Yirile nɛ́ Suɔlɔ Sɛbɛ wè
Yirile
MISA SIILE NƐ WI YERIGƐNMƐ KULOCƐLIƐ BAARA NI DE
(1.1–4.31)
Isirayɛli pìile pe 'puu sùkulomɔ nɛ̄ Ezipiti kùlo nī lè
1
1 Isirayɛli wè, ŋàa pe 'puu nɛ ye míɛni Yakuba wè, wire jaala peli bīɛlɛ bàli bèle, bàli ní wi yé kɔ́n Kanaa kùlo mɛ́ lè nɛ̀ pɛn Ezipiti kùlo mɛ́ lè, siɛn ó siɛn nɛ́ wi saʔa wuulo ní bèle: 2 Wurubɛni, Simɛyɔ, Levii, nɛ́ Zuda, 3 Izakari, Zabulɔn, nɛ́ Bɛnzamɛ, 4 Dan, Nafitali, Gadi, nɛ́ Azɛri. 5 Yusufu wire 'puu baa nɛ̀ kúɔ Ezipiti kùlo nī lè. A ki 'nyaa Yakuba pìile nɛ́ pe pìile ní bèle, pe mìɛni bìnɛ wi 'puu siɛnnɛ togotaanri nɛ́ kpɔrigɔa.6 A ki pɛ́nì nyaa a Yusufu wi 'kùu, nɛ́ wi lɔbilɔ pe mìɛni ní bèle, nɛ́ pe kɛ̀nnɛ wuulo pe mìɛni ní. 7 Kire nɛ́ ki mìɛni cesiʔi ki 'puu nɛ tàán Isirayɛli pìile nɛ̄ bèle; Isirayɛli siimɛ pi 'puu nɛ niʔɛgi nɛ waa, fúɔ nɛ̀ pɛ́nì kò siɛnniʔɛbobo nɛ́ ní ŋɔri ní, fúɔ a pe siɛnnɛ pe 'niʔɛ nɛ̀ pɛ́nì kùlo nyì lèb.
8 A kùlofɔvɔnwɔ wáà kɛ́nì tɛ́ni Ezipiti kùlo nɛ̄ lè, ŋàa wiì cé tàa cɛ́n Yusufu wori nī dèʔ. 9 A wi 'ki juu wi siɛnnɛ mɛ́ bèle nɛ́ jo: «Ye- ki wéli, Isirayɛli siimɛ pi nyɛ́nì niʔɛ nɛ̀ tóri weli nɛ̄, nɛ́ ní pe ŋɔri ti 'kpúʔɔ weli nɛ̄. 10 We 'yɛli bè sícilige caa bè pe yérige, kàa fǎga ní de fàri pe nɛ̄ʔ. Á kire bɛ̀ʔ, a kapiɛnnɛ kɛ́nì yɛ̀ kùlo nī lè, pe bé fàri weli leguulo nɛ̄ bèle bè tún nɛ́ weli ní, bé yiri kùlo nī lè.»
11 A Ezipiti siɛnnɛ pe 'yiɛgininɛ pálì yige pe- parituɔrɔ cáan dè Isirayɛli siɛnnɛ nɛ̄ bèle, béri pe wuʔɔ nɛ́ kire baagbɛnrɛ ní dè. Bà ki 'kpíʔile a Isirayɛli siɛnnɛ pe 'Pitɔmi nɛ́ Aramisɛsi kàaya faan yè bè yi kpíʔile yaliire tɛ́ngɛdiɛyɛ Farawɔn mɛ́ wè.
12 Bà wi 'puu nɛ pe wuʔɔ bèle nɛ́ baagbɛnrɛ ní dè, kire nɛ́ ki mìɛni pe 'puu nɛ niʔɛgi nɛ tiɛrɛ nyìgí dè nɛ waa. Kire nɛ̄ Isirayɛliyé pe 'puu nɛ fíɛrɛ cògí Ezipiti siɛnnɛ nɛ̄ bèle. 13 A Ezipiti siɛnnɛ pe sí tɔ̀ni nɛ̀ Isirayɛli siɛnnɛ cò bèle fànʔa pe- baagbɛnrɛ kúu dè, 14 fúɔ a sìi wi láa 'kúɔ pe nī, baagbɛnrɛ tire kɛnmɛ nɛ̄, tire ti 'puu pe- cuuro kɔ̀ngí dè, nɛ jìfaa kpúɔn wè, nɛ siʔi baara kúu dè. Kányiʔɛ nɛ̄ pe 'puu nɛ pe wuʔɔ nɛ́ baagbɛnrɛ ti mìɛni feliye ní.
15 Cesiijobilo siin 'puu baa Eburulo mɛ́ bèle; pe 'puu nɛ wàa yeri Sifira, níɛ ŋìi yeri wè Puwa. A Ezipiti kùlofɔli wi 'ki 'juu pe mɛ́ nɛ́ jo: 16 «A yeli nɛ Eburulo cɛlilɛ cògí bèle siidiʔɛ nī gè, ye- ki wéli cɛ̀ngɛ: a ki yē nàgabile pe 'sii wè, ye- ni kpúu; á ki yē pìcapile nī lè, ye- ni yaʔa sìi nɛ̄.»
17 Nɛ̀ ki yaʔa cesiijobilo pe puu nɛ fìʔɛ́ Kulocɛliɛ nɛ̄, kire kɛnmɛ nɛ̄ piyè fɔ̀li nɛ̀ Ezipiti kùlofɔli ŋáà wi siɛnrɛ lúʔu dèʔ. A pe 'nàgabigele yaʔa gèle sìi nɛ̄.
18 Kire nɛ̄ a Ezipiti kùlofɔli wi 'cesiijobilo yeri bèle nɛ̀ pe yɛ: «Gáa nɛ̄ yeli ki 'kpíʔile mmɛ gè ? Gáa kɛnmɛ nɛ̄ yeli 'nàgabigele yaʔa gèle sìi nɛ̄ ?»
19 A cesiijobilo pe 'Farawɔn yɛ wè: «Muɔ 'ki cɛ́n lé, Eburulo cɛlilɛ pe 'sii madɛni nɛ̀ tóri Ezipiti cɛlilɛ nɛ̄ bèle. Sɛ́ni cesiijowo wi- nɔ̀ baa wè, pe nɛ̂ sii nɛ̀ kúɔ.»
20 A Kulocɛliɛ wi 'kacɛ̀ngɛ kpíʔile cesiijobilo mɛ́ bèle. A Eburulo siɛnnɛ pe 'kò nɛ niʔɛgi nɛ waa, fúɔ nɛ̀ pɛ́nì kò siɛnniʔɛbobo. 21 Bɛ̀ cesiijobilo pe yé fíɛ Kulocɛliɛ nɛ̄ wè, a Kulocɛliɛ míɛni 'pe kɛn siimɛ nɛ̄.
22 A Farawɔn 'fali nɛ̀ ki juu nɛ̀ gbɛ̀ngɛ wi siɛnnɛ mɛ́ bèle, nɛ́ jo: «Nàgabile ó nàgabile ni bé sii Eburulo siɛnnɛ mɛ́ bèle, yeli 'yɛli bè ni cò bè sa wáa Niili cáʔa nī gè. A ki 'nyaa pìcapigele gèle, ye- keli yaʔa sìi nɛ̄.»