Leviiyé Kacuɔnrirɔ Sɛbɛ wè
Leviiyé
Sɛbɛ wi tìɛdiʔɛ gè
Leviiyé Kacuɔnrirɔ Sɛbɛ wè, pe wi ye tuɔbuuro nī dè Levitiki. Leviiyé saʔa tùlugo gè, ki nàguɔlɔ pe yé puu wàlidɛngɛlɛ bèri baara kúu Kpàlidiʔɛ Kpátaʔa nī gè. Sɛbɛ ŋáà wi 'taʔa Yirile nɛ́ Suɔlɔ Sɛbɛ nɛ̄ wè, ŋàa wi ki nyu kɛnmɛ bíì nɛ̄ Yewe wi 'nyakungɛngɛ kpíʔile gè nɛ́ Isirayɛli siɛnnɛ ní bèle, nɛ̀ yɛli nɛ́ kele gálì ní wi yé juu wi siɛnjuuwo nyuɔ nī gè, Misa wè.
Leviiyé Kacuɔnrirɔ Sɛbɛ nī wè, Yewe 'tóri Misa mɛ́ wè nɛ̀ ki juu kacuɔnrilɔ mɛ́ bèle bè pe tɛnmɛ kɛnmɛ bíì nɛ̄ pe 'yɛli bèri kakuɔrɔ kpínʔini dè bè síɛ wè siɛnnɛ mɛ́ bèle. Nɛ́ míɛni wi 'ki tìɛ siɛnnɛ nɛ̄ bèle mɛni pe 'yɛli bè tánʔa bè síɛ Yewe yiʔɛ mɛ́ gè, bè pe kele cuɔnri gèle nɛ́ wi ní wè.
Bè kapiʔile kàsulugo taa gè, siɛnnɛ pe yé yɛli bè yajuʔu káà kpúu, gàa ki 'kùu kapiigbiʔiliwe wi sìndiʔɛ nī gè bè wi kapiile tugo lè. Kakuɔrɔ dáà ti 'puu nɛ siɛnnɛ tɛnmɛ bèle pe- yeri pe kapiʔile wuʔu nɛ̄ gè, bè ki juu bè kapiile kàsulugo taa gè Yewe yiʔɛ mɛ́ gè (wéli baa nyùyɔ 1; 4–7). Kakuɔrɔ táà yé puu baa bè Yewe síɛri wè wi kacɛ̀ngbiʔilige wuʔu nɛ̄ gè, yaliire dè nɛ́ yanyige ní gè gàa wi kanʔa gè (wéli baa nyùyɔ 2–3).
Tire kakuɔrɔ yakɔnrɔ dáà ti 'puu nɛ ki tìí cɛngɛ káà Zezi bága pɛn bè pa kùu weli kapiʔile kɛnmɛ nɛ̄ bè, bè weli suɔ (wéli baa Ŋún 40.7-8; Eza 53.10).
Yewe yé ki juu Misa mɛ́ wè kɛnmɛ bíì nɛ̄ wi 'yɛli bè Arawɔn nɛ́ wi jaala tɛ́ngɛ bèle bè síɛ wè peri kacuɔnrilɔ baara kúu dè (wéli baa nyùyɔ 8–10).
Yewe yé kajuʔulo kálì juu, gàli ke yé puu bè Isirayɛliyé sáʔa bèle pe- ki cɛ́n peli 'yɛli bè puu cìilile bé nɛ́ gbɛ̀ sìʔɛrɛ bè kpɔni Yewe nɛ̄ wè (wéli baa nyùyɔ 11–15). Kire sí puu nɛ ki tìí Isirayɛliyé pe wè numinɔ nɛ́ siɛnsɛnminɛ ní bèleʔ, pe 'puu Yewe wuulo.
Tɔligɔ nigbe yiɛlɛ nī lè, Kapiʔile Kàsulugosuɔ cɛngɛ gè, kacuɔnrilɔ kàfɔli wi yé yɛli bè jíin tiɛcɛ̀njɛngɛ wàlidɛngɛgɛ nī gè, bè siɛnnɛ kakuɔrɔ kúɔ dè, kapiʔile kàsulugosuɔ wori dè (wéli baa nyùgo 16).
A Yewe wi 'fànʔa kajuʔulo kɛn gèle gàli ke ki tìí siɛnnɛ nɛ̄ bèle kɛnmɛ bíì nɛ pe 'yɛli bèri tári de síngi Yewe yiʔɛ mɛ́ gè. Kajuulo náà nī ti mìɛni nyùgo nɛ̄ gè, lire nī nàa lè: Mi yē Yewe (wéli baa 18.5-6; 19.4) nɛ́ míɛni: Ki sí yɛli ye- yìye wàli ye tɛ́ngɛ m'mɛ́ ye- puu tiɛlɛ fùn, nɛ́ ki cɛ́n mi Yewe, yeli Kulocɛliɛ wè, mi yē tiɛlɛ fùn (wéli baa 19.2). Fànʔa kajuulo láà yē baa míɛni nàa Zezi 'koli nɛ̀ juu nɛ́ jo ni 'kpúʔɔ nɛ̀ tóri wè: Nɛ̀ míɛni muɔ 'yɛli bè muɔ siɛnnyɛni woli yaʔa lè ni- muɔ dɛ́ni kɛnmɛ bíì nɛ̄ muɔ mìɛ dɛ́ni wè (wéli baa 19.18).
Sɛbɛ wi nyasiɛnkɛnigɛ sɛngɛ gè, kiī nɛ siɛnrɛ ti juunyugo tìí gè: Kele gálì keli yē kajuudiʔɛlɛ gálì Yewe 'juu nɛ̀ gbɛ̀ngɛ Misa mɛ́ wè Sinayii nyagurugo nɛ̄ gè, wi- ti juu Isirayɛli siɛnnɛ mɛ́ bèle (wéli baa 27.34).
Sɛbɛ wi nyùgboliyo yè
Fànʔa kajuʔulo gálì ke nyu kakuɔrɔ nɛ́ yakɔnrɔ wuʔu nɛ̄ gè (1.1–7.38)
Kacuɔnrilɔ tɛ́ngɛ baara kele wori dè (8.1–10.20)
Fànʔa kajuʔulo gálì ke nyu yaciilide nɛ́ yanuʔɔrɔ wuʔu nɛ̄ gè (11.1–15.33)
Kapiʔile Kàsulugosuɔ cɛngɛ wori dè (16.1-34)
Isirayɛliyé pe 'yɛli bè pìye puɔ Yewe nɛ̄ wè kpuʔɔ bè puu tiɛlɛ fùn (17.1–25.55)
Nyakungɛngɛ ki kúɔmɔ siɛnrɛ dè (26.1–27.34)