Farawɔn 'yiri nɛ̀ taʔa Isirayɛliyé nɛ̄ bèle
14
1 A Yewe ki 'juu Misa mɛ́ nɛ́ jo: 2 «-Ki juu Isirayɛli siɛnnɛ mɛ́ bèle pe- koli peri waa pe sa tɛ́ni cɛ̀ri Pi Kariyɔti kàʔa táanni gè, kire gáà gī Migidɔli kàʔa nɛ́ kuʔɔjiia sunʔɔmɔ nī bè. Yeli 'yɛli bè tɛ́ni kuʔɔjii táanni wè, bè yiʔɛ wáa Baali Sefɔn kàʔa kɔli mɛ́ gè. 3 Farawɔn wi bé ki sɔ̀ngi bè jo Isirayɛli siɛnnɛ pe 'pùunni nɛ nyaari nɛ mári waama kùlo nī lè; waama kùlo ni 'pe lìi. 4 M'bé Farawɔn nàzɔn gbɛ̀n wèb; wi bé yiri bè taʔa yeli nɛ̄. Kpuʔɔrɔ bé taʔa mi míʔɛ nɛ̄ gè Farawɔn kɛnmɛ nɛ̄ bè, nɛ́ wi kapiɛngbuɔnnɔ ní bèle. Bà Ezipiti siɛnnɛ pe bé ki cɛ́n mi yē Yewec.»A pe 'ki kpíʔile bɛ̀. 5 Bà pe pɛ́nì ki juu Ezipiti kùlofɔli mɛ́ wè nɛ́ jo Isirayɛli siɛnnɛ pe yé fɛ̀ bèle, a Farawɔn nɛ́ wi siɛnkpolilo ní bèle, a pe 'pe sɔ̀ngirɔ yiʔɛ dè Isirayɛli siɛnnɛ wuʔu nɛ̄ gè nɛ́ jo: «Gáa weli 'kpíʔile mmɛ gè nɛ́ Isirayɛli siɛnnɛ yaʔa bèle a pe 'yiri parituɔrɔ nī dè ?»
6 A Farawɔn 'wi kapiɛngbuɔn wotori gbòbori wè nɛ́ wi kapiɛngbuɔnnɔ kɔ́ri bèle. 7 A wi 'fali nɛ̀ suɔnyɔ wotorilo cɛ̀nminɛ sirataanri (600) nyíɛnɛ nɛ̀ kɔ̀n, nɛ̀ fàri Ezipiti kùlo wuulo pálì mìɛni nɛ̄, kapiɛngbuɔnnɔ kàfɔlilɔ sí ní ti mìɛni nigbe nigbe nɛ̄.
8 A Yewe 'Farawɔn nàzɔn gbɛ̀n wè, Ezipiti kùlofɔli wè, a wi 'yiri nɛ̀ taʔa Isirayɛli siɛnnɛ nɛ̄ bèle, peli bálì pe yé yiri Ezipiti kùlo nī lè yiɛyɛ ní yē yɛ̀riyɛ yè. 9 A Ezipiti siɛnnɛ pe 'yiri nɛ̀ taʔa pe nɛ̄ nɛ́ sɛ́nì nɔ̀ pe nɛ̄ pe súɔndiʔɛ nī gè baa kuʔɔjii táanni wè. Suɔnyɔ yi mìɛni yè, nɛ́ suɔnfɛbilɛd pe mìɛni bèle, nɛ́ Farawɔn wotorilo pe mìɛni ní bèle, nɛ́ wi kapiɛngbuɔnnɔ pe mìɛni ní, a pe 'Isirayɛliyé cò bèle baa Pi Kariyɔti kàʔa táanni gè, Baali Sefɔn kàʔa yiʔɛ mɛ́ gè. 10 Bà Farawɔn 'puu nɛ kpɔni pe nɛ̄ wè, a Isirayɛli siɛnnɛ pe 'yiʔɛ yɛ̀gɛ gè nɛ̀ ki nyaa Ezipiti siɛnnɛ pe ń'nɛ̀ yiri nɛ̀ taʔa peli nɛ̄ ! Fíɛrɛ ti yé Isirayɛli siɛnnɛ cò bèle kpuʔɔ, a pe 'yékpuʔulo wáa nɛ̀ Yewe náari.
11 A pe 'Misa yɛ wè: «Muɔ 'jo lé, nyɛyɛ sì puu baa Ezipiti kùlo nī lè léʔ, á muɔ 'weli kɔ́ri weli pa kùu náʔa dàrimiʔɛ gáà nī gè ? Gáa nɛ̄ muɔ 'ki kpíʔile weli nɛ̄ mmɛ gè, nɛ́ weli yige Ezipiti kùlo nī lè ? 12 Tire bɛ̀ʔ lé dàa weli 'puu nɛ nyu muɔ mɛ́ dè, bà we 'puu baa wè, nɛ́ jo, ‹-Weli yaʔa weli de baara Ezipiti siɛnnɛ mɛ́ bèle. Kire cî pɔ́ri weli mɛ́ weli de baara kire tiʔɛ nī gè sɛ́ni weli pa kùu náʔa gè waama kùlo náà nī lè !› »
Yewe 'kuʔɔjii luʔɔ ceri gè
13 A Misa 'ki juu pe mɛ́ nɛ́ jo: «Ye fǎga de fìʔɛ́ʔ ! Ye- yéri ye nìre wáa, yeli bé ki nyaa gàa Yewe bé kpíʔile yeli mɛ́ pàngɛ gè bè yeli suɔ wè. Nɛ́ ki cɛ́n Ezipiti siɛnnɛ bálì yeli nɛ nyaʔa pàngɛ gè, yeli sǐ ní ga tíi pe nyaa cíginiʔ. 14 Yewe wire tíimɛ bé yeli kapiɛnnɛ kpúɔn lè; yeli bèle, ye- kò pìirile.»
15 A Yewe 'Misa yɛ wè: «Gáa nɛ̄ muɔ nɛ yékpoli wáari lé mi kúrugu ? -Ki juu Isirayɛli siɛnnɛ mɛ́ bèle, pe- yɛ̀ peri waa. 16 Muɔ wè, ma kàgbiile yɛ̀gɛ lè, ma muɔ kɔli sìɛn gè kuʔɔjii nɛ̄ wè, ma ki ceri tiɛyɛ siin, kire ga buu Isirayɛli siɛnnɛ pe- luʔɔ jeli gè dàawaʔala nɛ̄ lè. 17 Mi wè, yeli bé ki nyaa, m'bé Ezipiti siɛnnɛ nàzɔnnɔ gbɛ̀n bèle, kire ga buu pe- jíin yeli kúrugu luʔɔ nī gè. Bà ki bé kpíʔile kpuʔɔrɔ bé taʔa mi míʔɛ nɛ̄ gè Farawɔn wire kɛnmɛ nɛ̄, nɛ́ wi kapiɛngbuɔnnɔ ní bèle nɛ́ wi suɔnyɔ wotorilo ní bèle nɛ́ wi suɔnfɛbilɛ ní bèle. 18 Bà Ezipiti siɛnnɛ pe bé ki cɛ́n mi yē Yewe wè, a kpuʔɔrɔ kɛ́nì taʔa mi míʔɛ nɛ̄ gè Farawɔn kɛnmɛ nɛ̄ bè, nɛ́ wi suɔnyɔ wotorilo ní bèle, nɛ́ wi suɔnfɛbilɛ ní bèle.»
19 Nyìʔɛnɛ tundunwɔ ŋáà wi 'puu nɛ kínigi Isirayɛli siɛnnɛ pe yiʔɛ mɛ́ gè, a wire 'koli nɛ̀ pɛ́ni kò pe kàduʔu mɛ́ gè, a kàsadibagɛ sìtɔnigɔ gáà ki 'cùungu gè kire 'yéri míɛni pe kàduʔu mɛ́. 20 Kàsadibagɛ sìtɔnigɔ kire 'puu Ezipiti siɛnnɛ gboli nɛ́ Isirayɛli siɛnnɛ gboli sunʔɔmɔ nī bè. Kire kayɔbigɔ káà 'puu yebilige, gìi ní gè kpìɛnmɛ nɛ kpìɛnmɛ cáanri bè pìlige nī gè. Pìlige nī gè, gboli láà sì gbɛ̀nɛ nɔ̀ làa nɛ̄ʔ.
21 A Misa wi 'kɔli sáʔa gè nɛ̀ sìɛn kuʔɔjii nɛ̄ wè, a Yewe 'káfaligbuʔɔ káà yɛ̀gɛ gàa ki 'kɔ́n cɛngɛnyɛnifoligɔli mɛ́ gè, a ki 'wáa pìlige ki mìɛni nī nɛ̀ kuʔɔjii luʔɔ ŋɔrigɔ gè nɛ̀ ki ceri. A dàala ni 'yiri. 22 A Isirayɛli siɛnnɛ pe 'jíin nɛ̀ kuʔɔjii luʔɔ jeli gè dàawaʔala nɛ̄ lè. A luʔɔ ki 'yɛ̀ nɛ̀ yéri gunyɔ tíɛlɛ, kàliige mɛ́ gè nɛ́ kàmɛgɛ mɛ́ gè.
23 A Ezipiti siɛnnɛ pe 'yiri nɛ̀ taʔa pe nɛ̄, nɛ́ pe suɔnyɔ ní yè, nɛ́ Farawɔn suɔnyɔ wotorilo ní bèle, nɛ́ suɔnfɛbilɛ ní bèle, a pe mìɛni 'jíin kuʔɔjii nī wè pe kúrugu. 24 Nyìjaliɛlɛ nɛ̄ lè, a Yewe 'kò kàsadibagɛ kàsun sìtɔnigɔ nī gè gàa ki cùungu gè, nɛ́ Ezipiti siɛnnɛ kapiɛngbuɔnnɔ wéli bèle náʔa dàala nɛ̄ lè, nɛ́ fali nɛ̀ tánʔana nyaʔami lè pe mɛ́. 25 A wi 'pe suɔnyɔ wotorilo sakolilo cúʔɔ bèle, a pe 'tánʔagɛnnɛ ni 'kò gbɛ̀lilɛ nɛ̀ tóri.
A Ezipiti siɛnnɛ pe 'jo: «Ye- puu weri fé Isirayɛli siɛnnɛ nɛ̄ bèle, nɛ́ ki cɛ́n Yewe yē nɛ kapiɛnnɛ kpúɔn lè weli nɛ̄ nɛ pe kanʔa !»
26 A Yewe 'ki juu Misa mɛ́ wè nɛ́ jo: «-Muɔ kɔli sìɛn gè kuʔɔjii nɛ̄ wè, kire ga buu luʔɔ ki- koli bè Ezipiti siɛnnɛ tɔ́n bèle, nɛ́ pe suɔnyɔ wotorilo ní bèle nɛ́ pe suɔnfɛbilɛ ní bèle.»
27 A Misa wi 'wi kɔli sìɛn gè kuʔɔjii naamɛ gè. Lɛ̀lɛ líì nī cɛngɛnyɛni ni 'puu nɛ foligi lè, a kuʔɔjii luʔɔ ki 'koli nɛ̀ kò ki kaliɛmɛ nɛ̄ bè. A Ezipiti siɛnnɛ pe 'koli nɛ fé bè pìye suɔ luʔɔ mɛ́ gè. Kire nɛ́ ki mìɛni a Yewe ki 'yaʔa a kuʔɔjii luʔɔ ki 'pe mìɛni lìi ! 28 A luʔɔ ki 'koli nɛ̀ suɔnyɔ wotorilo tɔ́n bèle, nɛ́ suɔnfɛbilɛ ní bèle, nɛ́ Farawɔn wi kapiɛngbuɔnnɔ pe mìɛni ní bèle, bàli pe yé jíin luʔɔ nī gè Isirayɛli siɛnnɛ kúrugu bèle. Wàa nigbe sì suɔ pe nīʔ. 29 Nɛ̀ ki yaʔa Isirayɛli siɛnnɛ peli yé tánʔa nɛ̀ jeli dàawaʔala nɛ̄ lè kuʔɔjii lakoligo nī gè, luʔɔ ní gè nɛ yɛ̀ nɛ yèrí bɛ̀ gunyɔ tíɛlɛ kàliige kɔli mɛ́ gè nɛ́ kàmɛgɛ kɔli mɛ́ gè.
30 Kire cɛngɛ gáà kire nī, Yewe 'Isirayɛli siɛnnɛ suɔ bèle Ezipiti siɛnnɛ mɛ́ bèle. A pe 'Ezipiti kúbilo nyaa bèle wáala luʔɔ gògogo nɛ̄ gè. 31 Bà Isirayɛli siɛnnɛ pe 'Yewe ŋɔri kɔli nyaa gè, gàa wi yé taʔa Ezipiti siɛnnɛ nɛ̄ bèle, a pe 'fíɛ Yewe nɛ̄. A pe 'tɛ́ngɛ Yewe nɛ̄ nɛ́ wi baakuɔwɔ Misa ní wè.