Ok Kowapat ni Sarah bu ok Poksaluy ni Nabi Ibrahim nok Pongubulan
23
Na pasal ni Sarah,
simaut na yanin sok pongumulan nok sogatus bu duwaꞌ puluꞌ bu pitu tahun,
bangka yanin patoy.
2 Dituꞌ yanin minatoy sog bonuwa Kiryat Arba,
yonin na og bonuwa Hebron ningkomun sog bonuwa Kanaan.
Dadi mikkorukkaan bu miksogow si Ibrahim pasal sog libunin.
3 Doksuꞌ binagakin soliyan og bangkoy nog libunin,
bangka yanin angoy song mga tow Hit.
Pogdatongin dituꞌ,
miktaluꞌ yanin,
4 “Mga Tuwan,
akon kini,
kanaꞌ u ok tow dini.
Na bilaꞌ mogdadi posaluy niyu akon nog lupaꞌ nok pokkubulan ku nog libun ku.”
5 Ok tabal nong mga tow Hit ni Ibrahim,
6 “Tuwan,
yonin kini ong motabal nami dinika,
ika koyon solobuk kounutan nong motas para dinami.
Na suboy nu kubulon og libun nu sok kinobaisan nok kubulan sog bonuwa nami.
Ayin-ayin na ong mopiliꞌ nu nog lupaꞌ,
diꞌ nami da inugunana dinika.”
7 Pogdoksuꞌ nituꞌ minindog na si Ibrahim bangka rukuꞌ gindanan nok poksarang-sukulin song mga tow Hit nog asal migbonuwa dituꞌ.
8 Miktaluꞌ yanin dinilon,
“Bilaꞌ duhulan niyu da akon nok kubulon ku og libun ku dini,
ongon pa bosiya ok pongonihon ku diniyu.
Oyit niyu pa mogabit-abit si Epron og bataꞌ ni Sohar
9 pasal sog langubin sok sung-sung nog guma nin song Makpela.
Pongoni niyu pa diyanin nok poksaluyin na dinakon og langub koyon.
Doksuꞌ bayadan ku yanin nog halgaꞌ in tokodoy dini sog gadapan niyu bagun niyu kosaksian.
Yonin na kituꞌ og imungon ku nok pongubulan.”
10 Sokaliꞌ si Epron kini soliyan migingkud diyon sok poglimudan dunut nok pokkahi nin tow Hit sog bongowan nok siyudad.
Tinabalin si Ibrahim nong midongog nog lam nilon.
11 Taluꞌ ni Epron,
“Tuwan,
kanaꞌ maꞌ niyon.
Bogoyon ku dinika og guma u song Makpela sampoy na og langubin.
Saksiꞌ og lam nok tow salu bangsa u dini nok pogbogoyu dinika.
Mogdadi nu na kubulon og libun nu.”
12 Dadi rinumukuꞌ na sop si Ibrahim song mga tow Hit.
13 Doksuꞌ tinaluanin pa si Epron nong midongog nog lam nilon.
Taluꞌ in,
“Maap nu dona akon,
bilaꞌ buwan bayadan ku na dinika og guma sampoy na og langub nu.
Tabukon nu taꞌ og bayadu bagun mokubulu na og libun ku dituꞌ?”
14 Ok tabal ni Epron ni Ibrahim,
15 “Tuwan,
daꞌdun da dinita og halgaꞌ nok pat gatus tibuk silber nog guma bug langub koyon.
Kubul nu na tibuwa og libun nu.”
16 Dadi inaku ni Ibrahim.
Tinimbanganin si Epron pat gatus tibuk silber,
poꞌ yonin kituꞌ ong mitaluꞌ diyanin sok kodakolan nok tow.
Pibatuk ni Ibrahim ok poktimbangin nok silber koyon sok poktimbang nong mga tow mogdodagang.
17 Na tidu nituꞌ og guma ni Epron song Makpela,
yonin na ok tampal sok silangan nog bonuwa Mamre,
mikangoy na ni Ibrahim.
Misunuꞌ na og langub bug kayuhan sok koliwagan nog lupaꞌ koyon.
18 Kisaksian na nok tow Hit,
og lam nong mikampuꞌ sok poglimudan kituꞌ,
nok si Ibrahim na og gapuꞌ nog lupaꞌ kituꞌ.
19 Pogdoksuꞌ nituꞌ kinubul na ni Ibrahim og libunin sog langub song Makpela,
ok sakup nog bonuwa Kanaan.
Na ong Makpela mibotang sok silangan nog bonuwa Mamre,
yonin na og Hebron ningkomun.
20 Dadi og guma bug langub koyon nok tow bangsa Hitb mikangoy na ni Ibrahim.
Bu og langub kituꞌ yonin na og inimungin nok pongubulan.