Misaggow siloꞌ Lot
14
Na song masa nituꞌ ongon ok pat kotow nok sultan,
Si Sultan Amrapel sog bonuwa nog Babilonya,
si Sultan Aryok sog Elasar,
si Sultan Kedor-laomer sog Elama bu si Sultan Tidal sog Goyimb.
2 Inonggat nilon mogbunuꞌ og lima kotow nok sultan,
si Sultan Bera sok siyudad nok Sodom,
si Sultan Birsa sok siyudad nog Gomora,
si Sultan Sinab sog Adma,
si Sultan Semeber sok Seboyim,
bu ok Sultan sog Bela,
yonin na og bonuwa nok Soar.
3 Dadi miksolobuk og lima kotow nok sultan kini,
sampoy ong mga sundalu nilon dituꞌ sok kopatagan nok Siddim,
yonin na sog waktu ningkomun iningalanan nog Dagat Patoy.c
4 Tagnaꞌ pigbayaan ni Sultan Kedor-laomer og lima kotow nok sultan kini sog bon nok sopuluꞌ bu duwaꞌ tahun,
sugaid dangan midopot sopuluꞌ bu tolu tahun,
mingatu na ilon dun.
5 Dadi sog ikosopuluꞌ bu pat tahun,
minatong si Kedor-Laomer bug duma nin nong mga sultan bangka nilon bunuoy bu dinag nilon og bangsa Repa sog bonuwa Asterot Karnaim,
bangsa Sus sog bonuwa Ham bug bangsa Em sog bonuwa Sabe Kiryataim.
6 Mialap nilon da sop og bangsa Hor sok kobukidan nog bonuwa Edomd sampoy sog El Paran sok kilid nog ginlupaan mimala.
7 Tidu dituꞌ linumikoꞌ ilon bu midopot sog Enmispat nog yonin na ok Kades,
bu inagow nilon og lam nog ginlupaan nog bangsa Amalek bu sog bangsa Amur nong migonong sog Hasason Tamar.
8 Dadi miksolobuk ong mga sultan sok Sodom,
Gomora,
Adma,
Seboyim bug Bela,
bu pidinsamaꞌ nilon ong mga sundalu nilon dituꞌ sok kopatagan nok Siddim.e
Mingatu ilon mogbunuꞌ
9 niloꞌ Sultan Kedor-Laomer bug kodumahanin.
Dadi og lima kotow sultan migbunuꞌ bug pat kotow sultan.
10 Na sog bonuwa koyon,
modakol og luwang nok kitlan.
Dangan midinag og lima kotow nok sultan,
milaguy ong mga sultan nok Sodom bug Gomora dunut mga sundalu nilon tidu sok pogbunuan,
bangka kolabuꞌ ok kodumahan nilon song mga luwang koyon.
Og duma mikopolaguy posunguꞌ sok kobontudan.
11 Dadi pingalap niloꞌ sultan Kedor-Laomer ong mga gartaꞌ bug kan nong mibalak nilon sok Sodom bug Gomora.
12 Inalap da sop nilon si Lot,
ok komanak ni Ibram,
poꞌ dituꞌ sop yanin sok Sodom migonong,
bu inoyit nilon ong mga pongartaꞌ in bangka ilon awaꞌ.
13 Sugaid,
ongon ong mikopolaguy bu mikopoksuksug ni Ibram pasal sok kibiyan-biyanan koyon.
Na si Ibram,
og bangsa nin Ibrani.
Sog waktu koyon dituꞌ yanin migonong song mga mokosolag nok kayuhan ni Mamre nok tow Amur.
Si Mamre bu ong mga gilugin nok siloꞌ Eskol bug Aner,
na ilon na koyon og duma ni Ibram moktinabangoy.
14 Dangan midongog ni Ibram nong misaggow ok komanakin nok si Lot,
pitawagin mogdayun ok tolu gatus bu sopuluꞌ bu walu nok piktowanin nok kosaligan mogbunuꞌ.
Sinumolag ilon koyon diyon sog diyalomanin.
Doksuꞌ ginonat nilon tuyukoy ok pat kotow nok sultan bug mga sundalu nilon sampoy sog bonuwa nog Dan.
15 Poglogobi binahagiꞌ ni Ibram ong mga piktowanin,
bangka nilon bunuoy bu midinag nilon ong mga banta nilon nok siloꞌ sultan Kedor-Laomer.
Doksuꞌ ginonat nilon ong mga banta nilon toktob sog bonuwa Hoba sog gunan pa nog Damaskus.
16 Mibawiꞌ ni Ibram ok komanakin nok si Lot sampoy na ong mga duma nok tow,
libun-laki nok sinaggow niloꞌ sultan Kedor-Laomer bug lam nong mga pongartaꞌ nilon.
Ok Pongoni-ngoni ni Malkisedek nog Barakat para ni Ibram.
17 Dangan dinag siloꞌ sultan Kedor-Laomer,
minuliꞌ na siloꞌ Ibram.
Poguliꞌ nilon,
linumpak yanin nok sultan sok siyudad nok Sodom sok kopatagan nok Sabe,
nok tinawag nok Kopatagan nok Sultan.
18 Linumpak sop yanin ni Malkisedek,
ok sultan sok siyudad nok Salam.
Si Malkisedek kini gimam da sop yanin nok Tuhan Mahatinggi.
Migoyit yanin nok pan bug tubig anggul.
19 Na mingoni-ngoni yanin nog barakat para ni Ibram bu miktaluꞌ,
“Barakatan ka Ibram nok Tuhan Mahatinggi
ong migimung nog langit bug lupaꞌ,
20 Bu pudjihon ok Tuhan Mahatinggi,
nok pipomondagin ika song mga banta nu.”
Dadi og lam nog gartaꞌ nong mialap ni Ibram,
binogoyin og ikosopuluꞌ bahagiꞌ dituꞌ ni Malkisedek.
21 Na ok sultan sok Sodom,
tinaluanin si Ibram,
“Uliꞌ nu tibuwa dinakon ong mga piktowan ku,
sugaid dinika na og lam nog gartaꞌ u nong mibawiꞌ nu.”
22 Dadi tinumabal si Ibram,
“Sumapa u sok Tuhan Mahatinggi,
ong migimung nog langit bug lupaꞌ
23 nog diꞌ u malap nong mga olo-olo tidu sok pongartaꞌ nu,
bisan soputuk salban atawa gikot nok tolumpaꞌ nu,
bagun diꞌ a mokotaluꞌ nog ika ong mikopodaya dinakon.
24 Daꞌdun og alapon ku,
luwal song miokan nok piktowan ku.
Tibuwa bahagioy nu ong mga duma u,
yonin na siloꞌ Aner,
Eskol bug Mamre.”