ni Ibram ok taluꞌ nok Tuhan song mamaꞌ hantang toginoponin, ok taluꞌ in,

“Diꞌ a mondok Ibram!

Akon ok ponagang nu,

bu podakolon ku ok tumbasu dinika.”

2 Sugaid, ok taluꞌ ni Ibram, “U Tuhan Pogbayaꞌ-bayaꞌ, olo ok kobalan nok tumbas nog bogoyon nu dinakon? Daꞌdun doma og bataꞌ u, daꞌdun da ok kopusakaan ku dun, muwal ok sosuguon ku nok si Elieser taga Damaskus.” 3 Bu tinaluꞌ in pa, “Daꞌ nu akon bogoyoy nok tupuꞌ, saan na solokotow da tidu sok piktowan ku ok kopusakaan ku nok pongartaꞌ u.” 4 Sugaid miktaluꞌ puliꞌ ok Tuhan diyanin, “Kanaꞌ si Elieser ok kopusakaan nong mga pongartaꞌ nu, sugaid og bataꞌ nu tokodoy.”

5 Na inoyit yanin nok Tuhan sog luwasan, bangka taluoy, “Tongaloy nu ong mga bitun sog langit, itung nu bilaꞌ moitung nu taꞌ. Na mamaꞌ niyon ok kodakol nong mga ponupuꞌ nu.” 6 Dadi mingandol si Ibram sok tinaluꞌ nok Tuhan diyanin, bu pasal niyon initungin yanin nong mologdong.

7 Doksuꞌ tinaluan yanin nok Tuhan, “Akon ok Pogbayaꞌ-bayaꞌ ong migoyit dinika posunguꞌ dini tidu sok siyudad nog Ur, ok sakup nok Kaldeya, bagun mobogoyu dinika og ginlupaan kini sukuꞌ nu.” 8 Tinumabal si Ibram, “U Pogbayaꞌ-bayaꞌ, ponoy kokosun ku og lupaꞌ kini ok sukuꞌ u dodaꞌ?” 9 Tinaluan yanin nok Tuhan, “Oyitan nu akon nok solobuk kambing libun, nog laki bug dumalaga nok sapiꞌ, nok totolu tahun pa og gumul nilon, bu pogoyita sop nok tikmun bug kolopati.” 10 Dadi inoyit ni Ibram sok Tuhan og lam nok potubuon koyon, bangka nin sumbalioy. Doksuꞌ binolaꞌ in tongaꞌ, bangka nin pogluyud-luyudoy bu pipoksunguꞌ in ok sobolaꞌ-posobolaꞌ nong mga potubuon koyon. Og duwaꞌ buk manuk-manuk da og ondaꞌ in bolaoy tongaꞌ. 11 Dangan dumapal bosiya ong mga guwak poꞌ kuman nong mga bangkoy nok potubuon, na binugow ni Ibram.

12 Poksindop nog gondow, pianok si Ibram, bu sunoy pa kiondokan na tokodoy yanin bu dinungmaan yanin nog landuꞌ kodolom.

13 Doksuꞌ tinaluan mokpuliꞌ si Ibram nok Tuhan, “Taluon ku dinika, tantu lomaꞌ-dinglag ong mga ponupuꞌ nu mogonong sog len bonuwa. Uliponon ilon diyon bu daugdaugon sog bon nok pat gatus tahun. 14 Sugaid binsanaon ku da og bangsa nong mongulipon dinilon. Doksuꞌ niyon, mokogonat ong mga ponupuꞌ nu dunut nong modakol nok pongartaꞌ. 15 Na pasal dinika, popayaton ku og gumul nu, mosannang ok kopatoy nu, bu kubulon ka nong mogulang na. 16 Sugaid ong mga ponupuꞌ nu mokopuliꞌ ilon dini. Sumboy na mokobiyan ok pat gatus tahun, poꞌ og nog bangsa Amur, ong migonong na asal sok , kanaꞌ pa mopatut binsanaon. Sugaid bilaꞌ moglanduꞌ na og dusa nilon, pawaon ku na ilon.”

17 Dangan simindop na og gondow bu modolom na, sunoy pa mikotongow si Ibram nong mamaꞌ nok kulon nong migbol bug suluꞌ nong miksuliyab miniyan sok pigolotan nok sinumbaliꞌ bu binolaꞌ in kituꞌ. 18 Dadi sog waktu tokodoy koyon, piongon nok Tuhan ok dituꞌ ni Ibram, ok taluꞌ in, “Bogoyon ku song mga ponupuꞌ nu og bonuwa kini, moktidu sok subaꞌ nong posunguꞌ sok subaꞌ mosolag nog Alpurati, 19 bug ayin ok pigonongan nong mga tow Ken, Kenis, Kadmon, 20 Hit, Peris bug mga tow Repa, 21 Amur, Kanaan, Girgas bug Yebus.”