Ponognaan 24

Pasal sok Kopoglibun ni Isahak

Na ginumulang na tokodoy si , bu binarakatan yanin nok Tuhan sog lam nog ininangin. 2 Ongon solobuk gondow, tinaluan ni Ibrahim ok sosuguon nog inuwakilanin nog lam nog gartaꞌ in, ok taluꞌ in, “Botang nu ok komot nu sog diyalom nok pa u, 3 poꞌ posapahon ku ika song ngalan nok Tuhan Pogbayaꞌ-bayaꞌ, ong Mikpoongon nog langit bug lupaꞌ. Diꞌ nu polibunan og bataꞌ u sog libun nok taga dini sog bonuwa . 4 Sugaid angoya sog bonuwa nok piktiduhan ku, bangka nu ponontongoy si Isahak nong mopoglibunin tidu song mga lahasiyaꞌ u.” 5 Na ok tabal nok sosuguonin, “Olohon ma bilaꞌ ondiꞌ mogunut og libun dini, oyiton ku na taꞌ tibuwa si Isahak dituꞌ?” 6 Taluꞌ ni Ibrahim, “Amoy-amoy dinika, diꞌ nu oyiton og bataꞌ u dituꞌ! 7 Poꞌ ok Pogbayaꞌ-bayaꞌ, ok Tuhan sok , pipolayuꞌ in akon tidu song mokogulang-gilugu bu sog bonuwa nong mga lahasiyaꞌ u, bu jinanjianin akon nog bogoyonin og bonuwa kini song mga ponupuꞌ u. Podunutonin da dinika ong malaikatin bagun mokobalaka nong mopoglibun nog bataꞌ u. 8 Tibuwa bilaꞌ diꞌ meleg og libun mogunut dinika, na puwasa na sok poksapahan. Sugaid sumboy diꞌ nu tokodoy oyiton og bataꞌ u dituꞌ.” 9 Dadi binotang na nok sosuguon kini ok komotin sok pa ni Ibrahim, bangka nin sapahoy ok pasal sog ginang kini.

10 Doksuꞌ minalap ok sosuguonin nok sopuluꞌ buk guntaꞌ bangka nin lulanoy nog ginisan nong mokohalgaꞌ nong molumpak-lumpak tidu ni Ibrahim. Puwas nituꞌ mipanow na ilon posunguꞌ sog Aram Naharaym sok siyudad nok pigbonuwahan ni Nahor, og gilug ni Ibrahim.

11 Ok pogdatong nilon dituꞌ, lolabung na tokodoy, bu waktu na nok pogalap nok tubig nong mga kolibunan sok siyudad koyon. Na piloku nok sosuguon ong mga guntaꞌ song molani nok timbaꞌ sog luwasan nok siyudad.

12 Mingoni-ngoni yanin sok Tuhan, “U Pogbayaꞌ-bayaꞌ, ok Tuhan da sop nog gamu u nok si Ibrahim. Pongonihon ku dinika bung mayan duhulon nu dinakon og gawoyu sog gondow kini bu potongowon nu da ok kolasa-kololat nu sog gamu u. 13 Dini u na minindog song molani nok timbaꞌ kini. Linumuwas na sok siyudad ong mga kobudjangan bagun mongalap nok tubig. 14 Mogonggotu minum sok solokotow budjang. Na bilaꞌ taluonin, ‘Inuma, bu poinumon ku da sop ong mga guntaꞌ nu,’ bung mayan yonin na kituꞌ ong mipiliꞌ nu nong mopoglibun nog nu nok si Isahak. Bilaꞌ mamaꞌ niyon ok pobiyan nu, kosunan ku na nok pitongow nu ok kolasa-kololat nu sog gamu u nok si Ibrahim.”

15 Na sog daꞌ pa yanin kodoksuꞌ mongoni-ngoni sok Tuhan, ongon ok solokotow budjang mikposunguꞌ sok timbaꞌ, mikpisan nog banggaꞌ-banggaꞌ. Ong ngalanin si Ribeka, bu og gommaꞌ in si Betuel og bataꞌ ni Nahor bu ni Milka. Si Nahor, yonin na og gilug ni Ibrahim. 16 Molingkat tokodoy si Ribeka bu budjang pa yanin. Na dimiksun yanin sok timbaꞌ, bangka nin ungodoy nok tubig og banggaꞌ-banggaꞌ in, doksuꞌ tinumukad yanin mokpuliꞌ.

17 Dadi migdaliꞌ-daliꞌ lumumpak ok sosuguon diyanin bangka poktaluꞌ, “Anduꞌ buweꞌ, mogdadi taꞌ poinum nu pa akon?” 18 Ok tabal ni Ribeka, “Oo Bapaꞌ, inuma na.” Dadi pibabaꞌ in mogdayun og banggaꞌ-banggaꞌ in bangka nin pinumoy ok sosuguon kituꞌ. 19 Pogdoksuꞌ in mokpoinum, miktaluꞌ yanin, “Sagukan ku sop nok tubig ong mga guntaꞌ nu toktob song mokinum og lam nilon.” 20 Dadi migdaliꞌ-daliꞌ yanin, binuyusin ok samaꞌ nok tubig sog banggaꞌ-banggaꞌ dituꞌ sok poginuman nong mga potubuon. Mikpuliꞌ-puliꞌ yanin malap nok tubig, toktob song mitipotin pinumoy og lam nog guntaꞌ. 21 Na ondaꞌ poglogonek ok sosuguon ni Ibrahim. Piglonglonganin tibuwa si Ribeka bagun kosunanin bug dinuhul da taꞌ diyanin nok Tuhan og gawoyin. 22 Pogdoksuꞌ minum nong mga guntaꞌ, piluwas nok sosuguon og goyitin nok ponampong bulawan para sok sung, mga nom gramu og bogatin, bug duwaꞌ buk gallang bulawan mga sogatus bu duwaꞌ puluꞌ gramu og bogatin para sog bingkonin. 23-25 Doksuꞌ miksak yanin, “Buweꞌ, sima a bataoy?” Tinumabal si Ribeka, “Og gommaꞌ u si Betuel, og bataꞌ ni Nahor bu ni Milka.” Miksak puliꞌ ok sosuguon, “Mogdadi taꞌ dituꞌ ami pogulabung bug kodumahan ku sog baloy niyu?” Ok tabal ni Ribeka, “Oo, ongon da ok kotulugan niyu dituꞌ dinami, bu pogbolilidan bug ponganon para song mga guntaꞌ niyu.”

26 Dadi simudjud mogdayun ok sosuguon kini bangka nin pudjihoy ok Tuhan. 27 Taluꞌ in, “Pudjihon ka, u Pogbayaꞌ-bayaꞌ, ok Tuhan da sop nog gamu u nok si Ibrahim, nog daꞌdun ok toktoban nok kolasa bug kololat nu sog gamu u, poꞌ pitontulan nu akon sog bonuwa nog lahasiyaꞌ in kini.”

28 Tubus ginumobok muliꞌ si Ribeka, bangka nin posunoy sog ginaꞌ in bug mga salu baloyin sabap song miinang diyanin. 29-30 Na ongon og gilug ni Ribeka nog laki ong ngalanin si Laban. Dangan mitongowin ok ponampong sok sung bug gallang sog bingkon ni Ribeka, bu midongogin ok suksugan pasal sok tow koyon, ginumobok yanin sok timbaꞌ. Pogdatongin dituꞌ, mitongowin ok tow kituꞌ migindog-indog song molani nok timbaꞌ dunut nong mga guntaꞌ in. 31 Taluꞌ ni Laban sok tow koyon, “U Bapaꞌ, binarakatan ka nok Tuhan! Manu dini amu ma migindog-indog? Alung, pogunut amu dinakon sog baloy, poꞌ pidinsamaꞌ u na ok tulugan niyu bug pogulalihan nong mga guntaꞌ niyu.”

32 Dadi migunut ok sosuguon bug kodumahanin diyon ni Laban. Pogdatong nilon sog baloy, pingawas na ong mga lulan song mga guntaꞌ bangka ilon binogoyan nok pogbolilidan bug ponganon. Inoyitan sop nok tubig ok sosuguon bug mga duma nin, pokpongugas nog botis nilon. 33 Dangan binotangan na ilon nok kan, miktaluꞌ ok sosuguon ni Ibrahim, “Diꞌ u sokaliꞌ kuman bilaꞌ diꞌ u moposampoy og gawoyu,” Tinumabal si Laban, “Oo Bapaꞌ, taluoy nu ami bug olo og gawoy nu dini.”

34 Dadi miktaluꞌ ok sosuguon koyon, “Akon kini ok sosuguon ni Ibrahim. 35 Binarakatan tokodoy nok Tuhan og gamu u, bu dayahan na yanin. Binogoyan yanin nok Tuhan nong modakol nong mga , kambing, sapiꞌ, guntaꞌ, kudaꞌ, bu modakol da sop og bulawan bug bug mga sosuguonin libun bug laki. 36 Na pasal sog libun ni Ibrahim nok si mula , dangan mogulang na, mikobataꞌ pa yanin nog laki. Dadi og lam nog gartaꞌ nog gamu u nok si Ibrahim, pipusakaꞌ in sog bataꞌ nilon koyon. 37 Na pisapa nin akon, bu pingamoy-amoyin nog ondiꞌ u polibunan og bataꞌ in sok tow Kanaan, yonin na ok pigononganin. 38 Sugaid, sinuguꞌ in akon mangoy sog bonuwa nog gommaꞌ in, bangka u ponontong nong mopoglibun nog bataꞌ in song mga lahasiyaꞌ in. 39 Na ok saku sog gamu u, ‘Olohon ma bilaꞌ ondiꞌ moleg mogunut dinakon og libun mokpuliꞌ dini?’ 40 Ok tabal nog gamu u, ‘Ok Tuhan og inunutu, podunutonin da ong malaikatin, bagun nu moalap og gawoy nu nong mogoyit dini nong mopoglibun nog bataꞌ u tidu song mga lahasiyaꞌ nog gommaꞌ u.’ 41 Sugaid, ok taluꞌ nog gamu u, bilaꞌ mangoyu song mga lahasiyaꞌ in, sokaliꞌ diꞌ nilon kumboy nog oyiton ku og bataꞌ nilon, na puwasu na sok piksapahan ku kituꞌ.

42-43 Dadi pogdatongu koyna sok timbaꞌ, migindog-indogu song molani nin bangka u pongoni-ngoni sok Pogbayaꞌ-bayaꞌ, ok Tuhan da sop nog gamu u nog bung mayan duhulonin da dinakon og gawoyu. Miktaluꞌ u nog bilaꞌ ongon og budjang mangoy dituꞌ sumaguk, mongoni u nok tubig inumon tidu sog banggaꞌ-banggaꞌ in. 44 Na mingoni-ngoni u nog bilaꞌ pinumonin akon, bu sigobanin da sop ong mga guntaꞌ u, na yanin na kituꞌ og libun nong mipiliꞌ nok Tuhan para sog bataꞌ nog gamu u. 45 Soliyan ku pa mongoni-ngoni sok Tuhan sog diyalom pongatoyan ku, minatong si Ribeka mikpisan nog banggaꞌ-banggaꞌ in posunguꞌ sumigob sok timbaꞌ. Dangan muliꞌ na yanin, migonggotu minum nok tubig. 46 Na pibabaꞌ in mogdayun og banggaꞌ-banggaꞌ in tidu sog baga nin bangka yanin poktaluꞌ, ‘Oo Bapaꞌ, inuma, bu poinumon ku da sop og guntaꞌ nu.’ Dadi mininumu bu piinumin da sop ong mga guntaꞌ u. 47 Doksuꞌ sinakan ku yanin, bug sima yanin bataoy. Ok tabalin, ‘Og gommaꞌ u si Betuel, og bataꞌ ni Nahor bu ni Milka.’ Pogdoksuꞌ in moktaluꞌ binotangan ku nok ponampong ok sungin, bu pisolugan ku nog duwaꞌ buk gallang og bingkonin. 48 Doksuꞌ simudjudu bangka u pudjihoy ok Tuhan. Miksarang-sukulu tokodoy sok Pogbayaꞌ-bayaꞌ, ok Tuhan da sop nog gamu u. Poꞌ yanin ong mikpotontul dinakon dini sog gilug nog gamu u, bu mibalaku og gapuꞌ in nog budjang, nong mopoglibun ni Isahak.” 49 Na taluꞌ nok sosuguon ni Ibrahim, “Bilaꞌ molasa bu mololat amu da sog gamu u, bu tolimaon niyu da og bataꞌ in, taluan niyu akon. Bilaꞌ ondiꞌ, taluan niyu da sop akon bagun ku mokopomikil bug olo og inangon ku.”

50 Tubus tinumabal si Laban bu si Betuel, “Yonin koyon ok kolegan nok Tuhan, daꞌdun na muwal ong motaluꞌ nami. 51 Na kini da si Ribeka, oyit nu yanin muliꞌ bagun mopoglibun nog bataꞌ nog gamu nu, mamaꞌ na nok kolegan nok Tuhan.” 52 Dangan midongog nok sosuguon ni Ibrahim ok tabal nilon, simudjud yanin sok Tuhan. 53 Doksuꞌ piluwasin ong mga goyitin, bangka nin bogoyoy ni Ribeka ong mga ginisan pomulawan bug ponapot. Binogoyan da sop nok sosuguon og gilug nog laki bug ginaꞌ ni Ribeka nong mokohalgaꞌ nog lolumpakan.

54 Na kinuman na ok sosuguon bug mga dunutin, bu dituꞌ ilon migulabung. Poktanud nilon nok sisolom, miktaluꞌ ok sosuguon, “Na muliꞌ ami na bayuꞌ kini sog gamu u.” 55 Tibuwa miktaluꞌ og gilug bug ginaꞌ ni Ribeka, “Poonong nu pa dinami si Ribeka bisan dona sopuluꞌ ondow, doksuꞌ niyon bangka amu na panow.” 56 Ok tabal nok sosuguon koyon, “Maap niyu na akon, diꞌ niyu na akon anggaon. Dinuhul na nakon nok Tuhan og gawoyu, dadi bilaꞌ mogdadi pouliꞌ niyu na akon dituꞌ sog gamu u.” 57 Tinumabal ilon, “Sakan ta poguna si Ribeka bug olo ong motaluꞌ in.” 58 Na pitawag nilon si Ribeka, bangka nilon sakoy, “Melega taꞌ mogunut sok tow kini?” Tinumabal si Ribeka, “Oo, melegu da.” 59 Dadi pidunut nilon si Ribeka sampoy og libun nong mogogipat na asal diyanin sok sosuguon ni Ibrahim bug kodumahanin. 60 Doksuꞌ nituꞌ binarakatan nilon si Ribeka, taluꞌ nilon, “Buweꞌ, mura-murahan moktidu dinika ong ngibu-ngibuhan nok ponupuꞌ, bu bung mayan moangkon nok ponupuꞌ nu ok pigbonuwahan nong mga migdumut dinilon.” 61 Tubus mingmomos na si Ribeka bug mga duma nin nog libun bangka sakoy song mga guntaꞌ, bangka ilon pogunut sok sosuguon ni Ibrahim.

62 Na pasalan ni Isahak, dituꞌ yanin migonong song Negeb. Bogu da yanin minatong tidu sok timbaꞌ nog Ber Lahay Roi. 63 Ongon solobuk waktu nok posunguꞌ na sumindop og gondow, mikpanow-panow yanin sok kopantoyan bu mimikilan. Poktongalin, mikotongow yanin nong mga guntaꞌ posunguꞌ diyanin. 64 Mitongow da sop ni Ribeka si Isahak. Tinumukpa mogdayun yanin sog guntaꞌ in, 65 bangka nin sakoy ok sosuguon ni Ibrahim, “Sima ok tow koyon sok kopantoyan nok posunguꞌ dini dinita?” Ok tabal nok sosuguon, “Yonin koyon og gamu u nok si Isahak.” Dadi inalap ni Ribeka ok todungin, bangka nin dungmaoy og gulu bug muluꞌ in. 66 Dangan mikosampoy ilon diyon ni Isahak, sinuksug na nok sosuguon koyon ok pasal sog lam nong miinangin. 67 Doksuꞌ nituꞌ inoyit ni Isahak si Ribeka dituꞌ sog nog ginaꞌ in, si mula Sarah. Mipoglibunin si Ribeka bu molasa yanin dun. Na miawaꞌ ok korukkaanin pasal sok kopatoy nog ginaꞌ in.