3
1 Misa wi 'puu nɛ wi cuɔ tuu Zeturoa síkaala nɛ́ sìnbaara nári dè. Zeturo wire wi 'puu Madiyan kùlo kacuɔnriwɔ wè. A wi 'kɛ́ nɛ́ yajuuro ní dè fúɔ waama tiʔɛ kàduʔu mɛ́ gè, a wi sɛ́nì nɔ̀ Worɛbi nyagurugo nɛ̄ gè, gàa pe 'puu nɛ yeri Kulocɛliɛ nyagurugo gèb. 2 A Yewe tundunwɔ pɛ́nì wìi tìɛ Misa nɛ̄ bɛ̀ kàsunnyige tíɛlɛ. Ki 'puu nɛ nyí tiinbile láà sunʔɔmɔ nī. A Misa 'ki nyaa a ki 'wi fungo wúɔ, cí ! kàsun nɛ nyí tiinbile nī lè, nɛ̀ ki yaʔa tiinbile niì puu nɛ sóriʔ. 3 A Misa sí ki sɔ̀ngi nɛ̀ jo: «A ki yē bɛ̀, m'bé koli bè sa kanyuʔɔninɔ náà wéli lè, gáa nɛ̄ tiinbile ni wè nɛ sóriʔ.»
4 Bà Yewe 'wi nyaa a wi 'koli bé pa ki wéli wè, a Kulocɛliɛ sí wi yeri tiinbile sunʔɔmɔ nī bè nɛ́ jo: «Misa yo ! Misa yo !»
A Misa wi 'suɔ: «Cooyi !»
5 A wi 'jo: «Muɔ fǎga kpɔni náʔa tiʔɛ gáà nɛ̄ gèʔ. -Muɔ tɔriyɔ fòri yè, nɛ́ ki cɛ́n tiʔɛ gàa nī muɔ yē yériwe wè, tiɛcɛ̀ngɛ gī; Kulocɛliɛ yē bile.»
6 A Kulocɛliɛ wi ń'nɛ̀ jo: «Mi wī muɔ tuu wi Kulocɛliɛ wè, nɛ́ ní Birayima Kulocɛliɛ wè, nɛ́ Siaga Kulocɛliɛ wè, nɛ́ ní Yakuba Kulocɛliɛ wèc.»
A Misa wi 'wi yiʔɛ làrigɛ gè, nɛ́ ki cɛ́n wi 'puu nɛ fìʔɛ́ bè Kulocɛliɛ wéli wè.
7 A Yewe 'jo: «Kányiʔɛ nɛ̄, mi nyɛ́nì mi siɛnnɛ pe fuunmɔ nyaa bè, Ezipiti kùlo nī lè. A mi 'pe kòkuʔulo lúʔu gèle, gàli pe wáari gèle pe wuʔɔfɔlilɔ kiyɛ nī yè, nɛ́ ki cɛ́n mi nyɛ́nì pe fùrɔgɔ cɛ́n gè. 8 Kire nɛ̄ mi 'tìgi bè pa pe suɔ Ezipiti siɛnnɛ kiyɛ nī yè, bè kɛ́ nɛ́ pe ní kùlo náà mɛ́ lè nàa ni 'nyuɔ nɛ́ kpúʔɔ lè, nɛ́ ní tàanna lè, baa nɛ̀yirimɛ nɛ́ sárigɛ kiī nɛ fúu gèd. Lire kùlo lire niī Kanaa siɛnnɛ woli lè, nɛ́ Eti siɛnnɛ, nɛ́ Amɔri siɛnnɛ, nɛ́ Perezi siɛnnɛ, nɛ́ Evi siɛnnɛ nɛ́ Jebusi siɛnnɛ kùlo lè. 9 Píra ŋáà nī wè, mi nyɛ́nì Isirayɛli siɛnnɛ pe kòkuuwaara lúʔu dè, nɛ́ míɛni mi nyɛ́nì pe fùrɔgɔ nyaa gè kɛnmɛ bíì nɛ̄ Ezipiti siɛnnɛ pe 'pe fànʔa lúbugo gè pe nɛ̄ wè. 10 Kire nɛ̄, píra ŋáà nī wè, te waa. Mi nyɛ́nì muɔ tun Farawɔn mɛ́ wè. Ma sa mi siɛnnɛ yige bèle, Isirayɛliyé bèle, Ezipiti kùlo nī lè.»
Kulocɛliɛ wi 'wi míʔɛ tìɛ gè Misa nɛ̄ wè
11 A Misa sí Kulocɛliɛ yɛ wè: «Mi yé puu ŋáasiɛn, bága kári Farawɔn kúrugu bè sa Isirayɛli siɛnnɛ yige bèle Ezipiti kùlo nī lè ?»
12 A Kulocɛliɛ 'fali nɛ̀ ki juu wi mɛ́ nɛ́ jo: «MI YĒ nɛ́ muɔ ní. Fìɛ n'ŋɛ ŋàa wi bé ki tìɛ mi 'muɔ tun wè: a muɔ sɛ́nì mi siɛnnɛ yige bèle Ezipiti kùlo nī lè, yeli bé sa Kulocɛliɛ gbùʔɔrɔ wè nyagurugo gáà nɛ̄ gè.»
13 A Misa wi 'Kulocɛliɛ yɛ wè: «-Ki wéli, a mi 'kɛ́ Isirayɛli siɛnnɛ mɛ́ bèle, nɛ́ sɛ́nì ki juu pe mɛ́ nɛ́ jo: ‹Yeli tobilo Kulocɛliɛ wi 'mi tun,› pe bé mi yɛ: ‹Pe 'wi míʔɛ ye gè gáa ?› Gíi sí m'bé juu pe mɛ́ ?»
14 A Kulocɛliɛ 'ki juu Misa mɛ́ nɛ́ jo: «MI YĒ ŊÀA MI YĒ WÈe.» A wi ń'nɛ̀ jo: «Muɔ 'yɛli bè sa ki juu Isirayɛli siɛnnɛ mɛ́ bèle ma jo: ‹MI YĒ, wire wi 'mi tun yeli mɛ́.› »
15 A Kulocɛliɛ ń'nɛ̀ ki juu Misa mɛ́ nɛ́ jo: «Muɔ 'yɛli bè ki juu Isirayɛli siɛnnɛ mɛ́ bèle bé jo: ‹Yewe wèf, yeli tuuliɛyɛ Kulocɛliɛ wè, Birayima Kulocɛliɛ wè, nɛ́ Siaga Kulocɛliɛ wè, nɛ́ Yakuba Kulocɛliɛ wè, wire wi 'mi tun yeli mɛ́. Gàa kire gī mi míʔɛ gè lɛ̀gɛlɛ ke mìɛni nī. Míʔɛ gáà kire ní yeli 'yɛli bèri sɔ̀ngí de taʔa nɛ́ mi ní, kɛ̀ngɛlɛ ke mìɛni ní, lɛ̀lɛ ó lɛ̀lɛ nīg.›
16 «Te waa, ma sa Isirayɛli liɛlɛ gbuʔulo bèle pìye nɛ̄, ma pe yɛ: ‹Yewe wè, yeli tuuliɛyɛ Kulocɛliɛ wè, Birayima Kulocɛliɛ wè, nɛ́ Siaga Kulocɛliɛ wè, nɛ́ Yakuba Kulocɛliɛ wè, wi 'wìi tìɛ mi nɛ̄ nɛ́ jo: Mi nyɛ́nì ki nyíɛnɛ nɛ̀ kɔ̀n bè yeli sáʔa, nɛ́ ki cɛ́n mi nyɛ́nì yeli nàʔagɛnmɛ nyaa bè, bàa Ezipiti siɛnnɛ pe 'taʔa yeli nɛ̄ bèle. 17 A mi 'ki nyíɛnɛ nɛ̀ kɔ̀n bè yeli yige yeli fuunmɔ nī bè Ezipiti kùlo nī lè, bè kɛ́ nɛ́ yeli ní kùlo náà mɛ́ lè baa Kanaa siɛnnɛ pe yē bèle, nɛ́ Eti siɛnnɛ, nɛ́ Amɔri siɛnnɛ, nɛ́ Perezi siɛnnɛ, nɛ́ Evi siɛnnɛ nɛ́ Jebusi siɛnnɛ bèle. Kire kùlo lire nī nɛ̀yirimɛ nɛ́ sárigɛ kiī nɛ fúu gè.› »
18 A Kulocɛliɛ ń'nɛ̀ ki juu Misa mɛ́ nɛ́ jo: «Pe bé muɔ siɛnrɛ lúʔu dè. Dí muɔ sí jíin Ezipiti kùlofɔli kúrugu wè, muɔ nɛ́ Isirayɛli liɛlɛ ní bèle. Yeli bé sa wi yɛ: ‹Yewe wè, Eburulo Kulocɛliɛ wè, wi nyɛ́nì wìi tìɛ weli nɛ̄. Píra ŋáà nī wè ma weli yaʔa weli cɛnyɛ taanri tánʔana tánʔa waama kùlo nī lè, bè sa yajuuro kpúu bè Yewe gbùʔɔrɔ wè, Kulocɛliɛ wè.›
19 «Mi wè, mi 'ki cɛ́n Ezipiti kùlofɔli wiǐ ga yeli yaʔa yeli kɛ́ʔ ka laa mi ŋɔri kɔli kire bɛ̀ʔ. 20 Kire nɛ̄ m'bé mi kɔli sáʔa gè bè Ezipiti kùlo kpúɔn lè nɛ́ kakpoliyo ní yè nyàa m'bé kpíʔile pe sunʔɔmɔ nī bè. Kire kàduʔumɛ wi bé yeli yaʔa yeli- kɛ́. 21 M'bé ki kpíʔile yeli bé kpuʔɔrɔ taa Ezipiti siɛnnɛ mɛ́ bèle. A yeli kɛ́ni waa wè, yeli sǐ kɛ́ nɛ́ kiyɛ ní yè waayaʔ. 22 Cɛliwɛ ó cɛliwɛ ŋáà wī Isirayɛli cuɔ wè, wi bé wi tɛ́ninyɛni náari ŋàa wī Ezipitiyé wuu wè, nɛ́ ŋàa wi yē saanugo nī nɛ́ wi ní wè, walifiiwe yɛrɛ nɛ̄, nɛ́ tiɛ yakpiʔilide dè, nɛ́ burudo. Yeli bé ti kɛn yeli jaala nɛ́ yeli pórilo mɛ́ bèle, pe- ti le. Bà ki bé kpíʔile yeli bé Ezipiti siɛnnɛ pe mìɛni fùʔuro.»