Ok Poksuwoy ni Ibram bu ni Lot
13
Dadi minawaꞌ si Ibram tidu song Misir.
Mipanow yanin posunguꞌ song Negeb dunut libunin bu si Lot,
bu inoyitin ong mga pongartaꞌ in.
2 Na dayahan na tokodoy si Ibram.
Modakol na og bulawan,
silber bug mga potubuonin.
3 Doksuꞌ mikpinda-pinda ilon tidu song Negeb,
posunguꞌ sog bonuwa nog Betel.
Midopot nilon ok pikpotindogan nilon nong mga lokow-lokow tagnaꞌ sog lot nog Betel bug Ay.
4 Yonin na og bonuwa nog inimungan ni Ibram nok pokkurbanan tagnaꞌ,
bu simabbut yanin sok Tuhan diyon,
bangka nin pudjihoy.
5 Na si Lot kituꞌ nog dunut ni Ibram,
modakol da sop ong mga bilibili nin,
kambing,
sapiꞌ bug lokow-lokow song mga piktowanin.
6 Kobalan nok kodakol nong mga potubuon,
na ondiꞌ ilon mogdadi moksolobuk nok pogonongan poꞌ kulang ok sigbot para song mga potubuon nilon sog bonuwa koyon.
7 Saan na moksuwal-suwal ong mga mogogipat nong mga potubuon ni Ibram bu ni Lot. Sog waktu niyon ongon sop og bangsa Kanaan bug bangsa Peris migonong sog bonuwa koyon.
8 Dadi inabit-abit ni Ibram si Lot,
taluꞌ in,
“Toꞌ,
ondiꞌ bosiya mobais moksuwal-suwal ita bug piktowan ta,
poꞌ moggusba ita da.
9 Moliwag da og bonuwa,
dadi golom pa moksuwoy ita na.
Pokpiliꞌ a busung-busung bug ayin tampal ok kolegan nu mokposunguꞌ.
Bilaꞌ sog bibanga,
mokpolintu u,
bilaꞌ sog lintu a,
mokpobibangu.”
10 Dadi migliling-liling si Lot,
bu mitongowin nong mobais ok kopatagan sok subaꞌ nog Jordan,
poꞌ modakol ok tubigin.
Ok kobaisin mamaꞌ nog bonuwa Edena bug bonuwa Misir.
Sog waktu koyon,
daꞌ pa lubuhoy nok Tuhan ong mga lungsud nok Sodom bug Gomora.
11 Saan na piniliꞌ ni Lot og lam nok kopatagan nog Jordan bangka yanin panow posunguꞌ sok tampal silangan.
Maꞌ niyon ok piksuwoyan nilon ni Ibram.
12 Mikpobagak si Ibram sok Kanaan,
sugaid si Lot migonong sok kopatagan molani song mga lungsud,
bangka yanin pokpinda-pinda posunguꞌ sok siyudad nok Sodom.
13 Sugaid ong mga tow sok Sodom molaton og ginang nilon bu landuꞌ kosolag og dusa nilon sok Tuhan.
Ok Poglalin niloꞌ Ibram sog Bonuwa nog Hebron
14 Dangan minawaꞌ na si Lot,
miktaluꞌ ok Tuhan ni Ibram,
“Liling nu pahatul og bonuwa sog lumibut nu.
15 Og lam nog ginlupaan nong modopot nok ponontong nu,
bogoyon ku dinika bu song mga ponupuꞌ nu soummulan.
16 Podakolon ku ok ponupuꞌ nu mamaꞌ nog bogombun kodakol nog diꞌ moitung.
17 Na panowa bu ulit nu og ginlupaan koyon,
poꞌ bogoyon ku dinika og lam niyon.”
18 Doksuꞌ pininda ni Ibram og lokow-lokowin bangka pogonong song molani nong mosolag nong mga kayu ni Mamreb dituꞌ sog bonuwa nog Hebron.
Tubus migimung sop yanin dituꞌ nok pokkurbanan para sok Tuhan.