ISIRAYƐLIYE PE 'YƐLI BE PIYE PUƆ YEWE NƐ WE BE PUU TIƐLƐ FUN
(17.1–25.55)
Kakuɔrɔ yajuuro sìsiɛn wori dè
17
1 A Yewe 'ki juu Misa mɛ́ nɛ́ jo:2 «-Ki juu Arawɔn nɛ́ wi jaala mɛ́ bèle, nɛ́ Isirayɛli siɛnnɛ pe mìɛni ní, ma kele gálì tìɛ gèle pe nɛ̄. Ti n'dɛ dàa Yewe wi 'juu nɛ̀ gbɛ̀ngɛ dè:
3 «Siɛn ó siɛn wī Isirayɛliyé wuu wè, a wi je nùɔ kɔni, kire ga laa sìnbapile nī yo, síkpuɔ wī yo, bùguro nī dè kire ga laa bùguro kàduʔu mɛ́ gè, 4 nɛ̀ ki yaʔa a wiì pɛnʔ nɛ̀ pɛ́nì wi kpuʔɔrɔ kɛn dè Yewe mɛ́ wèʔ Kpàlidiʔɛ Kpátaʔa wìile nɛ̄ lè Yewe Kòridiʔɛ yiʔɛ mɛ́ gèʔ, kire kapiile ni bé kò wi nyùgo nɛ̄ gè, sìsiɛn woli lè. Bɛ̀ wi nyɛ́nì sìsiɛn wo gè, pe bé wi yige péwu baa wi siɛnnɛ sunʔɔmɔ nī bè.
5 «Bɛ̀ ki bé puu, pe fǎga de kakuɔrɔ yajuuro kɔnigi dè sìnbirige nī gèʔ; Isirayɛli siɛnnɛ pe 'yɛli pe- pɛn nɛ́ pe kakuɔrɔ yajuuro ní dè kacuɔnriwɔ mɛ́ wè, Kpàlidiʔɛ Kpátaʔa wìile mɛ́ lè, bè ti kɛn Yewe mɛ́ wè, yanyige yakɔnrɔ. 6 Kacuɔnriwɔ wi bé sìsiɛn nyɛri nyɛri gè Yewe gbùʔɔrɔdiʔɛ yafanʔa nɛ̄ gè, Kpàlidiʔɛ Kpátaʔa wìile nɛ̄ lè, bé sí sùnmɔ tiɛyɛ sórigo yè, kakuɔrɔ dáà nùdaanna ni Yewe fungo nyígi gè.
7 «Bɛ̀ ki bé puu piyě ní de yasunyɔ sungu yèʔ nyàa yī síkapɔlilɔ tíɛlɛ bèleʔ bé pe Kulocɛliɛ yaʔa wè, béri waa yasunro kúrugu dè majo nàjaacɛlilɛ bīɛlɛ. Tire yē fànʔa kaala yeli mɛ́ lɛ̀lɛ ó lɛ̀lɛ nī, kɛ̀ngɛlɛ ke mìɛni nī.
8 «Nɛ́ míɛni muɔ bé ti juu pe mɛ́: siɛn ó siɛn ŋáà wī Isirayɛli saʔa wuu wè, kire ga laa nabɔnwɔ ŋáà wī tɛ́niwɛ pe sunʔɔmɔ nī bè, a wi 'pɛn bè pa kakuɔrɔ kaasuʔuro kɛn, kire ga laa kakuɔrɔ táà tiiyɛ kɛn dè, 9 nɛ̀ ki yaʔa wiì pɛnʔ nɛ́ kakuɔrɔ yajuʔu ní gèʔ Kpàlidiʔɛ Kpátaʔa mɛ́ gè bè ki kɛn Yewe mɛ́ wèʔ, pe bé wi yige péwu baa wi siɛnnɛ sunʔɔmɔ nī bè.»
Sìi wiī sìsiɛn nī gè
10 «A ki 'nyaa Isirayɛli saʔa siɛn wáà, kire ga laa nabɔnwɔ wáà ŋàa wī tɛ́niwɛ pe sunʔɔmɔ nī bè, a wi 'sìsiɛn káa gè, m'bé kàduʔu wáa wi mɛ́ bé wi yige péwu wi siɛnnɛ nī bèle. 11 Nɛ́ ki cɛ́n yawiire ti mìɛni sìi wiī ti sìsiɛn nī gè.
«Mi Yewe wè, mi nyɛ́nì sìsiɛn kɛn gè yeli mɛ́ gbùʔɔrɔdiʔɛ yafanʔa nɛ̄ gè kire ga buu bè kàsulugosuɔ baara kúɔ dè yeli sìi wuu wè. Sìsiɛn kire kɛnmɛ nɛ̄ kàsulugosuɔ kakuɔrɔ tiī nɛ kúu, nɛ́ ki cɛ́n sìi wiī sìsiɛn nī gèa. 12 Kire kɛnmɛ nɛ̄ mi 'ki juu Isirayɛli siɛnnɛ mɛ́ bèle nɛ́ jo: Siɛn wáà fáala sǐ ga tíi sìsiɛn káa gè yeli sunʔɔmɔ nī bèʔ. Nabɔnwɔ ŋáà wī tɛ́niwɛ yeli sunʔɔmɔ nī bè, wire míɛni sǐ gbɛ̀ ki káaʔ.
13 «A ki 'nyaa Isirayɛli siɛn wáà, kire ga laa nabɔnwɔ wáà, ŋàa wī tɛ́niwɛ Isirayɛliyé sunʔɔmɔ nī bè, a wi 'taʔa nyàʔayɛgɛ káà nɛ̄ nɛ̀ ki cìra nɛ̀ cò nɛ̀ ki kpúu gè, kire ga laa sínjinʔɛ káà nɛ̄, tire dáà ti bé gbɛ̀ káa dè, wi 'yɛli bè ki sìsiɛn wo gè dàala nɛ̄ lè bé ki tɔ́n nɛ́ tárigɛ ní.
14 «Nɛ́ ki cɛ́n yawiire ti mìɛni sìi wiī ti sìsiɛn nī gè. Kire nɛ̄ mi nyɛ́nì ki juu Isirayɛli siɛnnɛ mɛ́ bèle nɛ́ pe yɛ: Yeli sǐ ga tíi yawiʔi káà fáala sìsiɛn káa gèʔ, nɛ́ ki cɛ́n yawiire ti mìɛni sìi wiī ti sìsiɛn nī gè. Ŋàa wi bé ki káa gè, pe 'yɛli bè wi yige péwu baa wi siɛnnɛ sunʔɔmɔ nī bèb.
15 «Siɛn ó siɛn wī kùlo siɛn wè, kire ga laa nabɔnwɔ wè, a wi 'yajuʔu káà káa gàa ki 'kùu kìimɛ gè, kire ga laa gàa nyàʔayɛgɛ káà 'kpúu gè, wi 'yɛli bè wi burudo 'jíge dè bé gbéli nɛ́ luʔɔ ní. Wi bé sí kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè, bà wi bé koli bè kò cìiliwe. 16 A wiì wi burudo jíge dèʔ nɛ́ wi céri gbéli dè nɛ́ luʔɔ ní gèʔ, wi bé wi kolimɔ tugoro tugo dè.»