Pe 'Misa láʔa wè pìfinʔɛ, luʔɔ naamɛ gè
2
1 Kire lɛ̀lɛ nī lè, a Levii saʔa nàguɔ wáà 'cɛliwɛ wáà líɛ ŋàa wi 'puu saanugo wuu nɛ́ wire ní wè. 2 A cɛliwɛ wi 'laala taa nɛ̀ nàgabile sii. Bà wi 'pùɔ nyaa wè cɛ̀nwɛ wè, a cɛliwɛ wi 'wi làrigɛ nɛ̀ taa yeye taanria. 3 Bà cɛliwɛ wi kɛ́nì ki nyaa wire sì ní gbɛ̀ wi làrigɛ cígini wèʔ, a wi 'juɔlɔ láà líɛ nàa pe yé tìin nɛ́ píinre ní dè, nɛ́ gidurɔ kùro líɛ nɛ̀ ti nyaʔami nɛ́ tiige kùro ní, nɛ̀ ni tiin, kire ga buu luʔɔ fǎga jíin ni nīʔ. A wi 'pìfinʔɛ sínge gè baa juɔlɔ nī lè, nɛ́ sɛ́nì ni tɛ́ngɛ nyàʔanivɛgɛ tiire nī Niili cáʔa nī gè. 4 A pìfinʔɛ ki juɔ wi 'sìʔɛrɛ nɛ̀ yéri níɛ wéli baa, gàa ki bága kpíʔile gè.5 A Farawɔn póri wi kɛ́nì kɛ́ baa Niili cáʔa mɛ́ gè bè sa gbéli. Bà wi sɛ́ni gbínni wè, baakuɔsinborilo bálì pe yé pínɛ nɛ́ wi ní wè, peli puu nɛ nyaari luʔɔ gògogo táanni gè. A Farawɔn póri wi 'juɔlɔ nyaa lè nyàʔanivɛgɛ tiire sunʔɔmɔ nī bè, a wi 'wi baakuɔsinboriwo wáà tun wi- sa juɔlɔ líɛ lè de báan. 6 A wi pɛ́nì ni múgu nɛ̀ pìfinʔɛ nyaa gè baa juɔlɔ nī lè, pìfinʔɛ ní gè nɛ nyɛni. A pìfinʔɛ ki nyinimɛ 'jíin wi nī, a wi 'jo: «Cáa ! je Eburulo pìfinʔɛ káà gī !»
7 A pìfinʔɛ ki juɔ wi 'Farawɔn póri yɛ wè: «Muɔ nɛ caa lé mi- sa cɛliwɛ wáà caa Eburulo cɛlilɛ nī bèle wi- pari pìfinʔɛ kanʔa gè kiri ŋɔri muɔ mɛ́ lé ?»
8 A Farawɔn póri wi 'jo: «ʔaan, te waa !» A sinboriwo wi sɛ́nì pìfinʔɛ ki yàa yeri wè.
9 A Farawɔn póri wi pɛ́nì wi yɛ: «Te waa nɛ́ pìfinʔɛ gáà ní gè, ma sari ki kanʔa kiri ŋɔri. Mi tíimɛ m'béri muɔ sàrí.»
A cɛliwɛ wi 'pìfinʔɛ líɛ gè nɛ̀ sɛ́ni ki kanʔa kiri ŋɔri. 10 Bà pùɔ wi pɛ́nì liɛ wè, a cɛliwɛ wi pɛ́nì wi kɛn Farawɔn póri mɛ́ wè, a wi 'kò wi jaa. A Farawɔn póri wi 'wi míʔɛ le gè nɛ wi yeri Misa, gìi wi yé je juu gè, «Mi 'wi láʔa luʔɔ naamɛ.»
Misa wi 'Ezipiti nàguɔ kpúu
11 Bà lɛ̀lɛ láà pɛ́nì kúɔ wè, á Misa 'liɛ nɛ̀ kò nàguɔ wè, cɛngɛ káà a wi kɛ́nì yiri bè wi siinyɛninɛ Eburulo wéli bèle, a wi 'baagbɛnrɛ nyaa dè dàa pe puu nɛ kúu dè. A wi ń'nɛ̀ Ezipiti nàguɔ wáà nyaa wi Eburu nàguɔ wáà kpúɔn, ŋàa wi 'puu wi siinyɛni wè. 12 A Misa 'páʔa nɛ̀ wéli nɛ̀ màʔa; wiì siɛn nyaaʔ. A wi 'fali nɛ̀ Ezipiti nàguɔ kpúɔn wè a wi 'kùu. A wi 'kpúu làrigɛ wè dàrimiʔɛ nī gè. 13 Ki kpìɛnduu gè, bà wi ń'nɛ̀ yɛ̀ nɛ̀ yiri wè, a wi 'Eburu nàguɔlɔ pálì siin nyaa, pe pìye kpúɔn. A wi 'ki juu káfinɛgɛfɔli mɛ́ wè, nɛ́ jo: «Gáa nɛ̄ muɔ nɛ muɔ siinyɛni kpúɔn wè ?»
14 A káfinɛgɛfɔli wi 'jo: «Ŋáa wi 'muɔ tɛ́ngɛ muɔ de kàyuʔu nyu náʔa gè ? Muɔ nɛ sɔ̀ngi lé bè mi kpúu majo bɛ̀ muɔ 'Ezipiti nàguɔ kpúu wè ?»
A fíɛrɛ 'Misa cò, a wi 'jo: «Kuo, je siɛnrɛ tiī cɛ́nrɛ wī !»
Misa 'fɛ̀ nɛ̀ kɛ́ waama kùlo nī
15 A Farawɔn 'kaala náà cɛ́n lè, a wi 'yɛ̀ nɛ Misa caa bè wi kpúu. Kire nɛ̄ a Misa wi 'fɛ̀ nɛ̀ yiri Farawɔn tiʔɛ nī gè nɛ̀ kɛ́ Madiyan kùlo mɛ́b nɛ̀ sɛ́nì kò baa kire kùlo nī lè kɔ̀lɔ wáà táannic.
16 Madiyan kùlo kacuɔnriwɔ wáà 'puu baa, sinborilo kɔlisiin yé puu wi mɛ́. Kire sinborilo pe 'puu nɛ báan nɛ luʔɔ kóri kɔ̀lɔ nī wè, nɛ nii pàngoyo nī yè bè síkaala nɛ́ sìnbaara kɛn dè ti- gbuɔ. 17 Nɛ̀ ki yaʔa sìnbanaʔana pálì 'puu nɛ báan nɛ pe cìrá. A Misa wi sɛ́nì sìnbanaʔana bálì cìra bèle nɛ̀ láʔa sinborilo bálì nɛ̄ bèle, nɛ́ pe síkaala nɛ́ sìnbaara kɛn dè a ti 'gbuɔ. 18 Bà sinborilo pe 'koli nɛ̀ kɛ́ kpáa mɛ́ gè, a pe tuu Erewuyɛlid wi sɛ́nì pe yúgo nɛ̀ jo: «Gáa nɛ̄ yeli 'pɛn faʔa pàngɛ gè nɛ̀ tóri cɛnzɛnyɛ nɛ̄ yè ?»
19 A sinborilo pe 'jo: «Ezipiti kùlo nàguɔ wáà siɛncɛ̀nwɛ, wi 'wéli suɔ sìnbanaʔana pe kiyɛ nī yè. Nɛ́ míɛni wi cɛ́nì luʔɔ kúu nɛ̀ kɛn weli síkaala nɛ́ sìnbaara mɛ́ dè a ti 'gbuɔ.»
20 A pe tuu wi 'pe yúgo nɛ́ jo: «Sé wi yē ? Gáa nɛ̄ yeli nàguɔ ŋáà yaʔa wè baa ? Ye- sa wi yeri wiri báan wi pa lìi.»
21 A Misa 'fɔ̀li ki nɛ̄ nɛ̀ kò baa Erewuyɛli tiʔɛ nī gè. A wire 'wi póri Sipora kɛn wè Misa mɛ́ cɛliwɛ. 22 A wi 'nàgabile sii, a Misa 'wi míʔɛ le gè nɛ wi ye Gerisɔmi (ki kɔri wire wī: nabɔnwɔ), gìi wi yé je juu gè, «Mi 'puu nabɔnwɔ kùlo láà nī wī.»
Kulocɛliɛ wi 'Misa yeri wè nɛ̀ wi tun bè Isirayɛliyé suɔ bèle
23 A lɛ̀lɛ láà 'tóri a ki 'mɔgɔ, a Ezipiti kùlofɔli wi pɛ́nì kùu. Á Isirayɛli siɛnnɛ ní bèle nɛ cíɛn baagbɛnrɛ láara dè, a Kulocɛliɛ 'pe fùrɔgɔ kòkuʔulo lúʔu gèle, gàli pe 'puu nɛ wáari níɛ wi náari wè, parituɔrɔ kɛnmɛ nɛ̄ bè. 24 A Kulocɛliɛ wi 'pe cíɛnmɛ lúʔu bè, a Kulocɛliɛ wi 'sɔ̀ngi nɛ̀ taa wi nyakungɛngɛ nɛ̄ gè, gàa wi yé juu Birayima mɛ́ wè, nɛ́ Siaga ní wè, nɛ́ Yakuba ní wèe. 25 A Kulocɛliɛ wi 'Isirayɛli siɛnnɛ nyaa bèle, a pe 'nyinimɛ jíin wi nī.