<<    <     Yirile     13     >    >> 
Yirile nɛ́ suɔlɔ siɛnrɛ dè
13
1 A Yewe 'ki juu Misa mɛ́ nɛ́ jo: 2 «Ye- Isirayɛliyé pìpelile pe mìɛni láʔa bèle ye kɛn m'mɛ́. A cɛliwɛ 'pìpeliwe sii wè ŋàa wī nàgabile lè, a yajuʔu míɛni 'pìpeliwe sii wè, wire yē mi wuua.»
3 A Misa wi 'ki juu siɛnnɛ mɛ́ bèle nɛ́ jo: «Yeri sɔ̀ngí yeri taʔa nɛ́ cɛngɛ ní gè gàa nī yeli 'yiri Ezipiti kùlo nī lè, tiʔɛ gáà nī yeli 'puu sùkulomɔ nī bè, nɛ́ ki cɛ́n Yewe nyɛ́nì yeli píle nɛ̀ yige baa nɛ́ wi ŋɔri kɔli ní gè. Kire kɛnmɛ nɛ̄ yeli sǐ ga tíi yakaa káa gàa gī sìnvari ní dèʔ. 4 Pàngɛ gè, Yaliire Puru yege nī gè, kire nī yeli 'yiri baa.
5 «A Yewe kɛ́nì yeli nyɔ́gɔ baa kùlo nī lè nàa wori nɛ̄ wi cé nyuɔ kún gè nɛ̀ kɛn yeli tobilo mɛ́ bèle, nɛ́ jo wire bé ni kɛn yeli mɛ́ lè, yeli 'yɛli bèri sɔ̀ngí de taʔa nɛ́ yirile nɛ́ suɔlɔ siɛnrɛ wuʔu ní gè, ye- kire sɔ̀ngidaa kele kpíʔile gèle kire yege gáà tíimɛ nī gè. Kire kùlo lire nī baa Kanaa siɛnnɛ, nɛ́ Eti siɛnnɛ, nɛ́ Amɔri siɛnnɛ, nɛ́ Evi siɛnnɛ nɛ́ Jebusi siɛnnɛ kùlo lè, baa nɛ̀yirimɛ nɛ́ sárigɛ kiī nɛ fúu gèb. 6 Bà yeli kɛ́nì fundaanra tánʔagbuɔlɔ tánʔa lè, yeli béri sìnvarifun búru káa wè cɛnyɛ kɔlisiin sunʔɔmɔ nī bè. Kɔlisiinwuʔu nɛ̄ gè, yeli bé fundaanra kpíʔile dè, Yewe wori dèc. 7 Kire cɛnyɛ nyáà nī yè, yeli sǐ ga tíi búru káaʔ, ŋàa wī sìnvari ní dè. Kiì yɛli pe- búru nyaa yeli tɛ́nidiɛyɛ yáà fáala nīʔ, ŋàa wī sìnvari ní dè; sìnvari míɛni sì yɛli ti 'nyaa baaʔ.
8 «Kire cɛngɛ gè, yeli ye mìɛni béri yeli pìile tɛnmɛ bèle ki kɔri nɛ̄ wè, bé jo: ‹Gàa ki mìɛni gè mi nɛ ki kpínʔini bè sɔ̀ngi bè taa nɛ́ gàa ní Yewe 'kpíʔile m'mɛ́ gè, bà mi 'yiri Ezipiti kùlo nī lè.› 9 Gàa ki mìɛni bé puu yeli mɛ́ bɛ̀ fìɛ tíɛlɛ yeli kiyɛ nɛ̄ yè nɛ́ yeli gbɛgɛlɛ nɛ̄ gèle. Kire bé ki yaʔa yeli de sɔ̀ngí de taʔa bèri Yewe fànʔa kajuʔulo jáari gèle, nɛ́ ki cɛ́n wire wi nyɛ́nì yeli yige Ezipiti kùlo nī lè nɛ́ wi tíimɛ ŋɔri kɔli ní gè. 10 Yiɛlɛ ó yiɛlɛ yeli 'yɛli bè fànʔa kaala siɛnrɛ dáà cò dè a ki lɛ̀lɛ ni pɛ́nì nɔ̀ lè.
11 «A Yewe kɛ́nì yeli nyɔ́gɔ Kanaa siɛnnɛ kùlo nī lè, bɛ̀ wi 'nyuɔ kún nɛ̀ kɛn yeli mɛ́ wè, yeli nɛ́ yeli tobilo ní bèle, a wi kɛ́nì ni kɛn yeli mɛ́ lè, 12 yeli bé nàgabipeligele ke mìɛni láʔa bè kɛn Yewe mɛ́, nɛ́ yajuuro ti pìpelile ní bèle, dàa dī nàguɔlɔ bèle. Kire pìpelile bálì pe mìɛni yē mi wuulo. 13 A ki pɛ́nì nyaa sèfɛngɛlɛ pìpelile bèle, yeli bé pe fùgu bè suɔ nɛ́ sìnbapigele ní kire ga laa nɛ́ síkapigele ní gèle. Á kire bɛ̀ʔ gè, yeli bé yétiige ŋáʔana gè bè kaa ti nɛ̄d. A ki 'nyaa siɛnnɛ jaafɔpelile bèle, yeli bé pe fùgu suɔe.
14 «A yeli pìile pe kɛ́nì yeli yúgo cɛnyɛ nyáà yi báan yè nɛ́ jo: ‹Gáa nɛ̄ yeli nɛ kire kpínʔini gè ?›, ye- pe yɛ: ‹Yewe nyɛ́nì weli yige Ezipiti kùlo nī lè, tiʔɛ gáà nī weli 'puu sùkulomɔ nɛ̄ bè, nɛ́ wi ŋɔri kɔli ní gè. 15 Bà Farawɔn yé cíi nɛ́ jo wiǐ weli yaʔa weli kɛ́ wèʔ, a Yewe 'pìpelile kpúu bèle Ezipiti kùlo nī lè, siɛnnɛ jaafɔpelile bèle nɛ́ yajuuro wuulo ní bèle, kire kɛnmɛ nɛ̄ weli 'kò nɛ yajuuro pìpelile kpúu bèle nɛ Yewe gbùʔɔrɔ́ wè, níɛ weli jaafɔpelile suu bèle nɛ fùgú.› 16 Kire bé kò yeli mɛ́ bɛ̀ fìɛlɛ tíɛlɛ yeli kiyɛ nɛ̄ yè nɛ́ yeli gbɛgɛlɛ nɛ̄ gèle, nɛ́ ki cɛ́n Yewe nyɛ́nì yeli yige nɛ́ wi ŋɔri kɔli ní gè Ezipiti kùlo nī lè.»
ISIRAYƐLIYÉ PE 'KƐ SINAYII NYAGURUGO MƐ GE
(13.17–18.27)
Yewe wi 'Isirayɛliyé yiʔɛ kíni gè
17,18 Bà Farawɔn cé Isirayɛliyé yaʔa bèle a 'pe kɛ́ bèle, a Kulocɛliɛ 'pe yiʔɛ kíni a pe màʔa nɛ̀ sɛ́nì waama kùlo koligo líɛ gè, Nyàʔanivɛgɛ Tiire kuʔɔjiif kɔli mɛ́ gè. Kulocɛliɛ sì cé pe yiʔɛ kíni a pe 'Filisitiyé kùlo koligo líɛ gèʔg, kire ki 'puu kowerige gè. Nɛ́ ki cɛ́n Kulocɛliɛ yé jo: «Kiì yɛli a siɛnnɛ pe kɛ́nì kapiɛnnɛ nyaa lèʔ, pe ní koli bèri waa Ezipiti kùlo mɛ́ lèʔ.»
Bà pe yé yiri Ezipiti kùlo nī lè, Isirayɛli siɛnnɛ pe yé puu nɛ taanni pìye nɛ̄ gbuʔulo gbuʔulo nɛ̀ pìye gbòbori nɛ̀ yaʔa kapiɛnnɛ kpúɔnmɔ. 19 A Misa 'Yusufu kácere líɛ dè nɛ̀ tugo nɛ waa nɛ́ ti ní, nɛ́ ki cɛ́n Yusufu cé Isirayɛli siɛnnɛ cò bèle a pe 'kàli, á wi 'jo: «Mi 'ki cɛ́n kányiʔɛ nɛ̄ Kulocɛliɛ bága yeli sáʔa, kire nɛ̄ yeli 'yɛli bága mi kácere líɛ dè bè kɛ́ nɛ́ ti níh.»
20 A pe 'yiri Sukɔti kàʔa nī gè nɛ̀ kɛ́ nɛ̀ sɛ́nì nɔ̀ Etami tiʔɛ nɛ̄ gè nɛ̀ tɛ́ni baa cɛ̀ri, kire gáà ki 'puu waama kùlo táanni lè. 21 Yewe wire tíimɛ 'puu nɛ tári pe yiʔɛ mɛ́ gè. A kiī kpìɛnmɛ lɛ̀lɛ nī, ki nɛ̂ puu kàsadibagɛ, níɛ̀ puu sìtɔnigɔ nɛ̀ cùungu níɛ̀ sìɛn nɛ̀ kíni pe yiʔɛ mɛ́ gè. A ki yē pìlige nī gè, ki nɛ̂ puu kàsun, níɛ̀ puu sìtɔnigɔ níɛ̀ sìɛn pe yiʔɛ mɛ́ gè, bèri kpìɛnmɛ cáanri bè pe mɛ́. Kire ki 'yaʔa a pe gbɛ̀nɛ tári pìlige nɛ́ cɛnvugo ní gè. 22 A ki gbɛ̀nɛ yē kpìɛnmɛ lɛ̀lɛ nī lè, kàsadibagɛ gáà ki 'tɔni nɛ̀ cùungu gè, ki nɛ̂ puu nɛ waa pe yiʔɛ mɛ́ gè súuri. Pìlige nī gè, kàsun gáà ki 'tɔni nɛ̀ cùungu gè, ki nɛ̂ puu nɛ waa pe yiʔɛ mɛ́ gè. Ki nɛ̌ ga núgo bè nyaaʔ.