Yirile nɛ́ Suɔlɔ Sɛbɛ wè
Yirile
Sɛbɛ wi tìɛdiʔɛ gè
Yirile nɛ́ Suɔlɔ Sɛbɛ wè, pe wi ye tuɔbuuro ni dè Ɛgizɔdi. Sɛbɛ ŋáà wiī nɛ ki tìí kɛnmɛ bíì nɛ Kulocɛliɛ wi 'wi nyakungɛngɛ fori gè, nyakungɛngɛ gáà wi yé kpíʔile nɛ́ Birayima ní wè, nɛ́ Siaga nɛ́ Yakuba ní wè (wéli baa Yir 2.24), nɛ́ míɛni kɛnmɛ bíì nɛ̄ wi wìi tìɛ pe siimɛ nɛ̄ bè. Ti 'ki juu nɛ́ jo sɛbɛ ŋáà nī wè: Mi yē Yewe, muɔ Kulocɛliɛ wè. Mi wī muɔ 'yige Ezipiti kùlo nī lè, kire tiʔɛ nī muɔ 'puu sùkulomɔ nɛ̄ bè (wéli baa 20.2). Siɛnrɛ tiī nɛ ki tìí sɛbɛ wi nyasiɛnkɛniyɛ yi kɔri wè, nɛ́ wi tɛnmɛnɛ ni nyùgo gè: Yewe, Isirayɛliyé Kulocɛliɛ wè, wi yē wi siɛnnɛ pe suɔfɔli.
Yakuba siimɛ bè, Isirayɛliyé bèle, pe yé kɛ́ Ezipiti kùlo nī lè bè pìye suɔ fungo mɛ́ gè (wéli baa Sél 45.17-20; 47.11), a pe 'kò siɛnniʔɛmɛ baa. A Ezipiti kùlofɔli wi 'pe wuʔɔ nɛ̀ pe cò sùkulomɔ nɛ̄. A Yewe wi 'Misa nyíɛnɛ nɛ̀ kɔ̀n bè Isirayɛliyé yige bèle Ezipiti kùlo nī lè, bè pe yiʔɛ kíni gè sɛ́nì pe nɔ̀ Kanaa kùlo nɛ̄ lè, kùlo náà wuʔu nɛ̄ Yewe wi yé nyuɔ kún nɛ̀ kɛn nɛ́ jo ni bé kò pe 'tuu Birayima wi kùlo lè. Sinayii nyagurugo nyakungɛngɛ ki siɛnrɛ tire ti 'puu Isirayɛliyé nyùgo gè, bɛ̀ pe 'kò siɛnfelige gáà Yewe wi yé nyíɛnɛ nɛ̀ kɔ̀n nɛ̀ tɛ́ngɛ kiiyɛ gè (wéli baa 19.6).
Lɛ̀lɛ líì nī Yewe wi 'Misa tun wi- Isirayɛliyé suɔ bèle (wéli baa nyùyɔ 3–4), a Farawɔn, Ezipiti kùlofɔli wè, a wi 'cíi nɛ́ jo wiǐ Isirayɛliyé yaʔa bèle pe- kɛ́ʔ. A Yewe wi 'wuʔɔyɔ kiɛ tìrige Ezipiti kùlo nɛ̄ lè (wéli baa nyùyɔ 5–12). A Farawɔn 'pe yaʔa a pe 'yiri Ezipiti kùlo nī lè. A Yewe wi 'kakpoliyo nìʔɛyɛ kpíʔile wi siɛnnɛ mɛ́ bèle, a pe 'tóri kuʔɔjii nɛ̄ wè, nɛ́ waama kùlo nī lè sɛ́nì pe 'nɔ̀ Sinayii nyagurugo nɛ̄ gè (wéli baa nyùyɔ 13–17).
Kire tiʔɛ nī gè, a Yewe wi 'nyakungɛngɛ kpíʔile nɛ́ Isirayɛliyé ní bèle, nɛ́ wi Fànʔa Siɛnrɛ kɛn dè pe mɛ́ nɛ́ ti kajuudiʔɛlɛ kiɛ ní gèle (wéli baa 19.1–24.18). A wi 'ki tìɛ Misa nɛ̄ wè kɛnmɛ bíì nɛ̄ pe 'yɛli bè wi Kòridiʔɛ nɛ́ ki yɛrɛ faan dè. Bè Misa 'yaʔa Sinayii nyagurugo nɛ̄ gè, a Isirayɛliyé pe 'cíi Yewe kajuʔulo nɛ̄ gèle nɛ́ nɛ̀piɛyɛlilɛ láà faan nɛ̀ ni gbùʔɔrɔ. A Yewe 'pe wuʔɔ; kire kàduʔumɛ a wi 'pe kàsulugo suɔ gè (wéli baa nyùyɔ 32–34).
Isirayɛliyé pe 'Yewe Kòridiʔɛ faan gè, Kpàlidiʔɛ Kpátaʔa gè, a kàsadibagɛ ki 'Kpàlidiʔɛ Kpátaʔa tɔ́n gè, a Yewe cɛ̀nmɛ nɛ́ wi kpuɔmɔ pi 'Kòridiʔɛ nyì gè (wéli baa 40.34).
Sɛbɛ wi nyùgboliyo yè
Misa siile nɛ́ wi yerigɛnmɛ Kulocɛliɛ baara nī dè (1.1–4.31)
Yewe 'wi Isirayɛliyé yige bèle kùlo nī lè (5.1–13.16)
Isirayɛliyé pe 'kɛ́ Sinayii nyagurugo mɛ́ gè (13.17–18.27)
Sinayii nyagurugo nyakungɛngɛ gè (19.1–31.18)
Nyakungɛngɛ ki yé cúʔɔ, a Yewe 'ki fùgu nɛ́ pe ní (32.1–34.35)
Pe 'Yewe Kòridiʔɛ kpíʔile gè (35.1–40.38)